Higala ngadto sa Higala
Elevator nga Paghinulsol
Sa dihang 11 anyos ako, ang akong pamilya nagpuyo sa usa ka 12-andanas nga gambalay sa Hong Kong. Kadla adlaw human sa eskwelahan, midagan ako pasulod sa gambalay ug misakay sa elevator padulong sa among apartment.
Usa ka adlaw misakay ako sa elevator ug gipislit ang tanang button nga misiga ang tanan. Karon ang elevator mohunong sa matag andana. Misugod og sirado ang mga pultahan, apan kalit lang usa ka tawo ang mibutang sa iyang kamot taliwala sa mga pultahan ug miabli niini. Usa kadto sa akong mga silingan sa ibabaw nga andana. Wala siyay bisan unsa nga gisulti mahitungod sa mga button, apan gikulbaan ko. Daw mabati nga molungtad sa kahangtoran nga makapauli sa panimalay!
Segurado gayod, ang elevator mihunong sa sunod nga andana, mipaabot, ug dayon mipadayon. Sa dihang miabli ang mga pultahan sa akong andana, misutoy ko og gawas. Naabot ako sa panimalay nga gipaningot tungod paspas kaayo kong midagan!
Wala madugay human ko nakauli, ang telepono mibagting. Mao kadto ang silingan gikan sa elevator. Gikulbaan ako og maayo nga naghulat sa akong mama nga mahuman og istorya sa telepono.
Pagkahuman niya og istorya sa telepono, nangutana ang akong mama, “Gipislit ba nimo ang tanang button sa elevator?”
Dili ako makapamakak sa akong mama. “Oo,” miingon ko.
Mipahiyom ang akong mama. “OK, mosaka kita ug makig-istorya sa atong silingan.”
Magkauban kaming misaka. Gibagting nako ang doorbell, ug ang akong silingan miabot sa pultahan. Naghuyhoy ang akong ulo samtang nangayo ko og pasaylo nga akong gipislit ang tanan nga mga button. Misaad ako nga dili na gayod nako kini buhaton og usab.
Mabination ang among silingan. Miingon siya, “Kon dili na gayod kini nimo buhaton og usab, para nako ok ra kadto.”
Human nga gisultihan nako siya nga nagbasol ko, maayo ang akong gibati. Ug wala na gayod nako gipislit ang tanang button sa elevator pag-usab.
Kini nga kasinatian nakatabang kanako nga makakat-on kabahin sa paghinulsol. Nasayod ako nga nakabuhat ako og sayop nga butang. Mibati ako og pagbasol ug nangayo og kapasayloan. Ug wala na gayod nako kini gibuhat pag-usab. Dayon mibati ako nga malipayon! Ang paghinulsol makahatag usab og kalipay kaninyo.
Paghulagway pinaagi ni Alyssa Tallent