Ang Solo ni Sarah
Maayo ra ang dagan sa tanan … hangtod miabot si Sarah sa koro.
“Sarah, ganahan ba ka mokanta sa usa ka programa sa musika?” nangutana si Ms. Gardner, ang magtutudlo ni Sarah sa pagkanta.
“Ganahan kaayo ko!” Miingon si Sarah.
“Maayo alang kanimo nga mokanta sa atubangan sa uban,” miingon si Ms. Gardner, nga gisulat niya sa iyang notebook. “Ang programa ipahigayon sa kataposan sa Agosto, mao nga ikaw adunay tibuok nga ting-init aron mangandam.”
Gisultihan ni Sarah ang iyang mga ginikanan mahitungod sa programa dihadiha dayon pag-abot niya sa panimalay. Gitawagan niya ang iyang mga apohan paghuman dayon sa panihapon. Malipayon kaayo siya!
Sa sunod niyang leksiyon, si Sarah ug si Ms. Gardner mipili og duha ka awit alang sa programa. Usa ka awit gikan sa usa ka opera, ug ang lain gikan sa usa ka pasundayag sa musika. Dayon naningkamot si Sarah.
Gibansay niya ang iyang mga awit uban ni Ms. Gardner. Ug nagbansay siya sa panimalay kada adlaw. Sa wala madugay nasag-ulo niya ang iyang mga awit. Gihapon, padayon siya nga naningkamot.
Sa kataposan, miabot ang adlaw sa programa. Nangandam si Sarah. Gisul-ob niya ang iyang asul nga sinina. Gisudlay niya ang iyang buhok. Dayon miluhod siya kilid sa iyang higdaanan ug nangayo og tabang sa Langitnong Amahan.
Sa wala madugay nagpadulong na sila ngadto sa programa. “Nakuyawan ka ba?” nangutana ang iyang mama.
Milingo-lingo si Sarah. “Nasag-ulo gayod nako og maayo ang mga awit nga makanta nako kini og pinabali!”
Mipahiyom si Mama. “Nagbansay gayod ka og maayo niini nga ting-init.”
Sa dihang miabot sila didto sa programa, milingkod si Sarah tupad sa iyang mga ginikanan ug mga apohan. Ang iyang higala nga si Megan mao ang una nga mokanta. Mikanta og sunod si Evan. Si Sarah ug ang tanan sa mananambong mipakpak human sa matag awit.
Sa dihang turno na ni Sarah, miginhawa siya og lawom ug milakaw paingon sa mikropono. Hingpit niyang nakanta ang unang awit. Mipahiyom si Ms. Gardner kaniya. Dayon misugod si Sarah og kanta sa ikaduhang awit.
Maayo ra ang dagan sa tanan hangtod miabot siya sa koro. Ug dayon nahitabo kini. Nakalimot siya sa mga pulong! Hingpit nga nablangko ang iyang hunahuna. Gikulbaan siya nga mitan-aw sa mananambong ug misinyas ngadto sa piyanista nga mohunong.
“Pasayloa ko,” miingon si Sarah. “Ganahan ko nga mosugod pag-usab.”
Ang iyang mga kamot gipaningot og gamay. Mabati niya nga naglagubo ang iyang kasingkasing sa iyang dughan. Miginhawa na usab siya og lawom, miyango ngadto sa piyanista, ug misugod pag-usab.
Niining higayona, nakahinumdom siya sa tanang pulong. Ang mananambong namakpak sa dihang nahuman siya. Mipahiyom si Sarah, apan naulaw siya.
Human sa programa, nakit-an ni Sarah ang iyang magtutudlo.
“Pasayloa ko, Ms. Gardner,” miingon siya. “Nasayop gayod ako.”
“Wala gayod, Sarah,” miingon ang iyang magtutudlo. “Nakalimot lang ka kon unsay sunod nga kantahon. Mahimo kanang mahitabo ni bisan kinsa. Ang importante mao nga mipadayon ka.”
“Husto kana,” miingon si Lola, nga miapil kanila. “Kami mapasigarbohon kaayo kanimo.”
Nianang gabhiona, naghunahuna si Sarah mahitungod sa programa. Lain gihapon ang iyang gibati mahitungod kay nakahimo og sayop. Apan husto si Ms. Gardner. Si Sarah mipadayon gayod. Mahimo niyang ikapasigarbo kana.
Sama kaayo kini sa paghinulsol, naghunahuna siya.
“Oy, Ma!” Misangpit si Sarah, nga nagdagan paingon sa kwarto sa iyang mga ginikanan. “Akong nasabtan nga ang programa sama sa kinabuhi.”
“Sa unsang paagi, pangga?” Nangutana si Mama. Mihagba si Sarah tupad ni Mama sa higdaanan.
“Nakahimo ako og sayop sa akong solo, apan gitarong nako kini ug mipadayon. Sa kinabuhi, kon makahimo ako og sayop nga pagpili, matarong nako kini pinaagi sa paghinulsol. Dayon makapadayon ako ug mobuhat og mas maayo.”
“Kahibalo ka, murag nindot kaayo kana nga tema alang sa home evening,” miingon si Mama. “Gusto ka ikaw mohatag sa leksiyon?”
“Sige ba!” Miingon si Sarah. Dili siya makapaabot sa pagpaambit sa unsay iyang nakat-onan.
Mga paghulagway pinaagi ni Alyssa Tallent