Pagtabang ug ang Espiritu Santo
Kamo mahimong mobati sa Espiritu Santo bisan sa wala pa kamo mabunyagan.
Si Mateo ug ang iyang papa nag-uban sa pagpanglakaw ngadto sa fruit stand sa ilang pamilya. Ang iro ni Mateo, si Zeus, misunod kanila.
“Imo bang gipangutana ang bishop mahitungod sa akong bunyag?” Nangutana si Mateo. Otso anyos na siya, apan wala pa siya mabunyagi tungod sa pandemiya.
“Miingon siya nga dili pa ka mahimong mabunyagan karong bulana,” miingon si Papa. “Tingali sa sunod bulan.”
“OK.” Nagmug-ot si Mateo. Gusto gayod niya nga mabunyagan ug madawat ang gasa sa Espiritu Santo. Apan kini ingon og dili na gayod mahitabo!
Giablihan ni Papa ang trangka sa stand. Mitabang si Mateo sa pagdala sa mga kahon sa mga kahil [orange], mga lemon, mga mangga, ug mga saging. Dayon mitabang siya sa pagbutang niini diha sa mga estante [shelves].
Nagsige og hunahuna si Mateo mahitungod sa Espiritu Santo samtang mitrabaho sila. “Unsa kaha ang pamati sa Espiritu Santo?” nangutanan siya.
“Ang Espiritu Santo mohupay kanako kon ako maguol,” miingon si Papa. “Ug Siya mihimo nako nga mobati og maayo kon ako makatabang og tawo.”
“Dili na ko makapaabot nga mabunyagan aron akong mabati usab ang Espiritu Santo!”
“Bisan sa wala ka pa mabunyagan ug makompirmahan, mahimo ka nga mobati sa Espiritu Santo,” miingon si Papa. “Makabati ka sa Iyang paghupay karon. Sama kon ikaw mag-ampo o mobuhat og butang nga mabination alang sa usa ka tawo. Dayon human nga ikaw makompirmahan, ikaw kanunay na nga makabaton sa Espiritu nga mag-uban kanimo.”
Naghunahuna si Mateo mahitungod niana. Nabati na ba niya ang Espiritu Santo kaniadto?
Sa wala madugay ila nang nadiskarga ang tanan sa kahon. “Andam ka na ba sa pagtabang sa mga Sosa?” Nangutana si Papa.
Mitando si Mateo. Sila si Mr. ug Mrs. Sosa maglisod sa paglakaw. Busa si Mateo ang miadto sa merkado alang kanila. Usahay mitabang usab siya kanila sa pagbuhat sa mga buluhaton sa panimalay.
Si Mateo ug si Zeus milakaw ngadto sa balay sa mga Sosa. Si Manang Sosa mikamay gikan sa atubangan sa balkon. “Maayong Buntag!”
“Nagkinahanglan ba kamo og mga grocery karon?” Nangutana si Mateo.
“Oo. Nagkinahanglan ko og pan, patatas, ug karneng baka.” Si Manang Sosa miihap og pipila ka sensilyo. “Paigo na siguro kana.”
Gidawat ni Mateo ang kwarta. Nakakita siya og usa ka bag sa basura diha sa pultahan. “Mahimo ba kini nakong ilabay para ninyo?” nangutana siya.
“Oo. Salamat!” Miingon si Mrs. Sosa.
Pagkahuman niya og dala sa basura, gipalit ni Mateo ang pagkaon. Gihunahuna niya ang tanang butang nga iyang nahimo nianang buntaga. Siya mitabang ni Papa sa fruit stand. Siya mitabang sa mga Sosa sa pagpalit og pagkaon. Ug siya nakabaton og usa ka maayo nga pagbati. Gibati niya ang Espiritu Santo, sama sa gisulti ni Papa!
Nanghinaot si Mateo nga siya dili kinahanglan nga maghulat pa og mas dugay aron mabunyagan. Gusto siya nga makabaton sa Espiritu Santo uban kaniya sa tanang higayon!
Mga paghulagway pinaagi ni Carolina Farías