Imong Sinulat
Mga Tumong alang sa Bunyag
Niadtong Nobyembre 2019, ako naminaw sa Face to Face nga kalihokan ni Elder Gong mahitungod sa programa sa Kabataan ug Kabatan-onan uban sa akong pamilya. Pagkahuman, ang akong bishop mihatag kanamo og mga booklet sa pagtabang nga makabuhat sa among mga tumong.
Ang akong unang tumong mao ang paghuman sa pagbasa sa Basahon ni Mormon sa dili pa ang akong ikawalo nga adlawng natawhan aron maandam sa akong bunyag. Ako nang gisugdan ang pagbasa niini apan sa walay dakong kadasig. Apan nianang adlawa mihimo ako og usa ka plano uban sa akong papa. Gihunahuna namo kon pila ka mga kapitulo ang kinahanglan nakong basahon sa matag adlaw aron mahuman ang Basahon ni Mormon sa dili pa ang akong bunyag. Misugod ko sa pagbasa sa kada adlaw ug gimarkahan sa dihang akong mahuman sa pagbasa ang matag seksiyon.
Samtang ako nagbasa, gusto ko nga mohimo og dugang pa nga maayo nga mga butang. Busa miapil ko sa tibuok kalibotan nga pagpuasa nga gipahibalo ni Presidente Nelson sa pagtabang nga makontrolar ang COVID-19. Nalipay ko nga nakahimo sa tibuok nga pagpuasa. Ang akong mga ginikanan miawhag kanako sa pag-ampo usab ug sa pagpuasa aron makabaton sa akong kaugalingon nga pagpamatuod sa Basahon ni Mormon ug sa bunyag.
Sa unang Dominggo niadtong Mayo, nag-ampo ko ug nagpuasa. Wala madugay human niana, nahuman nako ang pagbasa sa tibuok Basahon ni Mormon. Mahinamon kaayo ko sa akong bunyag—sa akong adlawng natawhan. Mibati ko nga andam na sa paghimo niining pakigsaad uban sa Dios! Nasayod ko nga ang Basahon ni Mormon tinuod. Ganahan ko sa pagbasa niini, ug ako nalipay nga nakakab-ot niini nga tumong uban sa tabang sa akong pamilya.
Paghulagway pinaagi ni Rosalie Ledezma