Mga Pioneer sa Matag Yuta
Ang Tulo ka Tuig nga Paghulat ni Carol
Nangandoy si Carol nga mabunyagan siya.
Ding-dong! Mibagting and doorbell. Si Carol ug ang iyang igsoon nga babaye, si Jacqui, midagan paingon sa pultahan. “Mama!” Nanawag si Carol. “Ania na si Dee. Moadto na kami sa simbahan!”
“Pagmalipayon,” miingon si Mama.
Giablihan ni Carol ang pultahan. “Kumusta, Dee,” miingon siya. “Tana!”
Si Carol, si Jacqui, ug si Dee milakaw paingon sa hunonganan sa bus. Mahinamon sila nga mobisita sa usa ka bag-o nga simbahan. Nabasahan nila ang mahitungod niini diha sa usa ka magasin. Midapit usab sila og pipila ka higala nga mouban kanila.
Mihunong ang hayag nga pula nga bus. Misakay ang mga batang babaye. Sa London, si Carol ug ang iyang mga higala misakay sa bus hapit bisan asa sila miadto.
Samtang mihunong ang bus diha sa dalan, misakay ang dugang nga mga higala. Sila si Vanessa, Sheila, ug Angela—silang tanan miuban!
Mihunong ang bus diha sa atubangan sa usa ka sentro sa komunidad. Kini ang dapit diin gipahigayon ang mga miting sa simbahan. Sa dihang misulod si Carol sa mga pultahan, mibati siya og usa ka butang nga espesyal.
Naminaw si Carol sa mga awit, sa mga pag-ampo, ug sa mga pakigpulong. Nakaadto siya sa ubang mga simbahan kaniadto. Apan lahi ang mabati niini nga simbahan.
Sa dihang nahuman na ang pagsimba, ang mga batang babaye misakay sa bus pauli. “Gusto ba mo mobalik sunod semana?” Nangutana si Dee.
Mipahiyom si Carol. “Mao kana ang akong gihunahuna!”
Nagbalik-balik og simba ang mga batang babaye. Ang mga tawo didto buotan kaayo. Kanunay nga adunay tawo nga mohangyo kanila nga molingkod tupad kanila. Ug kon adunay mga kalihokan atol sa semana, kanunay sila nga giimbitar. Nabati ni Carol nga ingon og kabahin siya sa usa ka dako nga pamilya sa simbahan.
Sa dihang nahimamat ni Carol ang mga misyonaryo, gusto na siya nga magpabunyag. Si Jacqui usab. Apan mibalibad ang mga ginikanan ni Carol. Wala sila magtuo nga ang mga batang babaye anaa na sa hustong pangedaron nga modesisyon nga magpabunyag.
Kadaghanan sa mga higala ni Carol wala usab gitugotan nga mabunyagan. Apan matag Domingo, silang tanan mosakay og bus paingon sa simbahan. Masulub-on si Carol nga moadto nga dili kuyog ang uban sa iyang pamilya. Apan nasayod siya nga importante nga moadto.
Tulo ka tuig ang milabay. Nangandoy gihapon si Carol nga mabunyagan siya. Gusto siya nga mohaw-as sa tubig, nga limpyo ug lunsay. Ug nasayod siya nga ang gasa sa Espiritu Santo motabang gayod og maayo niya!
“Mama,” miingon si Carol usa ka adlaw, “palihog pwede ba akong mabunyagan?”
Nahilom si Mama sulod sa usa ka minuto. “Nakita ko ikaw nga nausab sukad nag-adtoan ka sa simbahan,” miingon siya. “Nakita nako kon giunsa nimo pagpaningkamot nga makahimo og maayo nga mga pagpili matag adlaw. Kon moingon og oo ang imong papa, nan ako usab.”
Sa kataposan nabunyagan gayod si Carol ug Jacqui. Sa dihang gipandong sa mga misyonaryo ang ilang mga kamot sa ulo ni Carol sa pagkompirmar kaniya, mibati siya nga limpyo ug lig-on. Malipayon siya nga mihimo siya og mga saad sa Dios. Ug karon siya opisyal na nga miyembro sa Ang Simbahan ni Jesukristo sa mga Santos sa Ulahing mga Adlaw!
Gigakos ni Carol si Jacqui samtang naghulat sila og bus pauli. Sila ang unang mga miyembro sa Simbahan sa ilang pamilya. Mga pioneer sila! Ug kadto usa ka panalangin nga dili gayod ibalewala ni Carol.
Ang England usa ka nasod sa kasadpang Europa. Kabahin kini sa United Kingdom.
Ang England adunay duha ka templo.
Adunay labaw pa sa 8,500 ka bus sa London, ang kapital nga siyudad sa England.
Si Carol 11 anyos sa dihang una siyang misimba.
Wala madugay nabunyagan usab si Dee. Karon si Carol ug si Dee maayo gihapon nga mga higala!
Si Carol nagserbisyo karon isip usa ka sakop sa kinatibuk-an nga tigtambag nga konseho [general advisory council] sa Young Women.
Mga paghulagway pinaagi ni Katie Payne