Ngaahi Talanoa mei he Folofolá
ʻOku Teuteu ʻa Siosefa ki he Ngaahi Taimi Faingataʻá
Te ke lava ʻo lau fekauʻaki mo e talanoá ni ʻi he Sēnesi 41.
Ne hoko ʻa Siosefa ko ha palōfita. Naʻá ne nofo ʻi ʻIsipite. ʻI ha pō ʻe taha, naʻe ʻi ai ha misi ngali kehe ʻa Felo, ko e tuʻi ʻo ʻIsipité. Naʻá ne fehuʻi kia Siosefa pe ko e hā e ʻuhinga ʻo e misí.
Naʻe tokoniʻi ʻe he ʻOtuá ʻa Siosefa ke mahino kiate ia ʻa e misí. ʻE maʻu ʻe he kakaí ha meʻakai lahi ʻi ha taʻu ʻe fitu. Pea ʻi ha taʻu ʻe fitu, he ʻikai te nau maʻu ha meʻakai feʻunga. Ko e meʻa ia ne tala ʻe Siosefa kia Feló.
Naʻe pehē ʻe Siosefa ʻoku totonu ke nau tānaki ʻo tauhi ha meʻakai he taimí ni. Pea te nau mateuteu leva ki he ngaahi taimi faingataʻá. Naʻe tuku ʻe Felo ʻa Siosefa ke ne tokangaʻi hono tānaki ʻo tauhi ʻo e meʻakaí. Naʻe ngāue mālohi ʻa Siosefa.
ʻI he hoko mai e taʻu ʻe fitu ʻo e hongé, naʻe maʻu ʻe he kakaí ha meʻakai feʻunga ke nau kai. Naʻe aʻu ʻo nau maʻu ha meʻa feʻunga ke vahevahe mo e niʻihi kehé.
Te u lava ʻo teuteu he taimí ni. Te u lava ʻo ikunaʻi e ngaahi taimi faingataʻá ʻi he tokoni ʻa e ʻOtuá!
Ngaahi tā fakatātā ʻa Apryl Stott