Ko e Hala ʻa e Kalá
“Mālō e lelei, Valelī!” ko Lusi ange ia. Naʻá ne lele atu he fale vaʻingá ke feʻiloaki mo hono kaungāmeʻá. Naʻá na vaʻinga mo Valelī lolotonga e fakataha ʻena ongo faʻeé ʻi ʻapisiasi.
Naʻe maʻu ʻe Lusi ha ngaahi foʻi kala. Naʻá ne fili ha foʻi lanu pingikī. Ka naʻe ʻikai ke ʻi ai haʻane laʻipepa ke tā ai. Ko ia naʻa ne tā ha laine lanu pingikī ʻi ha sea. Naʻe ʻasi ngingila mo fakaʻofoʻofa e lainé ʻi he ukameá. Naʻe sio atu ʻa Lusi kia Valelī mo makiʻikiʻi.
Naʻe fili ʻe Valelī ha kala lanu vāleti. Naʻá ne tā ha fuo pikopiko ʻi ha sea ʻe taha. Naʻe ʻufiʻufi ʻe Lusi mo Valelī ʻa e ongo seá fakatouʻosi ʻaki ha ngaahi fakaʻilonga maama.
Taimi siʻi pē kuo haʻu ʻa Mami ʻo sio ki he fanga kiʻi kohikohí. “Lusi!” Ko faʻeé atu ia. “ʻOkú ke ʻiloʻi ʻoku tau toki valivali pē ʻi ha laʻipepa!”
Naʻe sio pē ʻa Lusi ki he falikí. Naʻá ne ʻiloʻi ko e kalá ke toki fakaʻaongaʻi pē ʻi ha pepa. Ka ʻi he kamata pē ke ne valivalí, naʻe … ngalo ia ai.
Naʻá ne sio ki he seá he taimi ko iá. ʻI he ngaahi uike siʻi kuo hilí, naʻe tokoni hono fāmilí ki hono fakamaʻa ʻo e siasí. Naʻá ne saiʻia ʻi hono tokangaʻi e fale ʻo Sīsuú. Naʻá ne ongoʻi tautea ʻi heʻene fakaʻuliʻi e ʻapi siasí he ʻaho ní.
“Mo haʻu leva ongo tamaiki. Tau fakamaʻa ia,” ko e Fineʻeikí ange ia. Naʻá ne haʻu mo ha pepa holoholo. Naʻe ʻosi fakaviviku mo koaʻi.
Naʻe olo ʻe Valelī mo Lusi e ngaahi meʻa ne vali ʻaki e kalá. Naʻe mole māmālie atu mo kamata ke maʻa.
Naʻe toʻe ʻa Lusi, “ʻOku faingataʻa ʻeni.”.
Naʻe tātaaʻi mai ia ʻe he Fineʻeikí. “ʻIo, ka te ta lava ʻo fai ia!”
Naʻá na olo fakataha e ʻū seá. Fāifai pea maʻa mo ngingila ʻa e ukameá.
Naʻe sio ʻa Lusi ki he sea maʻá peá ne malimali. Naʻá ne fakameʻapangoʻia ʻi heʻene meʻa ne faí. Ka naʻá ne fiefia ʻi heʻene lava ʻo ʻai ke toe matamatalelei ange e ʻū seá.
Tā fakatātā ʻa Mark Robison