Tohi ʻe Koe
Ilifia ʻi he Funga Siteisí
ʻI heʻeku kei siʻí, naʻe fai ha fakaʻaliʻali talēniti ʻi hoku uōtí. Naʻá ku fakahoko mo ʻeku fineʻeikí ʻa e clogging (ko ha faʻahinga hulohula). Naʻá ku ako lahi mo ʻeku faʻeé kae ʻoua kuo tonu e meʻa kotoa.
ʻI he pō ʻo e fakaʻaliʻali talēnití, ʻi he hoko e taimi ke ma hulohula aí, ne u toki ʻiloʻi ai ʻeku ilifia ʻi he funga siteisí. Naʻe ʻikai ke u fie faiva, ko ia naʻá ku lele leva ki he loki Palaimelí.
Naʻe faifai pea ʻilo au ʻe heʻeku faʻeé ʻoku ou tangutu ofi ki he matapá mo tetetete. Naʻá ne fakatokangaʻi ʻeku ilifiá peá ne ʻeke mai ʻoku totonu ke fai haʻama lotu. Naʻá ku loto ki ai.
ʻI heʻema aʻu ki he siteisí, naʻá ku ilifia, ka naʻá ku ʻiloʻi ʻe lava ke tokoniʻi au ʻe he ʻOtuá. Naʻá ku fakahoko fiefia leva mo ʻeku fineʻeikí ʻema hulohulá. ʻOku ou ʻiloʻi ʻe tokoniʻi kitautolu ʻe Sīsū ʻi he taimi ʻe fie maʻu aí.
Ngaahi tā fakatātā ʻa Jeff Harvey