Mei he Kau Palesitenisī ʻUluakí
Ikunaʻi Hoʻo Ngaahi Faingataʻaʻiá
Fakahoko ʻe Palesiteni Dallin H. Oaks
Tokoni ʻUluaki ʻi he Kau Palesitenisī ʻUluakí
Ko ʻeku faingataʻaʻia lahi taha ʻi heʻeku kei siʻí ʻa e taimi naʻe mālōlō ai ʻeku tamaí. Naʻá ku taʻu fitu.
Naʻá ku maʻu ha faʻē lelei mo ha ngaahi kui angaʻofa. Ka naʻe faʻa lahi ʻeku tangí. Naʻe fakakata ʻaki au ʻe hoku kaungā-akó ʻi he akó koeʻuhí he naʻe ʻikai ke u lava ʻo sipela pe poto he fiká. Naʻe fakamamahiʻi au ʻe ha niʻihi ʻo e fānau lalahi angé ʻi he pasi akó. Naʻá ku fakaʻamu naʻe ʻi ai haku ngaahi talēniti ʻo hangē ko e niʻihi ne sipoti pe hiva leleí.
Hili ha taimi siʻi, naʻe kamata ke u ongoʻi fiemālie ange. Naʻe ʻofaʻi mo tokoniʻi au ʻe hoku fāmilí. Naʻe hoko atu pē ʻeku ngāué, pea naʻe māmālie pē ʻeku fakalakalaka ʻi he akó. Naʻá ku toe maʻu foki mo ha ngaahi meʻa naʻá ku sai ai. Naʻá ku ngāue ke u hoko ʻo lelei ange ʻi he ngaahi meʻa ko iá. Naʻe tokoniʻi au ʻe he Tamai Hēvaní.
ʻI heʻetau tupu haké, ʻoku tau fehangahangai kotoa pē mo ha ngaahi faingataʻa. ʻOku ʻi ai ha niʻihi ʻo kitautolu ʻoku puke pe faingataʻaʻia fakaesino. ʻOku masiva ha niʻihi pea ʻikai ke nau lava ʻo maʻu ha tokoni fakafaitoʻo pe ako lelei. ʻOku ngaohi koviʻi ha niʻihi koeʻuhí ko e lanu honau kilí pe ko e feituʻu ʻoku nau haʻu mei aí.
Te ke lava fēfē ʻo ikunaʻi hoʻo ngaahi faingataʻaʻiá?
-
Falala ki he Tamai Hēvaní. Mahalo te tau ongoʻi loto-foʻi he taimi ʻe niʻihi, ka kuo pau ke tau falala kiate Ia. ʻOkú Ne ʻofa Heʻene fānaú pea kuó Ne talaʻofa ke tāpuakiʻi kitautolu.
-
Feinga pē. Kuo akoʻi kitautolu ʻe he ʻEikí, ʻoku kehekehe ʻetau ngaahi meʻafoakí. Te tau lava ʻo ʻiloʻi ʻetau ngaahi meʻafoakí. Te tau lava leva ʻo fakaʻaongaʻi kinautolu ke fakaleleiʻi ʻaki ʻetau moʻuí mo tokoniʻi e niʻihi kehé.
ʻE tatau ai pē pe ko e hā e lahi ʻo e fakapoʻulí ʻi he tō ʻa e laʻaá, ka ʻe maama ange maʻu pē ia ʻi he hopo hake ʻa e laʻaá. ʻOku hoko moʻoni ia ʻi heʻetau moʻuí. Kapau ʻoku tāpuni ha hala ʻe taha, te tau lava ʻo fekumi ki ha hala kehe. Kapau ʻoku ngali fuʻu faingataʻa ke fai ha meʻa, ʻe lava ke tau laka atu ki muʻa ʻo tupulaki ki ai.
ʻOku ou palōmesi atu ʻe tokoniʻi koe ʻe he Tamai Hēvaní ke ke ikunaʻi ho ngaahi faingataʻaʻiá. ʻOkú Ne ʻofa ʻiate koe pea te Ne tokoniʻi koe ke ke aʻusia ʻa e tuʻunga ʻokú Ne finangalo ke ke aʻusiá.
Te u Lava ʻoIkunaʻi e Ngaahi Faingataʻá.
Tā fakatātā ʻa Alyssa Petersen