Ko e Vaʻinga Pauʻu he Pasikalá
Naʻe talaange ʻe hono ngaahi kaungāmeʻá ʻe maʻu ai e fiefiá. Ka naʻe ʻikai ke pehē ia.
Naʻe ʻaka ʻe Samu ʻene pasikalá ʻi he vave taha naʻá ne lavá ki ʻolunga he foʻi tafungofungá. Naʻá ne falala atu ki muʻa. Naʻe mālohi e puhi mai ʻa e ʻeá ʻi hono louʻulú. Naʻe ʻaka pasikala hake hono kaungāmeʻa ko Liamí ʻi hono tafaʻakí.
“ʻOkú ke helaʻia?” Ko Liami ange ia.
“ʻIkai ʻAupito!” Ko Samu ange ia.
Naʻe ʻosi ʻi he paʻaké honau kaungāmeʻa ko ʻĒlikí ʻi he tumutumu ʻo e tafungofungá.
“Komm schon! Naʻá ne kaila mai, “Haʻu!”
Naʻe aʻu atu ʻa Samu mo Liami ki he tumutumu ʻo e tafungofungá. Naʻe tau ʻe he tamaiki tangatá ʻenau pasikalá pea nau tangutu ʻi ha lalo ʻakau.
Naʻe toʻo hake ʻe Liami ha foʻi maka ʻo tolongi. “ʻOku ou taʻeoliʻia.” Naʻe ʻikai lahi ha ngaahi feituʻu ʻi honau kiʻi koló ʻi Suisalani ke nau ʻeva ki ai.
Ne pehē atu ʻa ʻĒliki, “Mo au pē.” Naʻá ne vaku e kelekelé ʻaki ha vaʻakau.
Naʻe talaange ʻe Samu, “ʻE lava ke hoko atu ʻetau heka pasikalá.”
Naʻe taʻefiemālie ʻa Liami. “Ko e meʻa pē ia ʻoku tau faʻa faí.”
“Tau fai ha meʻa fakaoli!” Ko ʻĒliki ange ia. Naʻá ne puna ki ʻolunga ʻo lue atu ki he tauʻanga pasikalá, ʻa ia ne tau ai ha ngaahi pasikala lahi. Naʻe muimui atu ʻa Samu mo Liami ʻiate ia.
Naʻe ongoʻi ilifia ʻa Samu. ʻOku ʻi ai e taimi ʻe niʻihi naʻe ʻikai fakaoli ki ai e meʻa ʻoku fakakaukau ʻa ʻĒliki mo Liami ʻoku fakaolí. Naʻe saiʻia ʻa ʻĒliki mo Liami ke fakamataliliʻi e fānau kehé mo lea taʻe fakaʻapaʻapa ʻi he kalasí. Kae mahalo ʻe kehe ʻa e taimi ko ʻení.
ʻIkai ngata aí, naʻe ʻikai ke tokolahi ha tamaiki tangata ʻi he kalasi ʻa Samú. Kapau naʻe ʻikai ke ne kaungāmeʻa mo ʻĒliki mo Liami, ko hai ʻe kaungāmeʻa mo iá?
Naʻe fanafana ange ʻa ʻĒliki, “Ta toʻo ʻa e taliefú mei he ngaahi vaʻé kotoa.” “Te tau lava ʻo fūfuuʻi ia he fuʻu veʻe ʻakaú.” Naʻá ne tūʻulutui hifo ʻi ha pasikala ngingila lanu kulokula ʻo mioʻi ha kiʻi taliefu pelesitiki mei he taha ʻo e ngaahi vaʻé.
Naʻe kata ʻa Liami. “Ko ia! ʻE fakaoli ʻaupito ia.”
Naʻe māpuhoi ʻa Samu. ʻOua. Naʻe ʻikai ke toe makehe ʻa e taimi ia ko ʻení. Naʻá ne pehē ange, “ʻOku ʻikai ke u ʻiloʻi.” “Mahalo pē ʻoku totonu ke tau ʻalu.”
Naʻe tekelele ʻe ʻĒliki e nima ʻo Samú. Naʻá ne pehē mai, “ʻOua, ʻai foki!”. “ʻOku ʻikai ke ʻi ai ha taha ia ʻe sio mai.”
Naʻe pehē ange ʻe Liami, “Ko e fanga kiʻi kongokonga iiki pē ia.” “He ʻikai fakatokangaʻi ʻe ha taha ʻene pulí.”
Naʻe feinga ʻa Samu ke tukunoaʻi ʻene ongoʻi ilifiá. He ʻikai maumau ʻa e pasikalá ʻi hono toʻo ʻo e ngaahi taliefú. Naʻá ne veiveiua pea kamokamo pē.
Naʻe toʻo fakavavevave ʻe he tamaiki tangata ʻe toko tolú ʻa e ngaahi taliefu kotoa ʻo e vaʻe pasikalá pea nau lele ki he fuʻu ʻakaú. Naʻa nau fūfuuʻi kotoa e ngaahi taliefú ʻi ha lalo maka pea nau tangutu ki lalo ke siofi e ngaahi pasikalá. Naʻe makiʻikiʻi ʻa Liami mo ʻĒliki.
Ne ʻikai fuoloa kuo lue hake ha tangata, toʻo e loka ʻene pasikalá pea heka ki ai.
“Sio? Naʻe pehē ange ʻe Liami, “Naʻe ʻikai ke ne fakatokangaʻi ʻe ia.”
Ne fakakaukau ʻa Samu, ka naʻá ku ʻilo ʻe au .
ʻI he kotoa ʻo e ʻahó, naʻe tuku maʻu pē e fakakaukau ʻa Samú ʻi he ngaahi taliefú. Naʻá ne fakaʻamu te ne lava ʻo fakafoki kinautolu, ka naʻe ʻikai ke ne ʻilo e feituʻu ʻoku nofo ai e niʻihi ʻoku ʻanautolu e ngaahi pasikalá. Naʻá ne tūʻulutui ʻo fakahā ia ki he Tamai Hēvaní.
Naʻe pehē ange ʻe Samu, “ʻOku ou ongoʻi loto tautea.” “Pehē ange mai ne ʻikai ke u fai ia. Tamai Hēvani fakamolemoleʻi muʻa au.”
ʻI he ʻaho hono hokó, naʻe toe heka pasikala ʻa Samu mo hono ongo kaungāmeʻá ki he paʻaké.
Naʻe toe pehē ange ʻe ʻĒliki, “Tau toʻo e taliefú!”
Naʻe toe loto ki ai ʻa Liami.
Naʻe manatuʻi ʻe Samu ʻene lotú. ʻI he taimi ko ʻení, naʻá ne kiʻi ongoʻi loto-toʻa ange.
Naʻá ne pehē ange, “ʻOku ʻikai ke u tui ʻoku totonu ke tau fai ia.”
“He ko e hā?” Naʻe lea ʻita mai ʻa Liami. “Naʻe ʻikai ke fakatokangaʻi ia ʻe ha taha ʻaneafi.”
Naʻe talaange ʻe Samu, “He ʻikai ke u fie maʻu ʻe au ha taha ke ne fai ha meʻa pehē ki heʻeku pasikalá.”. Kimuʻa pea lea mai ha tahá, naʻá ne heka ki heʻene pasikalá. Naʻá ne kaila, “Tau lova ki he fale taʻo maá!”. Naʻe kamata leva ke ne ʻaka ʻi he vave taha naʻá ne lavá.
Naʻe toʻo mai foki ʻe ʻĒliki mo Liami ʻena pasikalá.
“ʻOku ʻikai totonu ia! Naʻá ke ʻuluaki lele koe,” ko e kaila atu ia ʻa Liamí
Naʻe malimali ʻa Samu ʻi he tuli atu hono ongo kaungāmeʻá. Naʻá ne fanafana ʻo fakamālō ki he Tamai Hēvaní. Naʻá ne ongoʻi fiemālie ange ai.
Tā fakatātā ʻa Shane Clester