Maʻu ʻa e Nongá
“Kātaki ʻo tokoni mai ke ʻoua te u ongoʻi taʻelata.”
Naʻe feinga ʻa Moli ke ʻoua ʻe tangi ʻi heʻene lea fakamāvae ki hono tokoua ko Meisí. “ʻOku ou ʻofa atu!” Ko Moli ange ia. Naʻá ne fāʻofua kia Meisi.
Naʻe pehē ange ʻe Meisi, “Te u fesiofaki mo koe ʻi ha ngaahi māhina siʻi.” Naʻe mavahe ʻa Meisi mei ʻapi ke ʻalu ki he ʻunivēsití he taimí ni. Naʻe ʻosi mavahe ha taha ʻo e ngaahi tuongaʻane ʻo Molí ki he kolisí. Naʻe lolotonga ngāue fakafaifekau hono tuongaʻane ʻe tahá. ʻE ʻofa lahi ʻa Moli kiate kinautolu kotoa!
Naʻe kuku ʻe Mami e nima ʻo Molí. Naʻa nau sio pē kae fakaʻuli atu ʻa Meisi. Naʻe pehē ange ʻe Mami, “Te tau ʻofa kiate ia.” Ne loʻimataʻia hono fofongá.
Naʻe lue ʻa Moli ʻo foki ki fale. Naʻá ne ʻalu ki he loki mohe ʻo Meisí pea ne tāpuniʻi e matapaá. Naʻá ne tangutu leva ʻi he mohenga ʻo Meisí ʻo kamata ke tangi.
Naʻe tukituki mai ha taha ʻi he matapaá. Naʻe hū mai ʻa Mami mo Teti. Naʻá na fāʻofua kia Moli. Naʻa nau tangutu kotoa ʻi he mohenga ʻo Meisí kae ʻoua kuo ʻosi e tangi ʻa Molí.
Naʻe pehē ange ʻe Teti, “ʻOku ou ʻiloʻi ʻokú ke loto mamahi he mavahe ʻa Meisí.”. Fēfē kapau te tau lotu fakafāmili? Te tau lava ʻo kole ki he Tamai Hēvaní ke tokoniʻi kitautolu ke tau ongoʻi sai ange. Te ke lava Moli ʻo fai e lotú?”
“Sai.” Naʻe punou e ʻulu ʻo Molí. “Tamai Hēvani, ʻoku mau fakamālō atu ki he taha kotoa pē ʻi homau fāmilí—Vili, Paaka, Meisi, koau, pea mo Mami mo Teti. ʻOku mau fakamālō ki hoʻo ʻAfió ʻi heʻemau lava ʻo hoko ko ha fāmili taʻengatá. Kātaki ʻo tokoni mai ke mau ongoʻi fiemālie. Pea tokoniʻi au ke ʻoua te u fuʻu ongoʻi taʻelata.”
Naʻe ongoʻi ʻaupito ʻe Moli ʻene pōtalanoa mo Meisi he taimi mohé. Ka naʻá ne ʻiloʻi naʻe fanongo ʻa e Tamai Hēvaní ki heʻene ngaahi lotú. Naʻá ne ʻiloʻi te Ne tokoniʻi ia ke ne ongoʻi fiemālie ange.
ʻI he pongipongi hono hokó, naʻe fuʻu lōngonoa ʻaupito ʻa e ʻapi ʻo Molí! Naʻá ne ongoʻi e kakata mo Meisi ʻi heʻena teuteu ki he akó. Naʻá ne ongoʻi e kai pongipongí mo ʻena faʻa pōtalanoá. Naʻe faʻa talanoa ʻe Meisi he taimi ʻe niʻihi kau ki he meʻa naʻá ne ako he seminelí. Naʻe ongoʻi nonga maʻu pē ʻa Moli ʻi he taimi naʻá na talanoa ai fekauʻaki mo e ongoongoleleí.
Ko e meʻá ia! Naʻe maʻu ʻe Moli ha foʻi fakakaukau.
Naʻe teuteu ʻa Moli ki he akó. Naʻá ne ʻalu kia Mami.
“Mālō e lelei, ʻofaʻanga” Naʻe fāʻofua ki ai ʻene Mamí. “ʻOkú ke maau ki he akó?”
“ʻE lava nai ke ta lau fakataha ha lea konifelenisi kimuʻa peá u ʻalú?” Ko e kole ia ʻa Molí. “ʻOku ou tui ʻe tokoni ia ke u ongoʻi sai ange.”
Naʻe malimali ʻa Mami. “Ko ha fakakaukau fakaʻofoʻofa ia.”
Naʻá na taufetongi ʻi hono lau ha lea ʻi he konifelenisi lahí fekauʻaki mo e fakafiemālié. Naʻe saiʻia ʻa Moli he feohi mo Mamí. Naʻe ongo fakafiefia heʻena lau fakataha e leá.
Naʻe malimali ʻa Moli he ʻosi ʻena laú. “Ta toe fai ʻeni!”
Naʻá ne kei ʻofa pē kia Meisi, Vili, mo Paaka. Ka naʻe siʻisiʻi ange ʻene ongoʻi taʻelatá. Naʻe tali ʻene lotú! ʻE lava ke ne feohi mo ʻene faʻeé mo e tamaí. Pea ʻe lava ke tokoniʻi ia ʻe he ngaahi lea ʻa e kau palōfitá ke ne maʻu ha nonga.
Tā fakatātā ʻa Liz Brizzi