Kau Paionia ʻi he Fonua Kotoa Pē
Piano ʻa Ludovic
Naʻe fiefia ʻa Ludovic ke ngāue maʻá e Tamai Hēvaní.
Naʻe toʻo hake ʻe Ludovic ha ʻū sea pelu ʻo fetuku kinautolu ki he kauhala ʻe tahá. Ko e ʻaho Sāpate ʻeni, pea ʻe vavé ni pē ha kamata ʻa e lotú. Naʻe ʻikai ha sea feʻunga ʻi he fale naʻa nau maʻu lotu ai ʻi Tokó. Ko ia naʻe ʻomi maʻu pē ʻe Ludovic ha ʻū sea mei he ʻapi ʻo ʻene kui tangatá.
Naʻe ui mai ha taha kiate ia, “Ko e hā te ke tuku ai ha siasi lelei ka ke ʻalu ki ha kiʻi fale siʻisiʻi?” Naʻe kata pē mo pehē mai ha taha, “ʻOku ʻikai ha sea ʻi homou siasí!”.
Naʻe ʻikai ke tokanga atu ʻa Ludovic ia ki ai. Naʻá ne fakakaukau, Kuo pau pē ke hokohoko atu ʻeku fai e meʻa ʻoku totonú.
Naʻe fuofua ʻilo ʻe Ludovic he Siasí ʻi hono taʻu 10. Naʻá ne taʻu 12 he taimí ni. Naʻe toki papitaisó ni pē mo hono fāmilí. Naʻá ne maʻu ʻa e lakanga fakataulaʻeikí mo tokoni ʻi hono tufa ʻo e sākalamēnití. Naʻá ne fakahaofi ha niʻihi ʻo ʻene paʻanga kai hoʻataá ke fakatau ʻaki ha mā ki he sākalamēnití ʻi he uike kotoa pē. Naʻe fiefia ʻa Ludovic ke ngāue maʻá e Tamai Hēvaní.
Naʻe fonu e kiʻi lokí ʻi he taimi ke kamata ai ʻa e lotú. Naʻe tangutu ha kakai ʻe niʻihi ʻi he sea naʻe ʻomi ʻe Ludovic. Naʻe tuʻu mo ha kakai kehe.
Naʻe kamata ʻaki ʻa e fakatahá ha foʻi hiva. Ne hiva ʻa Ludovic, “ʻIsileli, ʻIsileli, ʻOku Ui ʻa e ʻOtuá.” Naʻá ne manako ke hiva ʻi he lotú.
Hili e lotú, naʻe ngūngū pē ʻa Ludovic ʻi heʻene fakafoki e ʻū seá. Naʻe ngūngū ʻi he lolotonga ʻene lue ki ʻapí. Ne fakafokifā haʻane maʻu ha foʻi fakakaukau! Naʻá ne toʻo hake ʻene kīpooti tā piano meʻa-vaʻingá. Mahalo te ne lava ʻo fakakaukauʻi e founga ke tā ai ʻa e “ʻIsileli, ʻIsileli, ʻOku Ui ʻa e ʻOtuá”!
Naʻe ngūnguuʻi ʻe Ludovic ʻa e ngaahi notá pea tā ha ngaahi kī kehekehe kae ʻoua kuó ne maʻu totonu ia. Naʻe ʻikai fuoloa kuó ne ako ke ne tā e foʻi hivá kakato.
Naʻá ne manatuʻi hake naʻe hiki ʻe hono fāmilí ha ngaahi himi ʻa e Siasí. Naʻá ne fanongo kiate kinautolu mo ako ke tā foki mo ha ngaahi hiva kehe. Ne toutou akoako pē ʻa Ludovic.
“Ko e hā ʻoku ʻikai ke ke tā ai e pianó ʻi he lotú lolotonga ʻetau hivá?” Ko e fehuʻi ange ia e tamai ʻa Ludovic ʻi ha ʻaho ʻe taha.
Naʻe ongoʻi lotosiʻi ʻa Ludovic. Naʻá ne pehē ange, “ʻOku ou fuʻu mā ʻaupito.” “ʻE fēfē kapau ʻe hala ʻeku tā pianó?”
Naʻe talaange ʻe heʻene Tangataʻeikí, “Hoko atu pē hoʻo taá.” “Oku lelei ange hoʻo tā pianó ʻi he tuʻunga ʻokú ke fakakaukau ki aí.”
ʻI he Sāpate hono hokó, naʻe ʻikai ke ʻave pē ʻe Ludovic ʻa e ʻū seá. Naʻá ne ʻave foki mo ʻene kīpooti meʻa vaʻingá ki he lotú. ʻI he hokosia e taimi ke fai ai e fua hivá, naʻá ne manavasiʻi pē mo hili hono nimá ki he ngaahi kií. Naʻe kamata leva ke ne tā. Naʻe hiva fakataha ʻa e tokotaha kotoa pē. Pea naʻe ongo lelei ʻaupito!
Hili iá naʻe tā piano ʻa Ludovic ʻi he lotú he Sāpate kotoa pē. Taimi ʻe niʻihi naʻe faʻa hala ʻene taá. Ka na‘e ‘ikai ke tuku ai ʻene taá. ʻI he taimi naʻe fuʻu faingataʻa ai ʻa e hivá ki hono taá, naʻa nau hiva taʻe kau ai ʻa e pianó, pea naʻe tataki ʻe Ludovic ʻa e hivá.
Naʻe malimali ʻa Ludovic. Naʻe ʻikai tokanga ia ki heʻenau maʻu lotu ʻi he ʻapi ʻo ha tokotaha. Naʻe ʻikai tokanga ki hono fakakata ʻaki ia ʻe he kakaí. Ko e meʻa naʻe mahuʻingá ko hono fakaʻaongaʻi ʻe Ludovic hono ngaahi talēnití ke tauhi ki he ʻOtuá.
Ko ha kiʻi fonua siʻisiʻi ʻa Toko ʻi he fakahihifo ʻo ʻAfiliká.
ʻI he ʻaho ní, ʻoku ʻi ai ha uooti mo e kolo ʻe 21 ai.
Ko e lea fakafonua fakaʻofisiale ʻa Tokó ko e lea faka-Falaniseé.
Naʻe akoʻi ʻe ha faifekau ʻa Ludovic ki hono lau e mūsiká ke ne lava ʻo tā piano lelei ange.
Kuo fuʻu lahi ʻa Ludovic he taimí ni. ʻOkú ne fakatou manako mo hono uaifi ko Benedict ʻi he mūsiká.
ʻOku ʻi ai ha piano moʻoni ʻa Ludovic ʻi ʻapi pea ʻokú ne tā ʻa e ʻōkaní ʻi he lotú.
Ngaahi tā fakatātā ʻa Caroline Garcia