Keke mo e Angaʻofa
ʻE angaʻofa fēfē ʻa Suli ki hono mehikitangá kapau ʻoku ʻikai ke ne faʻa lava ʻo talanoa?
Naʻe tangutu ʻa Suli mo hono kaungāmeʻa ko Selá ʻi he loki kai ʻi he akó.
Naʻe pehē ange ʻe Suli, “ʻOku ou hohaʻa he teu foki ki ʻapi ʻo sio ki heʻeku tía.”.
“Ko hoʻo tía?” Ko e fehuʻi ange ia ʻa Selá.
“ʻIo, ko e tokoua ʻeku faʻeé. Tía Jenny,“ ko Suli ange ia. “ʻOkú ne kiʻi ʻaʻahi fakataimi mai. Pea ʻoku ʻikai ke u tui ʻokú ne fuʻu saiʻia ʻiate au. ʻOku fuʻu fakapōpula, pea ʻoku ʻikai ke ne teitei malimali. ʻO aʻu ki he taimi ʻoku ou malimali ai kiate iá. “ʻOku ʻikai ke u loto ke fakamamahiʻi ia.”
Pehē ange ʻe Sela, “Koloa pē ke ke malimali koe.” “ʻOku tokoni maʻu pē ʻa e angaleleí.”
ʻI hono kotoa ʻo e ʻahó naʻe fakakaukau ʻa Suli ki he meʻa naʻe lea ʻaki ʻe Selá.
Naʻá ne fakakaukau ʻo pehē, Mahalo ʻe lava pē ke u angalelei ange kia Tía Jenny . Ko e meʻa ia naʻe mei fai ʻe Sīsuú. Ka naʻe lea faka-Sipeini pē ʻa Tía Jenny. Naʻe mahino pē kia Suli ha niʻihi ʻo e ngaahi lea faka-Sipeiní, ka naʻe ʻikai ke ne ʻilo kanokato ki he leá. ʻE angaʻofa fēfē ʻa Suli ki hono mehikitangá kapau ʻoku ʻikai ke ne faʻa lava ʻo talanoa mo ia?
Naʻe talaange maʻu pē ʻe he Fineʻeikí ke ne kātakiʻi e kakai ʻoku ʻikai ke mahino kiate iá. Naʻe lotu fakalongolongo ʻa Suli. Tamai Hēvani, kātaki muʻa ʻo tokoni mai ke u faʻa kātakiʻi ʻa Tía Jenny. Pea tokoniʻi au ke u loto-toʻa ke talanoa mo ia ʻi he lea faka-Sipeiní.
ʻI he aʻu ʻa Suli ki ʻapi mei he akó, naʻá ne sio ki ha kaati he tēpilé. Naʻá ne toʻo hake ia. Ko e tohi maʻá e Fineʻeikí mo e Tangataʻeikí. Naʻá ne fakakaukau ʻOiauē ʻikai! Ko e ʻaho ní ʻoku fakamanatua ai hona ʻahó. Naʻe ngalo ʻaupito ia ʻiate au!
Naʻe fie fai ʻe Suli ha meʻa lelei ki heʻene Tamaí mo e Faʻeé. Ka naʻe ʻikai ke ne ʻiloʻi e meʻa ke faí.
Naʻá ne sio atu kia Tía Jenny ʻokú ne sio takai holo he peitó.
“ʻʻEi … todo bien (ʻoku lelei e meʻa kotoa)?” Ko e fehuʻi ange ia ʻa Sulií. “ʻOku lelei pē meʻa kotoa?”
Naʻe pehē ange ʻe Tía Jenny, “ʻIo.” Pea ne lea vave ʻi he lea faka-Sipeiní. Naʻe fanongo ʻa Suli ki heʻene fehuʻi ange pe naʻá ne ocupada—femoʻuekina.
“ʻIkai, yo no … ocupada. Naʻe talaange ʻe Suli, “ʻOku ʻikai ke u femoʻuekina au.” Naʻá ne ongoʻi mā ʻi he ʻikai ke ne fuʻu poto he lea faka-Sipeiní. Ka naʻe malimali ʻa Tía Jenny. Naʻá ne lea māmālie ange ke lava ʻo mahino kia Suli. Naʻá ne talaange ʻokú ne loto ke taʻo ha foʻi keke ki hono fakamanatua ʻo e Fineʻeikí mo e Tangataʻeikí, ka naʻá ne fie maʻu ha tokoni.
“Te u tokoni atu!” Ko Suli ange ia. “Vamos! Ta ō leva.” Ko hono faingamālie ʻeni ke ngaohi ai ha meʻa maʻa Mami mo Teti! Pea ke maheni mo hono mehikitangá.
Naʻe ʻalu ʻa Tía Jenny mo Suli ki peito. Naʻá na fakaʻaongaʻi e ngaahi fakaʻilonga nima mo e lea faka-Sipeini faingofua ki heʻena talanoá. Naʻe fakaʻaliʻali ange ʻe Tía Jenny kia Suli ʻa e founga ke ngaohi ai ha foʻi keke sokoleti-vanila. Naʻe tokoni ʻa Suli ke fua e mahoaʻá mo e suká. Naʻá ne toe tuʻutuʻu foki mo e sitoapeuli ʻe ʻai he tumutumu ʻo e foʻi keké. Ne ʻikai hano taimi kuo taʻo e foʻi keké ʻi he ʻōvaní. Naʻe nanamu ifo!
Naʻe fakakaukau ʻa Suli. Naʻe fakalata ʻaupito ia. Ka ʻi heʻene fakamaʻa e peitó, naʻá ne tau ʻi ha foʻi fuaʻimoa ʻe tolu he funga kānitá. Naʻá nau tō ʻo mafahi pea lanu engeenga mo toe ʻuli e falikí.
Naʻe sio tailiili ʻa Suli kia Tía Jenny. Te ne ʻita nai?
Ka naʻe kata pē ʻa Tía Jenny. Naʻá ne pehē ange,“Qué desorden!”. (“Toki meʻa fakavevea moʻoni!”)
Naʻe teʻeki ke sio ʻa Suli ia ʻoku kata ʻa Tía Jenny. Naʻá ne kata foki mo ia. Naʻá na fakamaʻa fakataha ʻa e meʻa naʻe mahuá.
ʻI he aʻu atu ʻa e Fineʻeikí mo e Tangataʻeikí ki ʻapí, kuo ʻosi moho e foʻi keké. “ʻOfa ke mo maʻu ha ʻaho fakamanatu fiefia!” Ko Suli ange ia.
“Mālō ʻaupito! ʻOku ngali ifo ʻeni. Naʻá ke ngaahi tokotaha pē ʻeni?” Ko e fehuʻi ange ia ʻa Mamí.
Naʻe pehē ange ʻe Suli, “ʻIkai, naʻá ma ngāue fakataha mo Tía Jenny.” Naʻá ne malimali kia Tía Jenny. Pea ʻi he taimi ko ʻení, naʻe toe malimali mai foki mo Tía Jenny!
Naʻe ongoʻi loto māfana ʻa Suli. Naʻá ne fiefia ʻi hono tali ʻe he Tamai Hēvaní ʻene lotú.
Ngaahi tā fakatātā ʻa Malgosia Piatkowska