Usa ka Tahas nga Buhaton
“Aduna akoy espesyal nga tahas alang kanimo,” miingon si Sister Fox.
Ang mga bata sa klase ni Capri pirmeng mag-istorya. Ganahan silang mag-istoryahanay sa usag usa mahitungod sa ilang semana. Ganahan silang motubag sa mga pangutana sa leksiyon.
Apan dili si Capri. Dili siya makasulti. Aduna siyay kakulangan nga mihimong lisod sa pagsulti.
Usa ka Domingo, si Sister Fox adunay makapahinam nga balita. “Umaabot na ang programa sa Primary,” miingon siya. “Ang matag usa kaninyo adunay usa ka tahas.”
Si Sister Fox mihatag og mga piraso sa papel ngadto sa ubang mga bata. Ang matag papel adunay linya nga ilang isulti. Apan si Capri dili makalitok sa mga pulong. Unsaon man nga maanaa siyay tahas sa programa?
“Aduna akoy espesyal nga tahas alang kanimo,” gisultihan ni Sister Fox si Capri. Gipakita niya ang usa ka gamay nga kahon. Kini adunay gamay nga gunitanan nga misiwil sa usa ka kilid. “Tan-awa ni.” Gipatuyok ni Sister Fox ang gunitanan og balik-balik. Mitukar ang malumo nga musika gikan sa kahon.
Gipakpak ni Capri ang iyang mga kamot. Nakahibalo siya niana nga awit!
Mipahiyom si Sister Fox. “Dia, ikaw sulay.” Gitabangan niya si Capri sa pagtuyok sa gamay nga gunitanan. Mitukar ang musika. Sama kini sa madyik!
“Mahimo ba nimong ipatukar kini nga awit alang kanamo sa programa sa Primary?” Nangutana si Sister Fox. Mitando si Capri. Malipayon siya nga adunay tahas.
Sa wala madugay adlaw na sa programa. Tagsa-tagsa, ang matag bata milakaw paingon ngadto sa atuban aron mosulti sa ilang bahin.
“Ang Dios nahigugma kanato,” miingon si Allie.
“Ang Dios mao ang atong Langitnong Amahan,” miingon si Zac.
Dayon turno na ni Capri. Misaka siya ngadto sa atubangan. Dayon gipatuyok niya ang gamay nga gunitanan sa kahon. Mitukar ang malumo nga musika. Naghunahuna si Capri bahin sa mga pulong sa awit samtang nagpatukar siya.
Ako anak sa Dios,
Gipadala dinhi,
Panimalay, ginikanan
Ako gihatagan.
Gitan-aw ni Capri ang tanang tawo. Nagpahiyom sila kaniya.
Sa kataposan sa programa, namulong ang bishop. “Mipaambit ang matag bata sa ilang pagpamatuod karon,” miingon siya. “Tinuod ang unsay ilang gipaambit. Kitang tanan mga anak sa Dios.”
Mibati si Capri nga mainiton sa iyang kasingkasing. Nasayod siya nga husto ang bishop. Siya usa ka anak sa Dios. Ug siya adunay importante nga tahas nga buhaton.
Mga paghulagway pinaagi ni Conner Gillette