Imong Sinulat
Lakaw Tupari Siya
Sierra F., edad 12, Utah, USA
Usa ka adlaw didto sa eskwelahan, nakadungog ko nga gidaogdaog ang usa ka batang lalaki. Naguol ko. Kinahanglan walay bisan kinsa nga matratar niana nga paagi.
Sa ulahing bahin nianang adlawa, ang among grade adunay usa ka party. Ang batang lalaki nga gidaogdaog ganina miabot sa party ug milingkod nga nag-inusara. Sa dihang nakit-an nako siya, nakahinumdom ko sa unsay nahitabo. Nakadungog ko og tingog nga nagsulti kanako nga tuparan siya. Apan dili ko gusto nga ako lamang ang motupad kaniya. Mamaayo ra siya, naghunahuna ko. Wala siya nagkinahanglan og usa ka tawo nga motupad kaniya. Gibalewala ra nako ang pagbati.
Ang tingog miabot nganhi kanako pag-usab, nga mas kusog. Lakaw tupari siya.
Gitan-aw nako ang batang lalaki. Makita siya nga nag-inusara ug magul-anon. OK, naghunahuna ako. Sa dihang mitupad ako kaniya, ingon og dili siya komportable. Gisultihan nako siya sa akong ngalan ug gipangutana siya mahitungod sa iyang kaugalingon. Sa sinugdanan, gikulbaan ko. Apan samtang nag-istoryahanay mi, mibati ako nga malinawon. Ug dili na siya makita nga nag-inusara o magul-anon.
Sa dihang kinahanglan na siya mobalik sa klase, miingon ko nga makig-istorya ko niya unya. Mipahiyom siya og gamay ug miingon OK. Ang akong magtutudlo miduol kanako ug miingon, “Salamat, Sierra. Mabination kaayo kadto.” Mitando lang ako.
Ang nahibilin sa adlaw daling milabay, apan kana nga malinawon nga pagbati wala mawagtang. Nasayod ako nga gibuhat nako ang husto. Usahay dili tratohon og sakto ang mga tawo kon lahi sila. Dili ko ganahan niini, apan mahitabo kini.
Kitang tanan anak sa Dios. Kinahanglang itratar nato ang uban sa mabination nga paagi. Kon buhaton nato kini, nasayod ako nga ang Dios mopanalangin kanato.
Paghulagway pinaagi ni Kristin Sorra