Mga Pioneer sa Matag Yuta
Nahimamat ni Harriet ang mga Misyonaryo
Makauban ba kaha niya pag-usab si Papa?
Gitutokan ni Harriet and hulagway ni Papa diha sa bungbong. Walo na ka bulan sukad siya namatay. Naghunahuna siya kon makakita pa ba kaha siya pag-usab kaniya. Gimingaw kaayo siya kaniya.
Tuk, tuk, tuk.
Giablihan ni Harriet ang pultahan sa ilang gamay nga apartment. Duha ka batan-ong lalaki ang nagbarog sa gawas.
“Guten Tag! Kumusta! Mga misyonaryo kami sa Ang Simbahan ni Jesukristo sa mga Santos sa Ulahing mga Adlaw. Ganahan kami nga makig-istorya sa imong pamilya mahitungod kang Jesukristo.”
Mipahiyom si Harriet. Dunay usa ka butang bahin sa unsay ilang gisulti ang mihimong nindot sa iyang pagbati. “Pangutan-on nako si Mutti (Mama).”
Nakit-an ni Harriet si Mutti. “Adunay mga misyonaryo sa pultahan,” miingon siya. “Gusto silang makig-istorya kanato mahitungod kang Jesus.”
Nagmug-ot si Mutti. “Sultihi sila nga wala kitay oras.”
“Apan ingon og buotan kaayo sila,” miingon si Harriet. “Kadiyot ra bitaw kini.”
Mipasiplat si Mutti sa orasan. “Sige. Pipila ka minuto lang ha.”
Misulod ang mga misyonaryo ug nakig-istorya kang Mutti, Harriet, ug sa igsoong babaye ni Harriet, si Carmen. Sila misulti kanila mahitungod kang Jesus ug sa usa ka basahon nga gitawag og das Buch Mormon, ang Basahon ni Mormon. Dayon gihatagan nila ang pamilya ni Harriet og kopya aron basahon.
“Tingali makabasa kami og pipila ka pahina,” miingon si Mutti, nga miabli sa basahon. Sulod sa misunod nga pipila ka adlaw, nagsige og basa si Mutti. Kusog niyang gibasa ang mga bahin ngadto kang Harriet ug Carmen.
Unta makabasa si Papa niini. Maganahan siya niini, naghunahuna si Harriet.
Sa dihang mibalik ang mga misyonaryo, nagtudlo sila kabahin sa plano sa Dios. “Nagpuyo kita uban sa Dios sa wala pa kita matawo. Mianhi kita sa kalibotan aron magkat-on ug mamahimong sama Kaniya. Sa dihang mamatay na kita, makauban nato Siya pag-usab.”
Si Papa kaha? Naghunahuna si Harriet.
Ang misyonaryo mitan-aw kang Harriet. “Tungod kay si Jesus namatay ug nabuhi pag-usab, makauban nato ang atong pamilya hangtod sa kahangtoran. Bisan sa mga minahal nga namatay na.”
Kalit nga mibati og paglaom si Harriet. Makauban niya si Papa pag-usab! Dako usab og pahiyom si Mutti—ang una sa dugay nang panahon.
Si Harriet, Mutti, ug Carmen nagpadayon sa pagkat-on gikan sa mga misyonaryo. Misimba sila. Nakahigala si Harriet og usa ka buotan nga batang lalaki nga ginganlan og Dieter.
Karon ang apartment ni Harriet ingon og adunay kalipay sa matag lawak. Sa wala madugay midesisyon si Harriet ug ang iyang pamilya nga magpabunyag.
Sa gabii sa dili pa ang ilang bunyag, miluhod si Harriet uban ni Mutti ug Carmen aron mag-ampo. “Langitnong Amahan,” miingon si Harriet, “mapasalamaton kaayo kami alang sa mga misyonaryo, sa ebanghelyo, ug sa among pamilya. Mahinamon na kami nga mabunyagan.”
Sa dihang gibuka ni Harriet ang iyang mga mata, gitan-aw niya ang hulagway ni Papa ug mipahiyom. Mahinamon na siya nga makita siya ugma damlag.
Adunay duha ka templo sa Germany.
Usa sa tulo ka bahin [one-third] sa Germany nalukop sa kakahoyan.
Ang Germany nakigbahin og utlanan sa siyam ka nasod.
Sa dihang midako na si Harriet, giminyoan niya ang buotan nga batang lalaki nga ginganlan og Dieter.
Si Dieter usa na karon sa Apostoles—Elder Dieter F. Uchtdorf!
Si Elder Uchtdorf miingon nga si Harriet mao ang “tinubdan sa kalipay sa [iyang] kinabuhi.”
Mga paghulagway pinaagi ni Giovanni Abeille