Maisog nga mga Higala
Kini nga istorya nahitabo sa USA.
Mibagting ang bagtinganan. Gibutang ni Molly ang iyang mga libro sa iyang bag. Nahuman na ang klase, ug mahinamon na kaayo siya alang sa kataposan sa semana!
“Hinumdomi nga mag-andam alang sa inyong mga report sa kasaysayan inig ka Lunes,” miingon si Mr. Miller. “Ayo-ayo sa inyong kataposan sa semana, class.”
Mitan-aw si Molly kang Anisha. Nagduko siya, ug daw nabalaka siya.
“Kumusta, Anisha,” miingon si Molly. “OK ra ka?”
Nanghupaw si Anisha. “Nahadlok kong mohatag sa akong report inig ka Lunes. Naningkamot gayod ko sa akong Iningles sukad nga mibalhin kami dinhi. Apan lisod alang nako ang paglitok sa mga pulong sa atong libro sa kasaysayan.”
Naghunahuna si Molly mahitungod niana. Lisod kaayo nga mobalhin sa laing nasod ug magkat-on og bag-o nga pinulongan.
“Makatabang ba kon dungan kitang magpraktis?” nangutana si Molly.
Mitando si Anisha. “Ganahan ko niana. Tingali mahimo kitang magtuon usab sa atong mga pulong sa bokabularyo.”
“Sige,” miingon si Molly. “Makatabang kana natong duha!”
Pagka Lunes sa buntag, mibarog si Mr. Miller sa atubangan sa klase. “Sugdan nato ang klase karon sa atong mga report.”
Milingi si Molly ug mipahiyom kang Anisha. Mipahiyom usab si Anisha, apan makita ni Molly ang kabalaka sa iyang mga mata.
Pipila ka ubang tawo ang mihatag sa ilang mga report. Dayon turno na ni Anisha. Miagik-ik ang mga tawo samtang milakaw siya padulong ngadto sa atubangan sa klase. Pipila kanila ang mitudlo kaniya ug naghinunghongay.
Miginhawa og lawom si Anisha. Nagkurog og gamay ang papel nga iyang gikuptan.
Hilom nga nag-ampo si Molly. Langitnong Amahan, palihog tabangi si Anisha nga maayo nga maka-report. Ug palihog tabangi ko nga masayod kon unsaon nako sa pagtabang kaniya.
Gihangyo sa magtutudlo ang mga estudyante nga hilom nga maminaw. Apan nakadungog gihapon si Molly og paghinunghongay. Sa dihang gisulayan sa paglitok ni Anisha ang lisod nga mga pulong, mikatawa ang pipila ka tawo. Gusto unta ni Molly nga mapahunong niya ang pag-agik-ik ug paghinunghongay sa mga bata. Giseguro niya nga mopahiyom sa higayon nga motan-aw si Anisha kaniya.
Sa dihang nahuman si Anisha, milakaw siya balik ngadto sa iyang lamesa. Nakakita si Molly og mga luha sa mga mata ni Anisha. Mihukdong si Anisha diha sa iyang lamesa.
Dayon turno na ni Molly. Milakaw siya paingon ngadto sa atubangan sa lawak. “Sa dili pa ko magsugod, gusto kong mosulti nga maayo kaayo si Anisha sa iyang report.”
Mihangad si Anisha.
“Pipila ka bulan pa lang siyang nagpuyo dinhi, ug maayo na kaayo siya sa Iningles. Naningkamot gayod siya ug wala siya moundang. Nanghinaot ko nga magmaisogon ako sama kaniya.”
Pagkahuman sa klase gikuha ni Molly ang iyang mga libro. Gusto siyang makig-istorya kang Anisha. Apan daghan sa ubang estudyante ang nagtapok na palibot kang Anisha. Nagsulti sila og nindot nga mga butang ngadto kaniya.
“Maayo ang imong report, Anisha!” miingon ang usa ka batang lalaki.
“Lisod kaayo litokon ang pipila sa mga ngalan sa mga tawo ug mga lugar!” miingon ang laing batang babaye.
Mipahiyom si Molly ug mihimo og laing hilom nga pag-ampo. Nagpasalamat siya sa Langitnong Amahan sa pagtabang kaniya nga magmaisogon sama kang Anisha.
Mga paghulagway pinaagi ni Zhen Liu