Higala ngadto sa Higala
Adunay Tawo nga Nagmahal Kanimo
Ni Sister Susan H. Porter
Unang Magtatambag sa Kinatibuk-ang Kapangulohan sa Primary
Padulong sa akong bag-ong trabaho, misugod ako sa pagkabalaka.
Unsa kaha kon dili ako ingon kamaayo? Naghunahuna ko samtang nagsakay ko sa bus. Unsa kaha kon maghunahuna sila nga dili ko makahimo og maayo nga trabaho?
Dayon diha koy usa ka klaro nga pagbati: Paningkamoti ang imong labing maayo. Bisan kon dili maayo ang dagan niini, adunay tawo nga nagmahal kanimo.
Naghunahuna ko mahitungod sa akong bana. Nasayod ko nga siya nagmahal kanako bisan kon ang akong trabaho dili maayo ang dagan. Ug dayon naghunahuna ko mahitungod ni Jesukristo. Nasayod ko nga Siya kanunayng nagmahal kanako. Mabati ko kini sa akong kasingkasing. Militok ko og yano nga pag-ampo nangayo sa Langitnong Amahan sa pagtabang kanako.
Sa pag-abot nako sa trabaho, gihimo nako ang akong labing maayo. Sa dihang nakahimo ako og sayop, mipadayon lang ko sa pagpaningkamot. Akong nahinumdoman nga adunay tawo nga nagmahal gihapon nako.
Si Jesus nahigugma usab kanimo! Kita nasayod nga si Jesus nagmahal sa mga bata tungod sa paagi nga Siya mitratar kanila. Usa ka adlaw ang ubang mga ginikanan midala sa ilang mga anak sa pagtan-aw ni Jesus. Apan ang mga disipulo miingon nga kinahanglan dili sila magsamok Kaniya.
Si Jesus wala mouyon. Siya miingon nga ang mga ginikanan kinahanglan motugot sa gagmayng mga bata sa pagduol ngadto Kaniya. Dayon “[I]yang gipangugos ang mga bata, gitapion ang iyang mga kamot kanila ug gipanalanginan [N]iya sila” (Marcos 10:16).
Hinumdumi kanunay nga si Jesus nagmahal kanimo. Ang Langitnong Amahan nagmahal usab kanimo. Nakaila Sila kanimo sa ngalan. Ganahan Silang mobutang kanimo diha sa Ilang mga bukton ug mopanalangin kanimo.
Bisan kon dili maayo ang dagan sa mga butang, padayon sa pagpaningkamot. Pag-ampo alang sa tabang ug buhata ang imong labing maayo. Hinumdumi, nga bisan unsa pay mahitabo, adunay tawo nga kanunayng nagmahal kanimo.
Paghulagway pinaagi ni Dani Jones