Pasko sa Pagkabanhaw sa tibuok Kalibotan

Sulayi kini nga mga tradisyon sa Pasko sa Pagkabanhaw sa tibuok kalibotan.

Mga Tabanog sa Pasko sa Pagkabanhaw

blue and yellow kite

Sa Bermuda, ang mga tawo magpalupad og mga tabanog sa dili pa ang Pasko sa Pagkabanhaw aron saulugon ang pagbangon ni Jesukristo gikan sa lubnganan. Makahimo ka og usa ka papel nga tabanog ug ibitay kini sa pagpahinumdom kanimo kang Jesus.

1. Paggunting og usa ka piraso nga papel sa porma nga diamon.

2. Pagbadlis og duha ka linya latas sa diamon aron masumpay ang tanang upat ka tulbok. Mahimo usab nimong papitlan og mga tukog sa ibabaw sa mga linya.

3. Sa sulod sa matag upat ka seksiyon, isulat ang mga rason nga imong gimahal si Jesukristo. Mahimo usab nimong koloran ang tabanog.

4. Itaod ang hilo ngadto sa ubos, ug ipapilit ang mga papel nga mga laso kon ganahan ka. Dayon ibitay ang imong tabanog.

Mga Karpet

brightly colored pattern

Sa El Salvador ug sa Guatemala, ang mga tawo magsaulog sa Pasko sa Pagkabanhaw pinaagi sa paghimo og mga karpet (mga nuog) diha sa mga kadalanan. Mogamit sila og mga ginabas, mga bulak, ug ubang butang sa paghimo og mabulokon [colorful] nga mga desinyo nga kon tan-awon mura og karpet. Ang mga karpet mao ang usa ka gasa ngadto ni Jesus.

Makahimo ka og imong kaugalingong karpet! Pagpintura og desinyo diha sa papel o paggamit og mga tanom ug tsok [chalk] aron maghimo og karpet sa gawas.

Pagpintura og Itlog

child coloring Easter eggs

Sa Australia, South Africa, Ukraine, ug sa daghan pang uban nga mga nasod, ang mga tawo magkolor og mga itlog sa pagsaulog sa Pasko sa Pagkabanhaw. Ang mga itlog mahimong usa ka simbolo sa pagkabanhaw ug bag-ong kinabuhi.

Uban sa tabang gikan sa usa ka hamtong, pagla-ga og pipila ka mga itlog. Human ang mga itlog mabugnaw, adornohi kini gamit ang mga marker, pintal, krayola, o tina.

Italian nga Pan sa Pasko sa Pagkabanhaw

round loaf of bread with colored egg in the middle

Sa Italy, ang mga tawo maghimo og pane di Pasqua (Pan sa Pasko sa Pagkabanhaw). Ang naglingin nga porma magpahinumdom kanila sa korona sa mga tunok nga gibutang sa mga sundalo diha sa ulo ni Jesus. Gamita kini nga resipe sa paghimo sa imong kaugalingong pan.

1. Isagol ang 2 1/4 ka kutsarita nga yeast, 1 1/4 sa kupa nga init-init nga gatas, 1 ka pudyot sa asin, 1/3 sa kupa sa humok nga mantikilya [butter], 2 ka itlog, ug 1/2 sa kupa nga asukar. Dayon idugang ang 3 1/2 sa kupa sa harina. Masaha og maayo. (kon ang minasa nga harina pilit ra kaayo, dugangi og diyutayng harina.)

2. Bahina ang minasa nga harina ngadto sa 12 ka binola. Ipaligid ang bola sa minasa nga harina ngadto sa 14-pulgada (35-cm) nga mga pisi.

3. Ilubid ang duha ka pisi, dayon isumpay ang mga tumoy aron makahimo og usa ka lingin. Paghimo og unom ka naglingin.

4. Ibutang ang mga liningin ngadto sa pangluto nga butanganan [baking sheet] nga binutangan og mantikilya ug tabuni og panapton. Pasagdi kini sulod sa usa ka oras.

5. Inita ang oven ngadto sa 350 F (170 C). Batila ang itlog gamit ang usa ka kutsarang tubig ug ipahid kini sa ibabaw sa mga liningin. Idugang ang mga sprinkle.

6. Ibutang ang gitina nga mga itlog (hilaw) diha sa tunga sa mga liningin, kon gusto ninyo. Lutoa sulod sa 20 ka minuto o hangtod nga mobrown.

Unsa pa ang imong magamit sa paghimo og usa ka liningin? Papel? Mga dahon?

Padad-i kami og litrato sa unsay imong nahimo! Tan-awa ang luyo nga hapin aron makita kon unsaon.

Page from the April 2022 Friend Magazine.

Mga paghulagway pinaagi ni Mark Robison