Ko Ha Konga ke Fakahoko
Naʻe pehē ʻe Sisitā Foki, “ʻOku ʻi ai ha konga makehe maʻau.”
Naʻe lahi e talanoa ʻa e fānau ʻi he kalasi ʻa Kapilí. Naʻa nau saiʻia ke talanoa fekauʻaki mo e meʻa ne hoko lolotonga e uiké. Naʻa nau saiʻia ke tali ha ngaahi fehuʻi ʻi he lēsoní.
Ka naʻe ʻikai pehē ʻa Kapili. Naʻe ʻikai ke ne lava ʻo lea. Naʻe faingataʻaʻia fakaesino pea faingataʻa ai ke lea.
ʻI ha Sāpate ʻe taha, naʻe maʻu ai ʻe Sisitā Foki ha ongoongo fakafiefia. Naʻá ne pehē mai, “ʻOku vave pē hono fakahoko ʻa e polokalama Palaimelí.” “ʻE taki taha ʻi ai haʻamou konga.”
Naʻe ʻoange ʻe Sisitā Foki ha ʻū laʻipepa ki he fānau kehé. Naʻe ʻi he laʻipepa takitaha ha konga lea ke nau lea ʻaki . Ka naʻe ʻikai lava ke lea ʻaki ia ʻe Kapili. ʻE lava fēfē ke ne kau ki he polokalamá?
Naʻe talaange ʻe Sisitā Foki kia Kapili, “ʻOku ʻi ai ha konga makehe maʻau.” Naʻá ne toʻo hake ha kiʻi puha siʻisiʻi. Naʻe ʻi ai hano kiʻi kau ne ʻasi hake ʻi ha tafaʻaki ʻe taha. “Sio heni.” Naʻe takai ʻe Sisitā Foki ʻa e kiʻi kaú. Naʻe vanavanaiki ha tā ha fasi mei he puhá.
Naʻe pasipasi ʻa Kapili. Naʻá ne ʻosi ʻiloʻi e hiva ko iá!
Naʻe malimali pē ʻa Sisitā Foki. “Ko ē, ʻahiʻahiʻi.” Naʻá ne tokoni kia Kapili ke takai ʻa e kiʻi kaú. Naʻe tā ʻa e mūsiká. Naʻe hangē ia ha maná!
“Te ke lava nai ʻo tā e foʻi hivá ni maʻatautolu ʻi he polokalama Palaimelí?” Ko e fehuʻi ange ia ʻa Sisitā Fokí. Naʻe kamo pē ʻa Kapili. Naʻá ne fiefia ke ʻi ai haʻane konga.
Naʻe ʻikai fuoloa kuo fakahoko ʻa e polokalamá. Naʻe lue taha hake ʻa e fānaú ki muʻa ke lau ʻenau kongá.
Naʻe pehē ʻe ʻEli, “ʻOku ʻofa ʻa e ʻOtuá ʻiate kitautolu.”
Naʻe pehē ʻe Siaki, “Ko e ʻOtuá ʻa ʻetau Tamai Hēvaní.”
Hili ia pea hoko leva ‘a Kapili. Naʻá ne lue atu ki muʻa. Naʻá ne takai ʻa e kiʻi kau ʻi he kiʻi puhá. Naʻe ongo mai ʻa e mūsiká. Naʻe fakakaukau ʻa Kapili ki he ngaahi lea ʻo e hivá ʻi heʻene takai iá.
Fānau au ʻa e ʻOtua,
Kuó Ne fekau mai,
Ke u haʻu ki he māmaní
Mo e ongomātuʻá.
Naʻe sio atu ʻa Kapili ki he kakaí kotoa. Naʻa nau malimali mai ki ai.
Naʻe lea ʻa e pīsopé ʻi he fakaʻosinga ʻo e polokalamá. Naʻá ne pehē, “Naʻe vahevahe ʻe he fānau takitaha ʻenau fakamoʻoní he ʻahó ni.” “ʻOku moʻoni e meʻa ne nau vahevahé. Ko e fānau kotoa kitautolu ʻa e ʻOtuá.”
Na‘e ongoʻi loto-māfana ʻa Kapili. Naʻá ne ʻiloʻi naʻe moʻoni ʻa e pīsopé. Ko ha fānau ia ʻa e ʻOtuá. Pea naʻe ʻi ai haʻane konga mahuʻinga ke fakahoko.
Ngaahi tā fakatātā ʻa Conner Gillette