Ko e Kau Paionia ʻi he Fonua Kotoa Pē
Feʻiloaki ʻa Halieta mo e Kau Faifekaú
ʻE lava nai ke ne toe fakataha mo Papa?
Naʻe sio fakamamaʻu ʻa Halieta ki he tā ʻo Papa ʻi he holisí. Ko e hili ia ha māhina ʻe valu mei heʻene pekiá. Naʻá ne fifili pe ʻe toe sio nai ki ai. Naʻá ne ʻofa lahi kiate ia.
Tukituki, tukituki, tukituki.
Naʻe fakaava ʻe Halieta ʻa e matapā ʻo hona kiʻi fale nofo totongí. Naʻe tuʻu ha ongo talavou ʻi tuʻa.
“Guten Tag! Mālō e lelei! Ko e ongo faifekau kimaua mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Te ma fie talanoa ki ho fāmilí fekauʻaki mo Sīsū Kalaisi.”
Naʻe malimali ʻa Halieta. Naʻe ʻai ha meʻa ʻi heʻena fakamatalá naʻá ne ongoʻi fiefia ai. “Te u kole kia Mutti (Fineʻeikí).”
Naʻe maʻu ʻe Halieta ʻa Mutti. Naʻá ne pehē ange, “ʻOku ʻi he matapaá ha ongo faifekaú. ʻOku nau fie talanoa mai kiate kitautolu fekauʻaki mo Sīsū.”
Naʻe fakafulofula ʻa Mutti. “Talaange kiate kinaua ʻoku ʻikai ke tau faingamālie.”
Naʻe talaange ʻe Halieta, “Ka ʻokú na ngali angalelei. “He ʻikai fuoloa.”
Naʻe kiʻi sio atu ʻa Mutti ki he uasí. “Sai. ʻI ha kiʻi miniti siʻi pē.”
Naʻe hū mai e ongo faifekaú ʻo talanoa mo Mutti, Halieta, mo e tehina ʻo Halieta ko Kamaní. Naʻá na talanoa ange fekauʻaki mo Sīsū pea mo ha tohi naʻe ui ko e das Buch Mormon, ko e Tohi ʻa Molomoná. Naʻá na ʻoange leva ki he fāmili ʻo Halietá ha tatau ke nau lau.
Naʻe pehē ange ʻe Mutti ʻi heʻene fakaave hake ʻa e tohí, “ʻOku ou tui te mau lava ʻo lau ha ngaahi peesi siʻi.” ʻI he ngaahi ʻaho siʻi hono hokó, naʻe lau mo lau ia ʻe Mutti. Naʻá ne lau leʻolahi ha ngaahi konga kia Halieta mo Kamani.
Pehē ange mai naʻe lava ke lau ʻeni ʻe Papa. Naʻe fakakaukau ʻa Halieta,te ne saiʻia ai .
ʻI he foki mai ʻa e ongo faifekaú, naʻá na akoʻi e palani ʻa e ʻOtuá. “Ne tau nofo fakataha mo e ʻOtuá kimuʻa pea fāʻeleʻi mai kitautolú. Naʻa tau haʻu ki he māmaní ke ako pea hoko ʻo hangē ko Iá. ʻI he taimi te tau mate aí, te tau lava ʻo toe fakataha mo Ia.”
Kae fēfē ʻa Papa? Naʻe fifili ʻa Halieta.
Naʻe sio atu e faifekaú kia Halieta. “Koeʻuhí naʻe pekia pea toe moʻui ʻa Sīsū, te tau lava ai ʻo fakataha mo hotau ngaahi fāmilí ʻo taʻengata. Naʻa mo hotau ngaahi ʻofaʻanga kuo pekiá.”
Naʻe maʻu ai ʻe Halieta he taimi ko iá ha ʻamanaki lelei. Te ne lava ʻo toe fakataha mo Papa! Naʻe malimali fiefia foki mo Mutti—ko e fuofua taimi ia ʻi ha taimi fuoloa.
Naʻe hokohoko atu e ako ʻa Halieta, Mutti, mo Kamani mei he ongo faifekaú. Naʻa nau ʻalu ki he lotú. Naʻe kaungāmeʻa ʻa Halieta mo ha kiʻi tamasiʻi lelei ko Tieta.
Ne hangé kuo ʻi ai e huelo ʻo e laʻaá ʻi he loki kotoa ʻo e fale nofo totongi ʻo Halietá. Ne ʻikai fuoloa kuo fili ʻa Halieta mo hono fāmilí ke papitaiso.
ʻI he pō kimuʻa honau papitaisó, naʻe tuʻulutui ʻa Halieta mo Mutti mo Kamani ʻo lotu. Naʻe pehē ʻe Halieta, “Tamai Hēvani, ʻoku mau houngaʻia ʻaupito ʻi he kau faifekaú, ongoongoleleí, pea mo homau fāmilí. ʻOku ʻikai ke mau faʻa tatali ke papitaiso.”
ʻI he ʻāʻā hake ʻa Halietá, naʻá ne sio ki he tā ʻo Papá peá ne malimali. Naʻe ʻikai ke ne faʻa tatali ke toe sio kiate ia ʻi ha ʻaho.
‘Oku ʻi ai ha temipale ʻe ua ʻi Siamane.
ʻOku ʻufiʻufi ʻa e vahe tolu ʻe taha ʻo Siamané ʻaki ha ngaahi vao ʻakau.
ʻOku vahevahe ʻe Siamane ha kauʻāfonua mo ha ngaahi fonua ʻe hiva.
ʻI he tupu hake ʻa Halietá, naʻá ne mali mo e tamasiʻi angalelei ko Tietá.
Kuo hoko ʻa Tieta he taimí ni ko e taha ʻo e kau ʻAposetoló—ʻEletā Tieta F. ʻUkitofa!
ʻOku pehē ʻe ʻEletā ʻUkitofa ko Halietá “ʻa e huelo ʻo [ʻene] moʻuí.”
Ngaahi tā fakatātā ʻa Giovanni Abeille