Kaumeʻa ki he Kaumeʻa

ʻOku ʻOfeina Koe ʻe ha Taha

Fakahoko ʻe Sisitā Susan H. Porter

Tokoni ʻUluaki ʻi he Kau Palesitenisī Lahi ʻo e Palaimelí

ʻI heʻeku fononga ki heʻeku ngāue foʻoú, naʻe kamata ke u hohaʻa.

Fēfē kapau ʻoku ʻikai ke u lelei feʻunga? Ko ʻeku fakakaukau ia ʻi heʻeku heka he pasí. Fēfē kapau ʻoku nau pehē he ʻikai ke u lava ʻo fakahoko lelei e ngāué?

Naʻá ku maʻu leva ha ongo mahino: ʻAhiʻahi fakahoko ho lelei tahá. Neongo kapau ʻoku ʻikai ola lelei, ka ʻoku ʻi ai ha taha ʻokú ne ʻofaʻi koe.

Naʻá ku fakakaukau ki hoku husepānití. Naʻá ku ʻilo te ne kei ʻofaʻi au tatau ai pē naʻe ʻikai ola lelei ʻeku ngāué. Peá u fakakaukau leva kia Sīsū Kalaisi. Naʻá ku ʻiloʻi te Ne ʻofa maʻu pē ʻiate au. Naʻe lava ke u ongoʻi ia ʻi hoku lotó. Naʻá ku fakahoko ha kiʻi lotu faingofua ʻo kole ki he Tamai Hēvaní ke tokoni mai.

ʻI heʻeku aʻu ki he ngāué, naʻá ku fakahoko hoku lelei tahá. ʻI he taimi naʻá ku fakahoko ai ha fehalākí, naʻá ku kei feinga pē. Naʻá ku manatuʻi naʻe ʻi ai ha taha ʻokú ne kei ʻofaʻi pē au.

ʻOku ʻofa ʻa Sīsū ʻiate koe foki! ʻOku tau ʻiloʻi ʻoku ʻofa ʻa Sīsū ʻi he fānaú koeʻuhí ko e founga naʻá Ne tauhi ʻaki kinautolú. Naʻe ʻi ai ha ʻaho ne ʻomi ʻe ha ngaahi mātuʻa ʻenau fānau īkí ke nau mamata kia Sīsū. Ka naʻe pehē ʻe he kau ākongá ʻoku ʻikai totonu ke nau hohaʻasi Ia.

Naʻe ʻikai loto ki ai ʻa Sīsū. Naʻá Ne pehē ʻoku totonu ke tuku ʻe he mātuʻá ke haʻu ʻa e fānau īkí kiate Ia. Pea “fua hake ʻe ia ʻakinautolu ʻi hono nimá, ʻo hilifaki hono nimā kiate kinautolu, mo ne tāpuakiʻi ʻa kinautolu” (Maʻake 10:16).

Manatuʻi maʻu pē ʻoku ʻofa ʻa Sīsū ʻiate koe. ʻOku ʻofa foki ʻa e Tamai Hēvaní ʻiate koe. ʻOkú Na ʻafioʻi ho hingoá. Te Na finangalo ke Na fāʻofua mo tāpuakiʻi koe.

Neongo kapau ʻoku ʻikai lelei e ngaahi meʻá, feinga pē. Lotua ha tokoni pea fakahoko ho lelei tahá. Manatuʻi, tatau ai pē pe ko e hā, ʻoku ʻi ai ha taha ʻoku ʻofa maʻu pē ʻiate koe.

Tā fakatātaaʻi ʻe Dani Jones