“Ko e Hā e Hiva Ko Iá?”
Naʻe tokoni e hivá ke mole atu e manavahē ʻa Kēlepí.
Naʻe taʻataʻalo fakamāvae ʻa Kēlepi ki he Fineʻeikí. Naʻe ʻamanaki ke ne nofo mo hono tokouá mo hono tuofefiné ʻi ha uike kakato ʻi he ʻapi hono mehikitangá. Naʻe ʻikai mamaʻo ia mei he feituʻu naʻe nofo ai e fāmili ʻo Kēlepí ʻi he ʻOtu Filipainí, ka naʻe kei hangē pē ia ha fononga. Te nau fiefia lahi ʻaupito!
Naʻa nau heka kotoa ki he kaá. Naʻe ʻave kinautolu ʻe he Tangataʻeikí ki he ʻapi honau mehikitangá. Naʻe lele ʻa Kēlepi ke fāʻofua ki hono mehikitangá mo e taha naʻá ne tokoua ʻakí.
Naʻá ne pehē ange, “Ne u ʻofa mai kiate kimoua!”
Naʻe malimali hono mehikitangá. “Ne u ʻofa atu mo au! Haʻu, naʻá ku ngaohi ha fanga kiʻi fakaneifua maʻau.”
Naʻe vaʻinga ʻa Kēlepi mo hono ngaahi tokouá mo e tuofāfiné mo e kāingá ʻi ha ʻaho kakato ʻe ua. Naʻa nau vaʻinga keimi vitiō. Naʻa nau tā ha ngaahi fakatātā. Naʻa nau lele holo ʻi tuʻa. Ka ʻi he ʻaho hono tolú, naʻe ʻikai ke ongoʻi sai ʻa Kēlepi. Naʻá ne ongoʻi vaivaia mo felāngaaki.
Naʻe pehē ange ʻe hono mehikitangá, “Pau pē ʻokú ke helaʻia he lahi e vaʻingá.” Naʻá ne ʻoange ha ipu vai. Naʻe mohe efiafia ʻa Kēlepi.
ʻI heʻene ʻā haké, naʻá ne ongoʻi kovi ange. Naʻe ʻikai ke ne mei lava ʻo ngaue! Naʻe kula hono ongo vaʻé. Naʻe hohaʻa hono mehikitangá. Naʻá ne tā ki he Fineʻeikí.
Ne ʻikai fuoloa kuo fakaheka ʻe he Fineʻeikí mo e Tangataʻeikí ʻa Kēlepi pea ʻave ia ki falemahaki. Naʻe fakahoko ʻe he toketaá ha ngaahi sivi. Naʻá ne talaange kiate kinautolu naʻe puke ʻa Kēlepi ʻi he mofi tengí. Naʻe ongo fakailifia ia!
Naʻe pehē ange ʻe he toketaá, “Sai hoʻo ʻomi iá.” “ʻOku fie maʻu ke nofo ʻi heni ʻi ha kiʻi taimi ke mau lava ʻo siofi ia.”
Naʻe ʻave kinautolu ʻe ha neesi ki ha loki ʻoku ʻi ai ha fānau kehe ʻoku puke ʻe toko tolu. Naʻe tokoni ʻa e Fineʻeikí kia Kēlepi ke ne heka ki hono mohengá. Naʻá ne fāʻofua kiate ia pea fakahoko ha lotu. Pea ʻalu leva ʻa e Fineʻeikí mo e Tangataʻeikí.
Naʻe manavasiʻi ʻa Kēlepi. Naʻe kamata ke ne hivaʻi ha foʻi hiva Palaimeli ke tokoniʻi ia ke ne ongoʻi fiemālie ange.
Naʻá ne hiva, “Tamai Hēvani, ʻokú ke ʻi ai?” ʻOkú ke ongoʻi nai siʻeku lotú?”
Naʻe fakafanongo ʻa e toenga ʻo e fānaú. Naʻe fehuʻi ange ʻe ha kiʻi tamasiʻi, “Ko e hā e hiva ko iá?”
Naʻe pehē ange ʻe Kēlepi, “Naʻá ku ako ia ʻi he Palaimelí.” “ʻOkú ne ʻai ke u ongoʻi loto-toʻa. ʻOkú ne fakamanatu mai ʻoku ʻi ai maʻu pē ʻa e Tamai Hēvaní ke tokoniʻi au.”
Naʻe kole ange ʻe ha kiʻi taʻahine, “Kātaki muʻa ʻo toe hivaʻi ia?” “ʻOku fakaʻofoʻofa.”
ʻI he toe hivaʻi ʻe Kēlepi ʻa e foʻi hivá, ne mole atu ʻene ilifiá.
Naʻe fehuʻi ange ʻe he taʻahine ʻe tahá, “Ko e hā e Palaimelí?” Naʻe fakamatalaʻi ange ʻe Kēlepi e meʻa kotoa fekauʻaki mo e lotú mo e Palaimelí. Naʻá ne vahevahe ʻene fakamoʻoni kau ki he Tamai Hēvaní mo Sīsū Kalaisí.
Naʻe hivaʻi ʻe Kēlepi ha ngaahi hiva Palaimeli ki he fānau kehé ʻi he ʻaho kotoa pē ʻo aʻu ki heʻene foki ki ʻapí. Naʻá ne vahevahe foki mo ha ngaahi talanoa mei he folofolá. Naʻá ne ongoʻi fiemālie ange ai, pea naʻá ne ʻiloʻi naʻe tokoni foki ia kiate kinautolu. Naʻá ne fiefia ʻi heʻene lava ʻo vahevahe ʻa e ongoongoleleí, ʻo aʻu pē ki heʻene ʻi falemahakí.
Ngaahi tā fakatātā ʻa Maria Mola