Konga Pē ʻe Taha?
Naʻe faingataʻa kia Toti ke tangutu maʻu lolotonga e houalotu sākalamēnití. Naʻá ne sēlue hono vaʻé. Naʻe ʻikai lava ʻo tangutu maʻu ʻi hono nofoʻangá.
Naʻe saiʻia ʻa Toti ke huki ʻia Teti ʻi he lotú. Ka naʻe ʻikai ke ʻi heni ʻa Teti he ʻahó ni. Naʻe fanafana ange ʻa Mami, “Toti.” “Kuo taimi ke tau loto-ʻapasia lolotonga e sākalamēnití.” Naʻá ne ʻoange ha tatau ʻo e Kaumeʻá.
Naʻe sio ʻa Toti ki he ngaahi fakatātaá. Ka naʻe ʻikai fuoloa kuó ne foʻi ʻi he tangutu maʻú. Naʻá ne puke e nima hono kiʻi tuofefine kei pēpē ko Selá. Naʻá ne puke hono nimá ʻaki hono kiʻi louhiʻi nimá. Naʻe malimali ʻa Toti.
Naʻe ʻikai fuoloa kuo paasi atu ki ai ʻa e maá. Naʻe fiekaia ʻa Toti. Naʻá ne fakaʻaongaʻi fakatouʻosi hono ongo nimá ke toʻo ha mā lahi. Naʻe mataʻi fakafehuʻi a Mami. Naʻá ne pehē ange, “Toʻo pē taha ʻi he taimi hokó.”
Hili e fakatahá, naʻe malimali ange ʻa Mami kia Toti. “Fakamālō atu ʻi hoʻo tokoni kia Sela lolotonga e mamaʻo ʻa Tetí.”
Naʻe saiʻia ʻa Toti ke tokoni kia Mami ʻi he lotú. Naʻá ne fakakaukau ki he lahi ʻo e mā naʻá ne toʻó.
Naʻá ne pehē ange, “Fakamolemole ʻi heʻeku toʻo ʻo lahi e maá. Ko e hā ʻoku tau toʻo taha ai peé?”
Naʻe fāʻofua ʻa e Mami kia Toti. “ʻOku ʻikai ke tau toʻo ʻa e maá he ʻoku tau fiekaia. ʻOku tau toʻo ʻa e maá ke manatuʻi ʻa Sīsū. Pea ʻoku tau toʻo ha konga pē ʻe taha kae lava ke maʻu ʻe he tokotaha kotoa pē hakonga ke manatuʻi ʻa Sīsū.”
Naʻe feinga lahi ange ʻa Toti ke loto-ʻapasia lolotonga e lotú he uike hono hokó. Naʻá ne toʻo pē ha meʻi mā ʻe taha. Naʻá ne fiefia ʻi heʻene lava ʻo manatuʻi ʻa Sīsuú. Naʻá ne fie tokoni ki he niʻihi kehé ke nau manatuʻi foki mo Sīsū.
Ngaahi tā fakatātā ʻa Kevin Fales