Toetuʻú ʻi he funga ʻo e Māmaní
ʻAhiʻahiʻi ʻa e ngaahi tukufakaholo Toetuʻu ko ʻení mei he funga ʻo e māmaní.
Ngaahi Lofa Toetuʻú
ʻOku fakapuna lofa ʻa e kakai ʻo Pemuta kimuʻa he Toetuʻú ke fakafiefiaʻi ʻa e toe tuʻu ʻa Sīsū Kalaisi mei he fonualotó. Te ke lava ʻo faʻu ha lofa pepa pea tautau ia ke fakamanatu atu kiate koe ʻa Sīsū.
-
Kosi ha laʻipepa ki ha fōtunga ʻo ha taiamoni.
-
Tā ha laine ʻe ua ʻi he loto taiamoní ke fakafehokotaki kotoa e ngaahi tuliki ʻe faá. Te ke lava foki ʻo fakapipiki ʻa e ngaahi vaʻakaú ʻi ʻolunga he ngaahi lainé.
-
Hiki ʻi loto ʻi he ngaahi konga takitaha ʻe faá ʻa e ʻuhinga ʻokú ke ʻofa ai ʻia Sīsū Kalaisí. Te ke lava foki ʻo valivali ʻa e lofá.
-
Tānaki atu ha afo ki lalo, pea fakapipiki ai ha ngaahi līpine ʻo kapau te ke loto ki ai. Pea tautau leva hoʻo lofa.
Ngaahi Kāpeti (Rugs) Toetuʻú
ʻOku fakamanatua ʻe he kakai ʻo ʻEla Salavatoa mo Kuatemalá ʻa e Toetuʻú ʻaki hono ngaohi ha ngaahi alfombras (kāpeti) ʻi he hala puleʻangá. ʻOku nau fakaʻaongaʻi ʻa e efuefuʻi papá, matalaʻi ʻakaú, mo e ngaahi meʻa kehe ke faʻu ha ngaahi fōtunga lanu fakaʻofoʻofa ʻoku hangē ha ngaahi kāpetí. Ko e ngaahi kāpetí ko ha meʻaʻofa kia Sīsū.
Te ke lava ‘o faʻu haʻo kāpeti Toetuʻu ʻaʻau pē. Tā valivali ʻi ha pepa pe fakaʻaongaʻi ha ngaahi ʻakau mo e sioka ke faʻu ha kāpeti ʻi tuʻa.
Tā Valivali ʻo e Fuaʻimoá
ʻOku tā valivali e fuaʻimoá ʻe he kakai ʻo ʻAositelēliá, Saute ʻAfiliká, ʻIukuleiní, mo ha ngaahi fonua lahi ke fakafiefiaʻi ʻa e Toetuʻú. ʻE lava ke hoko ʻa e fuaʻimoá ko ha fakataipe ʻo e toetuʻú mo e moʻui foʻoú.
ʻI he tokoni ʻa ha taha lahi, haka ha fuaʻimoa. Hili e mokomoko ʻa e fuaʻimoá, teuteuʻi kinautolu ʻaki ha peni fakaʻilonga, vali, kala, pe fakalanu.
Mā Toetuʻu Faka-ʻĪtalí
ʻI ʻĪtalí, ʻoku ngaohi ʻe he kakaí ʻa e pane di Pasqua (mā Toetuʻú). ʻOku fakamanatu ange ʻe hono fuó ʻa e kalauni talatala naʻe hilifaki ʻe he kau sōtiá ki he ʻulu ʻo Sīsuú. Fakaʻaongaʻi e founga feimeʻatokoni ko ʻení ke ngaohi hoʻo mā pē ʻaʻau.
-
Heu fakataha ha sepunitī ʻisite ʻe 2 1/4, ipu huaʻakau mafana ʻe 1 1/4, meʻi māsima, ipu pata ʻe 1/3 kuo ʻosi molū, fuaʻimoa ʻe 2, mo e ipu suka ʻe 1/2. Pea toki tānaki atu ki ai ha ipu mahoaʻa ʻe 3 1/2. Natu ia. (Kapau ʻoku fuʻu pikipiki ʻa e toú, tānaki atu ha meʻi mahoaʻa.)
-
Vahevahe ʻa e toú ki ha foʻi tou ʻe 12. Vilohi ʻa e foʻi tou takitaha ke hangē ha maeá pea aʻu hono lōloá ki ha ʻinisi ʻe 14 (senitimita ʻe 35).
-
Vilohi fakataha ha foʻi tou maea ʻe ua, pea fakapipiki leva ʻa e ongo muiʻi maeá ke faʻu ha foʻi siakale. Ngaohi ha foʻi pale ʻe ono.
-
Tuku ʻa e ngaahi palé ʻi ha kapa kuo vali ngako pea ʻufiʻufi ʻaki ha tupenu. Tuku ai ʻi ha houa ʻe taha.
-
Tomuʻa fakamoʻui ʻa e ʻōvani ki he mafana ko e 350°F (170°C). Tā ʻa e fuaʻimoá ʻaki ha sepuni vai lahi ʻe taha pea vali ʻaki e palé. Tānaki atu ki ai e meʻa teuteu keké (sprinkles).
-
Fokotuʻu ʻa e fuaʻimoa (mata) kuo ʻosi fakalanú ʻi he lotomālie ʻo e ngaahi foʻi palé, kapau te ke loto ki ai. Taʻo ʻi ha miniti ʻe 20 pe aʻu ki heʻene lanu melomeló.
Ngaahi tā fakatātā ʻa Mark Robison