Ngaahi Kaungāmeʻ aLoto-toʻa
Naʻe hoko ʻa e talanoá ni ʻi he ʻIunaiteti Siteití.
Naʻe loto ʻa Moli ke loto-toʻa ʻo hangē ko hono kaungāmeʻá.
Naʻe tā e fafangú. Naʻe faʻo ʻe Moli ʻene ngaahi tohí ki heʻene kató. Kuo tuku ʻa e akó, pea ʻikai ke ne faʻa tatali ki he fakaʻosinga ʻo e uiké!
Naʻe pehē ʻe Misa Mila, “Manatuʻi ke ke mateuteu ki hoʻo ngaahi lipooti hisitōliá ʻi he Mōnité.” “Kalasi, ʻofa ke mo u maʻu ha fakaʻosinga uike lelei.”
Naʻe sio atu ʻa Moli kia ʻAnisa. Naʻe punou hono ʻulú, pea ngali hohaʻa.
Naʻe pehē ange ʻe Moli, “ʻEi, ʻAnisa.” “ʻOkú ke sai pē?”
Naʻe māpuhoi ʻa ʻAnisa. “ʻOku ou ilifia ke fakahoko ʻeku lipōtí ʻi he ʻaho Mōnité. Talu ʻemau hiki mai ki heni mo ʻeku ngāue mālohi ʻi heʻeku lea faka-Pilitāniá. Ka ʻoku faingataʻa ke u lea ʻaki e ngaahi lea ʻi heʻetau tohi hisitōliá.”
Naʻe kiʻi fakakaukau ki ai ʻa Moli. ʻE fuʻu faingataʻa ke hiki ki ha fonua kehe ʻo ako ha lea fakafonua foʻou.
Naʻe fehuʻi ange ʻe Moli, “ʻE tokoni nai kapau te ta ako fakataha?”
Naʻe kamo ʻa ʻAnisa. “Te u saiʻia ai. Mahalo te ta lava ʻo ako ʻeta ngaahi foʻi leá foki.”
Naʻe tali ange ʻe Moli, ʻIo.” “ʻE tokoni ia kiate kitaua fakatouʻosi!”
ʻI he pongipongi Mōnité, naʻe tuʻu ʻa Misa Mila ʻi muʻa ʻi he kalasí. “Te tau kamata e kalasí he ʻahó ni ʻaki ʻetau lipōtí.”
Naʻe tafoki hake ʻa Moli ʻo malimali kia ʻAnisa. Naʻe malimali mai ʻa ʻAnisa, ka naʻe lava ʻa Moli ʻo sio ki heʻene hohaʻá.
Naʻe fakahoko ʻe ha niʻihi kehe ʻenau lipōtí. Ne hoko leva ‘a ʻAnisa. Naʻe makiʻikiʻi e kakaí ʻi heʻene lue ki muʻa ʻi he kalasí. Naʻe tuhu ha niʻihi kiate ia mo fanafana holo.
Naʻe mihiʻi ʻe ʻAnisa ʻene mānavá. Naʻe kiʻi tetetete ʻa e pepa naʻá ne toʻotoʻó.
Naʻe lotu fakalonglongo ʻa Moli. Tamai Hēvani, fakamolemole ʻo tokoniʻi ʻa ʻAnisa ke ne fakahoko lelei ʻene lipōtí. Pea fakamolemole ‘o tokoni mai ke u ‘ilo e founga te u lava ʻo tokoniʻi ai iá.
Naʻe kole ʻe he faiakó ki he kau akó ke nau fakafanongo fakalongolongo. Ka naʻe kei fanongo pē ʻa Moli ki ha fanafana. ʻI he taimi naʻe feinga ai ʻa ʻAnisa ke puʻaki ʻa e ngaahi lea mamafá, ne kata ha niʻihi tokosiʻi. Naʻe fakaʻamu ʻa Moli naʻá ne lava ke taʻofi e makiʻikiʻi mo e fanafana ʻa e tamaikí. Naʻá ne fakapapauʻi ke malimali ʻi he taimi kotoa pē naʻe sio ange ai ʻa ʻAnisa kiate iá.
ʻI he ʻosi e lea ʻa ʻAnisá, naʻá ne foki ki hono tesí. Naʻe sio atu ʻa Moli ʻoku tangi ʻa ʻAnisa. Naʻe punou hifo ʻa ʻAnisa ʻi hono tesí.
Naʻe hoko leva ‘a Moli. Naʻá ne lue ki muʻa ʻi he lokí. “Kimuʻa peá u kamatá, ʻoku ou fie talaatu naʻe fai ʻe ʻAnisa ha lipooti lelei.”
Naʻe sio hake ʻa ʻAnisa.
“Kuó ne ʻi heni ʻi ha ngaahi māhina siʻi pē, pea kuo ʻosi sai ʻaupito ʻene lea faka-Pilitāniá. ʻOkú ne ngāue mālohi pea ʻoku ʻikai ke foʻi. ʻOku ou ʻamanaki pē te u loto-toʻa ʻo hangē ko iá.”
Hili e kalasí ne toʻo mai ʻe Moli ʻene ʻū tohí. Naʻá ne loto ke fakatalanoa kia ʻAnisa. Ka naʻe tokolahi ha kau ako kehe naʻa nau ʻosi fakatahataha mai kia ʻAnisa. Naʻa nau fai ha ngaahi lea lelei ki ai.
Naʻe pehē ange ʻe ha kiʻi tamasiʻi ʻe taha, “Fakaʻofoʻofa hoʻo lipōtí, ʻAnisa!”
Naʻe pehē ʻe ha taʻahine ʻe taha, “Naʻe faingataʻa ʻaupito ke puʻaki e niʻihi ʻo e ngaahi hingoá mo e feituʻú!”
Naʻe malimali ʻa Moli peá ne toe fai ha lotu fakalongolongo. Naʻá ne fakamālō ki he Tamai Hēvaní ʻi heʻene tokoniʻi ia ke loto-toʻa hangē ko ʻAnisá.
Ngaahi tā fakatātā ‘a Zhen Liu