Tohi ʻe Koe
ʻAlu ʻo Tangutu mo Ia
Siela F., taʻu 12, ʻIutā, USA
ʻI ha ʻaho ʻe taha ʻi he akó, naʻá ku fanongo ʻoku ʻi ai ha kiʻi tamasiʻi naʻe siʻi fakamamahiʻi. Naʻá ku loto-mamahi. ʻOku ʻikai totonu ke ngaohi peheʻi ha taha.
Kimui ange ʻi he ʻaho ko iá, naʻe fai ha paati ʻa ʻemau kalasí. Naʻe haʻu e tamasiʻi naʻe fakamamahiʻi kimuʻá ki he pātí ʻo tangutu toko taha pē. ʻI heʻeku sio kiate iá, naʻá ku manatuʻi e meʻa naʻe hokó. Naʻá ku fanongo ki ha leʻo naʻá ne talamai ke u tangutu ʻi hono tafaʻakí. Ka naʻe ʻikai ke u fie hoko ko e tokotaha pē ʻoku tangutu ʻi hono tafaʻakí. Ne u fakakaukauʻe sai pē ia . ʻOku ʻikai ke ne fie maʻu ha taha ke tangutu ʻi hono tafaʻakí. Naʻá ku tekeʻi atu ʻa e ongo ko iá.
Naʻe toe ongo mālohi ange ʻa e leʻó kiate au. ʻAlu ʻo tangutu ʻi hono tafaʻakí.
Naʻá ku sio atu ki he kiʻi tamasiʻí. Na‘á ne mataʻi tuenoa mo loto-mamahi. Ne u fakakaukauSai . ʻI heʻeku tangutu ʻi hono tafaʻakí, naʻá ne mataʻi taʻefiemālie. Naʻá ku talaange hoku hingoá peá u fehuʻi ange fekauʻaki mo ia. Ne u loto-siʻi he kamataʻangá. Naʻá ku ongoʻi nonga ʻi heʻema talanoá. Pea naʻe ʻikai ke toe hā ngali tuenoa pe loto-mamahi.
ʻI he taimi ne pau ke ʻalu ai ki he kalasí, naʻá ku talaange te u toki talanoa ki ai ʻamui ange. Naʻá ne kiʻi malimali peá ne pehē mai, Sai. Naʻe haʻu ʻeku faiakó ʻo pehē mai, “Mālō Siela. Ko e anga manavaʻofa ʻaupito ia.” Naʻá ku kamo pē hoku ʻulú.
Ne vave e ʻalu ʻa e ʻahó, ka naʻe ʻikai mole ʻa e ongoʻi nonga ko iá. Naʻá ku ʻiloʻi ne u fakahoko ʻa e meʻa totonú. ʻI he taimi ʻe niʻihi ʻoku ʻikai ke lelei hono ngaohi ʻo ha taha ʻi heʻene kehé. ʻOku ʻikai ke u saiʻia ai, ka ʻoku hoko ia.
Ko fānau kotoa kitautolu ʻa e ʻOtuá. ʻOku totonu ke tau manavaʻofa ki he niʻihi kehé. Kapau te tau fakahoko ʻeni, ʻoku ou ʻiloʻi ʻe tāpuakiʻi kitautolu ʻe he ʻOtuá.
Ngaahi tā fakatātā ʻa Kristin Sorra