Ngaahi ʻEkitivitī ʻi he Haʻu, ʻo Muimui ʻIate Aú
Ako e folofolá pe fakahoko ha meʻa fakafiefia ʻi he efiafi fakafāmili ʻi ʻapí!
Hopo Hangē ha Kiʻi Potó
Ki he ʻEkesōtosi 7–13
Talanoá: Ko Mōsesé ko ha palōfita. Naʻá ne talaange kia Felo ke fakatauʻatāinaʻi ʻa e kakai ʻa e ʻOtuá (vakai ʻEkesōtosi 8:1). Naʻe talaange ʻe Felo te ne tukuange kinautolu. Ka naʻá ne maumauʻi ʻene palōmesí. Naʻe fekauʻi mai ʻe he ʻOtuá ha fanga poto, kutu, lango, mo e ngaahi fakamalaʻia kehe ke fakatokanga kia Felo ke muimui ki he palōfitá.
Hivá: “Muimui he Palōfitá,” veesi 5 (Tohi Hiva ʻa e Fānaú, 58–59)
ʻEkitivitī: Fakahoko ha kiʻi vaʻinga! ʻAi ke tuʻu laine ʻa e toko taha kotoa. Pea tulolo ki lalo. ʻOku hili ʻe he taha hono ongo nimá ʻi he tuʻa ʻo e taha ʻi muʻá ʻo puna fakalaka he tokotaha kotoa pē, hangē ha potó. Taufetongi pē kae ʻoua kuo maʻu ʻe he taha kotoa ha faingamālie. Ko e taimi kotoa pē ʻokú ke puna ai, lea ʻaki ha founga ʻe taha ʻe lava ke ke muimui ai he palōfitá.
Ko Hono Fakamavaeuaʻi ʻa e Tahí
Ki he ʻEkesōtosi 14–17
Talanoá: Naʻe taki ʻe Mōsese ʻa e kakai ʻo e ʻOtuá mei ʻIsipite. Ka naʻe tulimui atu ʻa Felo ʻiate kinautolu. Naʻe foaki ʻe he ʻOtuá kia Mōsese ʻa e mālohi ke fakamavaeuaʻi ʻa e Tahi Kulokulá. Naʻe kolosi hono kakaí ʻi he kelekele mōmoá pea nau hola mei he kau ʻIsipité.
Hivá: “Huhuʻi ʻo ʻIsileli” (Ngaahi Himí, fika 5)
ʻEkitivitī: Fakafaivaʻi ʻa e talanoa ʻo hono fakamavaeuaʻi ʻe Mōsese ʻa e Tahi Kulokulá. Te ke lava ʻo fakaʻaongaʻi ʻa e fakamatala ʻi he peesi 12.
Toetuʻu ʻoku Toe Makehe Ange
ʻi he Toetuʻú
Talanoá: Naʻe pehē ʻe he palōfita ko ʻĪsaiá naʻe mamahi ʻa Sīsū koeʻuhí ko ʻetau ngaahi maumau fonó pea ʻoku mahino kiate Ia ʻetau ngaahi mamahí (vakai ʻĪsaia 53:4–5). Naʻe pekia ʻa Sīsū maʻatautolu, pea toe moʻui Koeʻuhí ko Ia, te tau toe moʻui kotoa foki!
Hivá: “Naʻe Toetuʻu Nai ʻa Sīsū?” (Tohi Hiva ʻa e Fānaú, 45)
ʻEkitivitī: ʻAi ke makehe ange ʻa e Toetuʻu ʻi he taʻu ní ʻaki hono fakahoko ʻa e ʻekitivitī ʻi he peesi 3. ʻI he uike kimuʻa he Toetuʻú, lau he ʻaho taki taha ʻo kau kia Sīsū pea valivali ha konga ʻo e fakatātaá. Te ke lava foki ʻo kosi ʻo toʻo ʻa e ngaahi fakatātā ʻi he peesi 24–25.
Fefuaʻaki Hoʻomou Ngaahi Kavengá
Ki he ʻEkesōtosi 18–20
Talanoá: Naʻe faingataʻa kia Mōsese ke ne taki toko taha hono kakaí. Naʻe talaange ʻe Setelō, ko e tamai ʻa hono uaifí kia Mōsese ke tuku ki he kakai kehé ke nau tokoni ke “fua ʻa e kavengá” (ʻEkesōtosi 18:21–22).
Hivá: “ʻOku ou Feinga ke Hangē ko Sīsuú” (Tohi Hiva ʻa e Fānaú, 40)
ʻEkitivitī: ʻAi ha tokotaha ke tuʻu ki ʻolunga pea hiki hake hono ongo nimá. ʻOange ha tohi ke ne toʻo ʻi hono ongo nimá. Tānaki atu ha ngaahi tohi lahi ange kae ʻoua kuo fuʻu mamafa ke puke hake. Hili iá, ʻai ha toko ua ke na puke hake ʻa e ongo nima ʻo e tokotahá. ʻOku faingofua ange nai ke fuesia ha kavenga ʻi he taimi ʻoku tokoniʻi ai koé? Te ke tokoniʻi fēfē ʻa e niʻihi kehé? ʻE founga fēfē haʻo kole tokoni?
Ongo Maka mei ha Moʻunga
Ki he ʻEkesōtosi 24; 31–34
Talanoá: Naʻe foaki ʻe he ʻOtuá ha ngaahi fekau kia Mōsese ʻi ha ongo maka lafalafa. Naʻe palōmesi ʻa e kakai ʻIsilelí te nau talangofua kiate kinaua (vakai ʻEkesōtosi 24:7).
Hiva: “Tauhi ʻa e Ngaahi Fekaú” (Tohi Hiva ʻa e Fānaú, 68)
ʻEkitivitī: Te ke lava foki ʻo palōmesi ke talangofua. Ngaohi ha ngaahi maka lafalafa ʻaki ha pepa. Hili iá pea tā pe tohi ʻi ai ha ngaahi founga ʻokú ke tauhi ai ʻa e ngaahi fekaú.
Ngaahi tā fakatātā ʻa Katy Dockrill