Ngaahi ʻEkitivitīki he Haʻu, ʻo Muimui ʻIate Aú
Ako e folofolá pe fakahoko ha meʻa fakafiefia ʻi he efiafi ʻi ʻapí!
Ngaahi ʻAkau ʻo e Māʻoniʻoní
ʻI he ʻĪsaia 58–66
Talanoá: Naʻe akoʻi ʻe ʻĪsaia ʻe hāʻele mai ʻa Sīsū Kalaisi ke fakamoʻui mo fakafiemālieʻi ʻa kinautolu ʻoku loto mamahi pe fie maʻu tokoní (vakai, ʻĪsaia 61:1). Naʻá Ne toe folofola foki ko kinautolu ʻoku talangofua ki he ngaahi akonaki ʻa Sīsuú te nau hangē ko e “ngaahi ʻakau ʻo e māʻoniʻoní” (ʻĪsaia 61:3).
Hivá:“ʻOku Ongo ʻa e ʻOfá” (Tohi Hiva ʻa e Fānaú, 42–43)
ʻEkitivitī: Tā ha fakatātā ʻo ha fuʻu ʻakau. Kosi ʻo toʻo ha ngaahi lauʻiʻakau. Hiki ʻi he ngaahi lauʻiʻakaú ʻa e ngaahi founga ʻoku tokoniʻi ai koe ʻe Sīsū ʻi he taimi ʻokú ke talangofua ai ki Heʻene ngaahi akonakí. Hili iá pea fakapipiki ʻa e ngaahi lauʻiʻakaú ki he fuʻu ʻakaú.
Kau Toutai Tangata
ʻI he Selemaia 1–3; 7; 16–18; 20
Talanoá: Naʻe akoʻi ʻe he palōfita ko Selemaiá ʻe fekauʻi mai ʻe he ʻOtuá ha “kau toutai tokolahi” ke tokoni ki hono tānaki ʻo ʻIsilelí (vakai, Selemaia 16:15–16). ʻE vahevahe ʻe he kakaí ni ʻa e ongoongoleleí koeʻuhí ke lava ʻa e taha kotoa ʻo foki kiate Ia.
Hivá: “ʻOku Ou ʻAmanaki ʻe Ui Au Ke u ʻAlu ʻo Ngāue Fakafaifekau” (Tohi Hiva ʻa e Fānaú, 91)
ʻEkitivitī: Fakahoko ʻa e vaʻinga toutaí ʻi he peesi 12. Te ke tokoni fēfē nai ke tānaki ʻa ʻIsilelí?
Vaʻinga Mateʻi ʻo e Folofolá
ʻI he Selemaia 30–33; 36; Tangilaulau ʻa Selemaia 1; 3
Talanoá: Naʻe fakahā ʻe he ʻEikí kia Selemaia ke ne hiki ʻEne ngaahi folofolá (vakai, Selemaia 36:1–4). Te tau lava ʻo lau ia he ʻahó ni ʻi he tohi ʻa Selemaiá. ʻOku tokoniʻi kitautolu ʻe he folofolá ke tau ʻiloʻi e folofola ʻa e Tamai Hēvaní mo Sīsū Kalaisí.
Hivá: “Fekumi, Fifili pea mo Lotu” (Tohi Hiva ʻa e Fānaú, 66).
ʻEkitivitī: Fakahoko ha kiʻi vaʻinga mateʻi folofola! Taufetongi ʻi hono fakatātaaʻi e talanoa folofola ʻokú ke saiʻia taha aí. Tuku ki he tokotaha kotoa pē ke nau mateʻi pe ko e hā ʻa e talanoa ʻoku fakatātāʻí. Ko e hā ʻoku akoʻi atu ʻe he talanoa ʻokú ke saiʻia taha aí?
Ngaahi Haʻi Fakafāmilí
ʻI he ʻIsikeli 1–3; 33–34; 36–37; 47
Talanoá: Naʻe maʻu ʻe he palōfita ko ʻIsikelí ha mata meʻa-hā-mai ʻo ha vaitafe ʻoku tafe mei ha temipale. ʻI he mata meʻa-hā-maí, naʻe tupu ʻa e vaitafé ʻo ne tāpuakiʻi ʻa e meʻa kotoa pē naʻe aʻu ki aí (vakai, ʻIsikeli 47:1–12). Hangē ko hono tāpuakiʻi ʻe he vaitafé ʻa e meʻa naʻe aʻu ki aí, ʻoku tāpuekina ʻe he temipalé hotau ngaahi fāmilí.
Hivá: “Ko e Fāmilí ke Taʻengata” (Tohi Hiva ʻa e Fānaú, 98)
ʻEkitivitī: ʻOku tokoni ʻa e hisitōlia fakafāmilí ke ʻomi ʻa e ngaahi tāpuaki ʻo e temipalé ki hotau ngaahi fāmilí. ʻAlu ki he peesi 24 ke ʻilo ʻa e founga naʻe ako ai ʻe he ongo tautehina fefine mei Taiuaní fekauʻaki mo hona fāmilí. Pea fakahoko leva ʻa e ʻekitivitī ʻi he peesi 16. Ko e hā mo ha toe founga ʻe lava ke ke ako ai fekauʻaki mo ho fāmilí?
Ngaahi tā fakatātā ʻa Katy Dockrill