Ko e Paati Fakakaungāmeʻá
“ʻOkú ke pehē nai te nau fiefia?” Ko Meia ange ia.
Naʻe pehē ʻe Meia, “ʻOku ʻikai ke u ʻilo e meʻa ke fai ki heʻeku taumuʻa fakasōsialé.” Naʻá ne tangutu hifo he seá ʻo vakaiʻi ʻa e ngaahi peesi ʻi heʻene Tohi Fakahinohino maʻá e Fānaú.
“ʻOkú ke saiʻia nai ʻi ha taha ʻo e ngaahi fakakaukau ki he taumuʻá ʻi hoʻo kiʻi tohí?” Ko e fehuʻi ange ia ʻa e Fineʻeikí.
Naʻe pehē ʻe Meia, “Ko e meʻa ʻe taha fekauʻaki mo hono talitali lelei ʻo e niʻihi kehé ʻoku ongo fakafiefia. ʻOku pehē ke fakafeʻiloaki koe ki ha taha foʻou pea tokoni ke nau feʻiloaki mo e niʻihi kehé.”
Naʻe sio hake ʻa Meia mei heʻene kiʻi tohí. “Ka ʻoku ʻikai ke u ʻiloʻi ha taha te u lava ʻo talitali leleí. ʻE faʻē, te ke fie lotu nai mo au?
Naʻe tangutu hifo ʻa e Fineʻeikí ʻi he tafaʻaki ʻo Meiá. Naʻe lotu ʻa Meia ʻo pehē, “ʻE Tamai Hēvani, kātaki ʻo tokoni mai ke u ʻiloʻi pe ko hai te u lava ʻo talitali leleí. ʻI he huafa ʻo Sīsū Kalaisí, ʻēmeni.”
Hili e lotú, naʻe fakakaukau ʻa Meia ki hono kaungāmeʻa ko Seitení. Naʻá na vaʻinga fakataha maʻu pē ʻi he taimi naʻe haʻu ai ʻa Seiteni ke ʻaʻahi ki heʻene kui fefiné. Pea ko ʻeni kuo hiki atu ʻa Seiteni, ko ʻene tamaí, mo hono tokouá mo hono tuofefiné ki heʻene kui fefiné.
“ʻOku fēfē ʻa Seiteni?” Ko e fehuʻi ange ia ʻa Meia ki he Fineʻeikí. “ʻOku ʻikai ke u tui ʻokú ne ʻiloʻi mo hono tokouá mo e tuofefiné ha tamaiki tokolahi heni. Mahalo te u lava ʻo tokoni ke talitali lelei kinautolu.”
Naʻe pehē ange ʻe he Fineʻeikí, “Naʻá ku fakakaukau ki he meʻa tatau. Ko e hā ʻokú ke fie maʻu ke fakahokó?”
Naʻe fakakaukau ʻa Meia ʻi ha kiʻi taimi siʻi. Naʻá ne pehē mai, “Mahalo ʻe lava ke fai haʻatau paati fakakaungāmeʻa! Te tau lava ʻo fakaafeʻi ha fānau mei he Palaimelí.”
Naʻe pehē ange ʻe he Fineʻeikí, “Mahalo ko ha fakakaukau lelei ia.”
Naʻe fili ʻe Meia mo e Fineʻeikí ha ʻaho ʻe taha ki he pātí. Naʻá na telefoni ki he tamai ʻa Seitení pea ʻave ha ngaahi fakaafe ki he fānau ʻi he Palaimelí. Pea naʻe taimi leva ke palani ʻa e fiefiá! Naʻe ʻohake ʻe Meia mo e Fineʻeikí ha fanga kiʻi vaʻinga. Naʻa na ngaohi ha fanga kiʻi meʻakai mo e ngaahi meʻa teuteu lahi.
Ne faifai pea aʻu ki he ʻaho pātí. Naʻe fiefia ʻa Meia kia Seiteni mo hono tokouá mo e tuofefiné ke feʻiloaki mo e taha kotoa.
“ʻOkú ke pehē nai te nau fiefia?” Ko Meia ange ia.
Naʻe pehē ange ʻe he Fineʻeikí, “ʻOku ou tui te nau fiefia.”
Ne ʻikai fuoloa kuo haʻu e taha kotoa. Naʻe malimali ʻa Seiteni mo hono tokouá mo hono tuofefiné. Naʻa nau vaʻinga, kai meʻakai maʻamaʻa, mo maʻu ha ngaahi kaungāmeʻa foʻou. Naʻe fiefia ʻa Meia ke sio ʻoku fiefia fakataha ʻa e tokotaha kotoa pē.
“Mālō!” Ko Seiteni ange ia ʻi he hili ʻa e pātí. “Naʻe fakafiefia ʻaupito ia.”
Ne malimali ʻa Meia. Naʻá ne fiefia ʻi heʻene lava ʻo tokoni kia Seiteni mo hono fāmilí ke nau ongoʻi ʻoku talitali lelei mo ʻofaʻi kinautolu. Naʻe ola lelei ʻa e paati fakakaungāmeʻá!
Ngaahi tā fakatātā ʻa Olga Lee