Ko e Makasini Fakafāmiliʻʻa Livi mo Melanií
Fai ʻe Livi P., taʻu 8, New Taipei City, Taiuani
Mālō hoʻomou lelei.
Ko hoku hingoá ko Livi. ʻOku ou taʻu 8 pē. Ne u fokotuʻu ha taumuʻa ke fakahoko e hisitōlia fakafāmilí. Naʻe fakakaukau ʻeku faʻeé ʻoku totonu ke u ʻai e ngaahi talanoa hoku fāmilí ke hoko ko ha makasini. Naʻá ku saiʻia mo hoku kiʻi tehina ko Melanií ʻi he foʻi fakakaukaú. Naʻe pau ke ma ngāue leva he taimi pē ko iá.
Maʻá e makasini ʻo Siulaí, ne ma ʻinitaviu ai e kau mēmipa homau fāmilí ʻoku hoko honau ʻaho fāʻeleʻí ʻi Siulaí. Ko ha niʻihi ʻeni ʻo e ngaahi fehuʻí: (1) Ko e hā e meʻaʻofa ʻaho fāʻeleʻi ʻokú ke saiʻia taha aí pea mo e meʻaʻofa ʻaho fāʻeleʻi ʻoku siʻisiʻi taha hoʻo saiʻia aí? (2) Ko e hā e faʻahinga ifo ʻo e foʻi keke ʻaho fāʻeleʻi ʻokú ke saiʻia taha aí? (3) Ko e hā ha ngaahi talanoa mahuʻinga nounou ki he moʻuí te ke lava ʻo vahevahe mo kitautolu?
Naʻa mau ngāue leva ʻi he makasini ʻo ʻAokosí. Ko e kaveingá ko e ʻAho ʻo e Tamaí. ʻUluakí, ne ma ʻinitaviu kotoa e ngaahi tamai ʻi homau fāmilí. Naʻá ma fehuʻi ange pe ko e hā e meʻaʻofa ʻo e ʻAho ʻo e Tamaí te nau fie maʻu tahá. Naʻá ma ʻinitaviu leva ha ngaahi foha ʻe toko fā ʻi he kāinga ofi tahá pea kole ange ke nau vahevahe ha ngaahi talanoa fekauʻaki mo ʻenau ngaahi tamaí. Naʻá ku saiʻia ke ngāue ʻi he makasini ko ʻení koeʻuhí ko e ngaahi talanoa fakaoli naʻe vahevahé.
ʻOku ou faʻa sio pē ki hoku kāinga ʻi he Taʻu Foʻou Faka-Siainá. Ka kuo tokoni hono faʻu ha makasini hisitōlia fakafāmilí ke u ʻiloʻi lelei ange ai kinautolu. ʻI he kamataʻangá naʻá ku manavasiʻi ke talanoa ki he kau mēmipa ʻo hoku fāmilí ʻa ia naʻe ʻikai ke u ʻiloʻi leleí. Ka ʻi he ʻalu ʻa e taimí, naʻe fakaʻau ke faingofua mo fakafiefia ange. ʻOku ou houngaʻia ʻi he fāmili kuo tāpuekina ʻaki au ʻe he Tamai Hēvaní.