Loto-toʻá
Ko e polokalama Palaimeli ʻeni he ʻahó ni, pea naʻe manavasiʻi ʻa Peleiteni. Naʻá ne ʻosi akoako mo fakahoko ʻene tafaʻakí. Ka naʻá ne manavasiʻi ke lea ʻi muʻa ki ha kakai tokolahi fau.
“ʻOku ʻikai ke u fie ʻalu au ki he lotú he ʻahó ni!” Ko Peleiteni ange ia. “ʻOku fuʻu fakailifia ke lea ʻaki ʻeku kongá.”
Naʻe fāʻofua atu kiate ia ʻene Fineʻeikí. “ʻOku ou ʻilo ʻe lava pē ke fakailifia ke lea ʻi he lotú. Ka kuo lahi hoʻo akoakó. ʻOku ou ʻilo te ke lava ʻo fai ia.”
“Fēfē nai kapau te tau lotu?” Ko e fehuʻi mai ia ʻa e Tangataʻeikí. “Te tau lava ʻo kole ki he Tamai Hēvaní ke tokoniʻi kitautolu ke tau ongoʻi loto-toʻa.”
Naʻe kamokamo pē ʻa Peleiteni.
Naʻe tūʻulutui hifo ʻa e Fineʻeikí, Tangataʻeikí mo Peleiteni ʻo kūnima.
Naʻe lotu ʻa e Fineʻeikí ʻo pehē, “ʻE Tamai Hēvani, kātaki ʻo tokoniʻi ʻa Peleiteni ke loto-toʻa. Tokoniʻi ia ke ne lava ʻo lea ʻaki ʻene kongá.”
Hili e lotú, naʻe heka hake ʻa Peleiteni ki he kaá, pea naʻa nau lele kotoa ki he lotú.
Naʻe ilifia ʻa Peleiteni ʻi heʻene tangutu ʻi muʻa fakataha mo e toenga ʻo e fānaú. Ka naʻá ne manatuʻi ʻa e lotú. Naʻe hanga ʻe he meʻa ko iá ʻo ʻai ke ne kiʻi ongoʻi lelei ange.
Naʻe ʻikai fuoloa kuo hoko e taimi ke lea ai ʻa Peleitení. Naʻá ne mamata atu ki he kakaí ʻoku nau malimali mai kiate ia. Naʻe ʻi ai ʻa e Fineʻeikí mo e Tangataʻeikí! Naʻá ne fakamānava loloa. Naʻá ne lea ʻaki leʻolahi mo mahino ʻene kongá. Naʻá ne manatuʻi ʻa e ngaahi leá kotoa.
Naʻe talaange ʻe he Fineʻeikí ʻi he tuku ʻa e lotú, “Naʻá ke fai ha ngāue lelei. ʻOku hangē naʻe tali mai ʻetau lotú.”
Naʻe malimali ʻa Peleiteni. “Naʻe tokoniʻi au ʻe he Tamai Hēvaní!”
Naʻa nau lue fakataha ki he kaá. “Naʻá ke ongoʻi fēfē nai ʻi he taimi naʻá ke ʻi loto aí?” Ko e fehuʻi ange ia ʻa e tangataʻeikí.
Naʻe pehē ʻe Peleiteni, “Naʻá ku kei ilifia pē, ka naʻe SAI pē ia. Pea naʻá ku ongoʻi fiemālie hili ʻeku lea ʻaki ʻeku kongá.”
Naʻe fehuʻi ange ʻe he Fineʻeikí, “ʻOkú ke ʻiloʻi nai pe ko e hā ʻa e ongo fakaʻofoʻofa ko iá?”
Naʻe kiʻi fakakaukau taimi nounou ʻa Peleiteni. “ʻOku ou tui ko e Laumālie Māʻoniʻoní ia.”
Naʻe pehē ange ʻe he Fineʻeikí, “ʻOku ou tui pehē foki mo au. Pea neongo naʻá ke ilifia, ka naʻe tokoniʻi koe ʻe he Laumālie Māʻoniʻoní ke ke loto-toʻa.”
Ngaahi tā fakatātā ʻa Adam Howling