Ko e Kau Paionia ʻi he Fonua Kotoa Pē
Ko e Fononga Lōloa ʻa Silivia ki he Temipalé
Naʻe ʻiloʻi ʻe Silivia ʻe ʻaonga e fonongá.
Naʻe hopohopo atu ʻa Silivia ki he loki Palaimelí ʻo tangutu ki lalo. Naʻá ne ongoʻi fiefia maʻu pē ʻi he Palaimelí.
Naʻe pukepuke hake ʻe Sisitā Lioha ha tā ʻo e temipalé. Naʻá ne pehē, “ʻE lava ke silaʻi kitautolu ʻi he temipalé ki hotau ngaahi fāmilí.” ʻOku ʻuhinga ia te tau lava ʻo nofo mo kinautolu ʻo taʻengata kapau te tau muimui ki he ngaahi fekau ʻa e ʻOtuá.”
Ne hiki hake ʻe Silivia hono nimá. Naʻá ne pehē ange, “Te u ʻalu ki he temipalé ke sila ki hoku fāmilí ʻi ha ngaahi ʻaho siʻi mei heni! ʻOku ou fuʻu fiefia lahi.”
Naʻe malimali ʻa Sisitā Lioha. “ʻE hoko ia ko ha fononga meʻalele lōloa kiate koe! Ka ʻoku ou ʻilo ʻe ʻaonga ia.”
Naʻe ʻikai ha temipale ʻi Sipeini, ʻa ia naʻe nofo ai e fāmili ʻo Siliviá. Ko ia kuo pau ke nau ʻalu meʻalele kotoa ki he temipale ʻi Suisalaní. ʻE ʻaho ʻe ua!
ʻI he pongipongi Tūsité, naʻe ʻā pongipongia ʻa Silivia. Naʻá ne tokoni ki heʻene ongomātuʻá ke fakaheka ʻenau utá ki he kaá. Kuo taimi ke nau lele ki he temipalé.
Naʻe feinga ʻa Silivia ʻi he loto kaá ke feohi lelei mo hono tokouá mo e kiʻi tuongaʻané. Naʻa nau fakahoko ha fanga kiʻi vaʻinga mo hivaʻi ha ngaahi foʻi hiva. Naʻe tā ʻe Papa ha lekooti ʻo e ngaahi fasi faka-Sipeini tuʻukimuʻá ʻi heʻenau fakaʻulí. ʻI he taimi naʻe helaʻia ai ʻa Siliviá, naʻá ne sio fakamamaʻu ki tuʻa he matapā sioʻatá. Naʻá ne sio ki he hokohoko ʻa e ʻotu moʻunga lanumatá kae ʻoua kuó ne tō ʻo mohe.
Kuo ʻosi ʻa e ‘aho ʻuluakí. Hangē ne u ongoʻi he ʻikai teitei ʻosi ʻa e fakaʻulí. Ka naʻe manatuʻi ʻe Silivia ʻa e meʻa naʻe lea ʻaki ʻe Sisitā Liohá. ʻE ʻaonga lahi ia, ko ʻene fakakaukaú ia.
Hili ha toe ʻaho ʻe taha ʻo e fakaʻulí, naʻe faifai pea fakatokangaʻi ʻe Silivia ʻa e taua hinehina ʻo e temipalé. “Ko ʻena!” Naʻá ne tuhu ki tuʻa he matapā sioʻatá. “Ko e temipalé ʻena!”
Naʻe pasipasi e kiʻi tuongaʻane ʻo Siliviá. Naʻe holoholoʻi ʻe Mama ʻa e loʻimata ʻo e fiefiá.
Naʻe talaange ʻe Papa, “Kuo tau fakahoko ia.”
Naʻe fetongi ʻa Silivia mo hono fāmilí ʻi he loto temipalé ki ha vala hinehina. Naʻe tangutu ha tokotaha ngāue temipale angalelei mo Silivia mo hono tokouá mo e tuongaʻané. Naʻá ne taki leva kinautolu ki he loki silá.
Naʻe fetapaki ʻa e māmá mei ha kilisitala. Naʻe tūʻulutui ʻa Mama mo Papa ʻi ha ʻōlita naʻe ʻufiʻufi ʻaki ha konga leisi molū. Naʻa na malimali.
Naʻe tūʻulutui ʻa Silivia, mo hono tuongaʻané, pea mo hono tokouá ʻi he tafaʻaki ʻo Mama mo Papá. Naʻe sio ʻa Silivia ki he ngaahi sioʻata lalahi ʻi he holisi ʻi honau tafaʻakí. Naʻe hokohoko atu pē ʻa e ʻatá. Na‘e fakafonu ʻe ha ongo‘i māfana ʻa hono lotó. Ko ʻeni ʻe lava ke silaʻi fakataha hono fāmilí ke taʻengata.
ʻI he hokosia e taimi ke nau foki ai ki ʻapí, naʻe toe foki ʻa Silivia mo hono fāmilí ki heʻenau kaá. Ko e niʻihi kinautolu ʻo e fuofua kāingalotu ʻo e Siasí mei Sipeiní ke ō ki he temipalé, pea naʻa nau hoko ai ko ha kau paionia!
ʻI heʻenau fakaʻuli atú, naʻe toe sio hake ʻa Silivia ki tuʻa he matapā sioʻatá. Naʻe malama ʻa e temipalé mei he langí ʻi he faʻahitaʻu māfaná. Naʻe ʻikai ke ne faʻa tatali ke toe foki mai ki he temipalé ʻi ha ʻaho.
Ko Sipeiní ko ha fonua lea faka-Sipeini ia ʻi he fakahihifo ʻo ʻIulopé.
ʻI he ʻaho ní, ʻoku ʻi ai ha temipale ʻi Metuliti, ko e kolomuʻa ia ʻo Sipeiní.
ʻOku tō ʻa e ʻōlivé ʻi Sipeini ʻo lahi ange ʻi ha toe fonua ʻi he māmaní.
Naʻe taʻu ono ʻa Silivia ʻi he taimi naʻe papitaiso ai ʻene ongomātuʻá.
Naʻá ne tokoni ʻi he Palaimelí ʻaki ʻene hoko ko ha tokotaha talitali kakai lelei mo talitali lelei ʻa e fānaú ʻi heʻenau aʻu atú.
ʻOku silaʻi ʻa Silivia he ʻahó ni ki hono husepānití mo e fānau ʻe toko tolú.