Maama Halaʻo e Vaʻinga Vitioó
Ko e hā ʻe lava ke fai ʻe Nētane ke aʻu ai ki he lanumatá?
Naʻe lomiʻi vave mo fefeka ʻe Nētane ʻaki hono ʻuluʻulutuhú ʻa e ngaahi meʻa lomi ʻi he mīsini ʻokú ne puleʻí (controller). Naʻá ne fuʻu ofi ʻaupito ke ikunaʻi e lēvolo ko ʻení! Naʻá ne sio fakamamaʻu ki he TV kae kalofi ʻe hono vaka lōketí ʻa e ngaahi meʻa lanumata naʻe puhi haké.
“Nētane, taimi ki he maʻu meʻatokoni efiafí!” Ko e ui atu ia ʻa e fineʻeikí.
Bam! Naʻe tuiʻi e vaka ʻo Nētané. Naʻe laulau ʻa Nētane. Kuo pau ʻeni ke ne toe kamata foʻou. Ka naʻá ne ʻiloʻi te ne lava ʻo ikunaʻi e tuʻunga ko ʻení kapau te ne toe feinga tuʻo taha pē.
Naʻe hū mai ʻa e Tangataʻeikí ki he lokí. “Naʻá ke fanongo nai ki he Fineʻeikí? Ko e taimi kai ʻeni.”
Naʻe māpuhoi ʻa Nētane peá ne kiʻi fakatatali ʻa e vaʻingá. Naʻá ne tangutu hifo mo e Tangataʻeikí mo e toenga ʻo e fāmilí. Naʻe kai ʻe Nētane ʻene meʻakaí ʻi he vave taha naʻá ne lavá. Naʻá ne fie foki ki heʻene vaʻingá.
“Mālō! Naʻe ifo ʻaupito ia.” Naʻá ne puna hake mei he tēpilé.
Naʻe pehē ange ʻe he Tangataʻeikí, “Māmālie hifo, siana. Ko au mo e Fineʻeikí ʻokú ma fie talanoa mo koe.”
ʻOiauē. Naʻe ʻi ai nai ha kovi ʻa Nētane?
ʻI he ʻosi e kai ʻa e toengá, naʻe nofo pē ʻa e Fineʻeikí mo e Tangataʻeikí mo Nētane ʻi he tēpilé.
Naʻe pehē ange ʻe he Tangataʻeikí, “Kuó ma fakatokangaʻi kuó ke fakamoleki ha taimi lahi ʻi he vaʻinga vitioó.”
Naʻe taʻe-fiemālie ʻa Nētane. “ʻOku fakafiefia moʻoni.”
Naʻe pehē ange ʻe he Fineʻeikí, “Moʻoni ia. Ka ʻoku fakafiefia foki mo ha ngaahi meʻa kehe. Naʻa mau ʻofa atu kiate koe ʻaneafi ʻi he taimi ne mau vaʻinga fakafāmili aí. ʻOku mau fiefia lahi ange maʻu pē ʻi he taimi ʻokú ke feohi ai mo kimautolú!”
Naʻe ngāue ʻa Nētane ʻi ha tuʻunga fakaʻofoʻofa ʻanepō. ʻI he taimi naʻá ne ikunaʻi ai iá, naʻe toki ʻosi e vaʻinga hono fāmilí. Naʻá ne ongoʻi loto mamahi ʻi he ʻikai ke ne maʻu iá.
Naʻe fakafulofula ʻa Nētane. “ʻOku ʻuhinga nai ʻeni ʻoku ʻikai ngofua ke u toe vaʻinga keimi vitiō?”
Naʻe talaange ʻe he Tangataʻeikí, “ʻOku ʻikai ko e meʻa ia ne ma lea ʻakí. ʻOkú ma fie maʻu pē ke ke ʻilo lahi ange ki he lahi ʻo e taimi ʻokú ke fakamoleki kiate kinautolú. Peá ke fakapapauʻi ʻoku ʻikai ke nau taʻofi koe mei he ngaahi meʻa mahuʻinga kehé, hangē ko e ngaahi ngāue fakaʻapí mo e ngāue fakaako mei ʻapí mo e ako folofolá.”
Naʻe sio pē ʻa Nētane ki lalo. “ʻOku ou tui kuó u tōmui ʻi ha ngaahi meʻa ʻe niʻihi.”
Naʻe pehē ange ʻe he Tangataʻeikí, “ʻOkú ma tui te ke lava ʻo ʻiloʻi ha founga ke fakapotupotutatau lelei ange ai.”
“Te ke lava nai ʻo tokoni mai?” Ko e fehuʻi ange ia ʻa Nētané.
Naʻe malimali ʻa e Fineʻeikí. “ʻIo.”
Naʻe fakakaukau fakataha ʻa Nētane, Fineʻeikí, mo e Tangataʻeikí ki he lahi ʻo e taimi vaʻinga vitiō ʻoku totonu ke maʻu ʻe Nētane he ʻaho takitaha. Ko ia naʻa nau faʻu ha palani. Naʻa nau tuku ha pousitā ʻo ha maama hala ʻi he tafaʻaki ʻo e TV. Kapau ʻe lava ʻa Nētane ʻo taʻofi ʻene vaʻingá ʻi he taimi ʻe ui ai ia ʻe he Fineʻeikí mo e Tangataʻeikí, ʻe lanu engeenga ʻa e maama halá. Kapau te na kole tuʻo lahi ange kiate ia, ʻe lanu kulokula. Pea kapau te ne lava ʻo taʻofi ʻiate ia pē kimuʻa peá na toki kolé, ʻe lanumata ia.
ʻI he pō kotoa kimuʻa peá na mohé, naʻá na talanoa fekauʻaki mo e founga naʻe fakahoko ʻe Nētane ʻi he ʻaho ko iá. Kapau naʻe kulokula ʻa e maama halá, ʻe siʻisiʻi ange hono taimi ke vaʻinga ai ʻi he ʻaho hono hokó. Ka ʻo kapau naʻe nofo pē ia ʻi he lanumatá, ʻe ʻave ia ʻe he Fineʻeikí mo e Tangataʻeikí ki he mūsiume vavaá!
Naʻe ʻiloʻi ʻe Nētane ʻe faingataʻa ke liliu ʻene tōʻonga moʻuí. Ka naʻá ne mateuteu ki he polé.
ʻI he ngaahi ʻuluaki ʻahó, naʻe kei engeenga pē ʻa e maama halá. Naʻe lōloa ange leva ʻa e vaʻinga ʻa Nētané, pea naʻe pau ke ʻalu ʻo kulokula. Naʻá ne fie maʻu ke toe feinga mālohi ange ʻi he taimi hokó. Ko ia ʻi he ʻaho hono hokó, naʻá ne fokotuʻu ha meʻa fakatokanga ke ne ʻiloʻi e fuoloa ʻo ʻene vaʻingá. Fāifai, peá ne ʻai ia ke lanumata!
Hili ha ngaahi ʻaho siʻi ʻo e lanumatá, naʻe ʻave ia ʻe he Fineʻeikí mo e Tangataʻeikí ki he mūsiume vavaá. Naʻe sio fakamamaʻu hake ʻa Nētane ki ha fuʻu lōketi lahi. Naʻe hangē ia ko e meʻa ʻi heʻene vaʻingá, ka naʻe toe kiʻi mahulu ange. Naʻá ne malimali. Naʻe fakafiefia ke ʻi heni mo e Fineʻeikí mo e Tangataʻeikí. Naʻá ne fie sio pe ko e hā hono fuoloa ʻene nofo ʻi he lanumatá!
Ngaahi tā fakatātā ʻa Carolina Farías