Kūkisi, Fāʻofua, mo e ʻOfa
Naʻe pehē ange ʻe ʻEva, “He ʻikai tatau ʻa e Kilisimasí ʻi he taʻú ni.”
Naʻe tuʻu ʻete ʻa ʻEva ʻaki hono louhiʻi vaʻé. Naʻá ne ala hake ki he puha ʻi he kōpaté.
Naʻá ne pehē mai, “ʻOsi maʻu ia!”
Naʻá ne fakaava ʻa e puhá. Naʻe ʻi loto ha fanga kiʻi fakatātā iiki ʻo e ʻAloʻí naʻe ngaohi mei he ʻumea kulokulá. Naʻá ne toʻo hake kinautolu ki tuʻa pea tuku fakalelei ʻa e pēpē ko Sīsuú ʻi he ʻaiʻangakai ʻo e manú.
Pea naʻe taimi leva ke teuteuʻi ʻa e fuʻu ʻakau Kilisimasí. Naʻe tokoni ʻa ʻEva kia Mama mo hono kiʻi tuongaʻane siʻisiʻi ko Nefí ke tautau ha ngaahi maama mo e manzanillas. Naʻe saiʻia ʻa ʻEva ʻi he namu-lelei ʻo e fanga kiʻi fuaʻiʻakau engeengá. ʻI he foki mai ʻa Papa ki ʻapí, naʻá ne tokoni kia ʻEva mo Nefi ke fokotuʻu ʻa e foʻi fetuʻú ʻi ʻolunga ʻi he fuʻu ʻakaú.
Naʻe fiefia ʻa ʻEva ʻi he taʻú ni he naʻe tatau pē ha niʻihi ʻo ʻenau tukufakaholo faka-Kilisimasí. Naʻe ongo kehe ʻa e meʻa kotoa pē.
ʻI he ngaahi uike siʻi kuo hilí, ne tō ha afā ʻi honau koló ʻi Kuatemala. Naʻe fakaʻauha ʻe he ʻuhá mo e matangí ha ngaahi fale lahi. Naʻe kei nofo pē ha kakai ʻe niʻihi ʻi ha ngaahi fale hūfanga. Pea naʻe puke ha kakai tokolahi koeʻuhí ko e vailasi COVID-19.
ʻI he efiafi kimuʻa he Kilisimasí, naʻe haʻu ai e ngaahi mehikitangá, faʻētangatá, mo e kāinga ʻo ʻEvá ki ha paati lahi. Naʻe pau ke ʻā fuoloa ʻa ʻEva mo Nefi. Naʻa nau ngaohi ponisia (inu huʻi) fakataha mo honau ngaahi mehikitangá mo vaʻinga mo honau ngaahi kāsiní. ʻI he tuʻapoó, tuʻuapoó naʻe hū kotoa ki tuʻa ʻa e tokotaha kotoa pē ki he halá, tutu e ʻoné, mo fāʻofua ki he ngaahi kaungāmeʻá mo e ngaahi kaungāʻapí.
Ka ʻi he taʻú ni, naʻe ʻikai lava ke haʻu e kau mēmipa honau fāmilí ʻo ʻaʻahi mai. Pea he ʻikai ke ʻi ai ha fāʻofua ʻi he halá ʻi he Efiafi Kimuʻa ʻi he Kilisimasí.
Naʻe ongoʻi loto-mamahi ʻa ʻEva ʻi he ngaahi meʻa fakafiefia kotoa pē ʻe mole meiate iá. Naʻá ne pehē, “He ʻikai tatau ʻa e Kilisimasí ʻi he taʻú ni.”
Naʻe kamokamo pē ʻa Papa. “ʻOku ʻi ai ʻa e faikehekehe. Ka ʻoku ou maʻu mo Mama ha fakakaukau te ne fakafiefiaʻi koe.”
Naʻe pehē ange ʻe Mama, “Ko e Kilisimasí ʻoku fekauʻaki ia mo e foakí. Te ke fie tokoni mai ke tau fakatau ha meʻakai maʻá e ngaahi fāmili ne mole honau ngaahi ʻapí ʻi he afaá?”
“SAI IA!” Ko ʻEva ange ia. Ne kamokamo pē ʻa Nefi.
Naʻe ʻalu ʻa ʻEva mo Nefi mo Mama ki he falekoloá. Naʻe tokoni ʻa ʻEva ke faʻo e meʻakaí ʻi ha ngaahi kato faʻoʻanga meʻakai. Fakafokifā kuó ne maʻu ha foʻi fakakaukau!
Naʻá ne pehē ange, “Mama, te ke lava nai ʻo tokoni kiate au mo Nefi ke taʻo kūkisi maʻá e fānau ʻi he fale hūfangá? Te tau lava ʻo ʻave kinautolu ʻi he taimi ʻoku tau tufa ai e meʻakaí!”
Naʻe loto ki ai ʻa Mama. Naʻe fakaʻaongaʻi ʻe ʻEva, Nefi, mo Mama ha ngaahi ʻaho lahi ʻo taʻo kūkisi fakataha. Naʻe faʻo ʻe ʻEva mo Nefi ʻa e kūkisí ki ha fanga kiʻi tangai pelesitiki pea haʻi kinautolu ʻaki ha ʻū līpine. Naʻá na tui leva hona ongo meʻa maluʻi mānavá pea lue atu mo Mama mo Papa ki he fale hūfanga naʻe nofo ai e ngaahi fāmilí.
Naʻe pehē ʻe Nefi, “ʻOku tokolahi e fānau ʻoku ʻi hení.” “E feʻunga nai ʻetau kūkisi kūkisí?”
“ʻOku ou fakaʻamu ʻoku feʻunga pē. Naʻe talaange e ʻEva, “Tau fai ha lotu.” Naʻa nau kuikui honau matá. Naʻe lotu leʻo siʻi leva ʻa ʻEva, “Tamai Hēvani, fakamolemole ʻo tokoniʻi kimautolu ke lava ʻa e taha kotoa pē heni ʻo ongoʻi Hoʻo ʻofá.”
Naʻe tuʻu laine ʻa e fānau fānaú ʻi he fale hūfangá. Naʻe ʻoange ʻe ʻEva mo Nefi ha kofukofu kūkisi maʻá e fānaú takitaha. Naʻe feʻunga lelei pē mo e tokotaha kotoa!
ʻI heʻenau lue ki ʻapí, naʻe ʻikai ke toe ongoʻi lotomamahi ʻa ʻEva. Naʻá ne fofonga malimali. Naʻe ʻikai ke ne lava ʻo fāʻofua ki hono ngaahi kaungāmeʻá ʻi he Efiafi Kimuʻa ʻi he Kilisimasí. Ka naʻe hangē ʻa e kofu kūkisi takitaha ko ha fāʻofua mei hono lotó.
ʻOku lea ʻaki ʻe ʻEva mo Nefi ha lea fakafonua naʻe ui ko e Qʼeqchiʼ. ʻOku nau fiefia ʻoku langa ha temipale foʻou ʻi Kopeane, ofi ki honau ʻapí!
Ngaahi tā fakatātā ʻa Jimmy Holder