Ko e Fetu‘u ‘o e ‘Alo’í
Ko e hā ha konga ʻe lava ke fakahoko ʻe Keiteni ʻi he ʻAloʻí?
Ko e efiafi ʻeni kimuʻa ʻi he Kilisimasí. Naʻe ʻuhinga ia kuo taimi ki he tulama ʻAloʻi ʻa e fāmilí! Naʻe hoko hono fakatātaaʻi ʻo e talanoa ʻo hono ʻaloʻi ʻo Sīsū Kalaisí ko e taha ʻo e ngaahi tukufakaholo Faka-Kilisimasi lelei taha ʻa Keitení.
Naʻe toʻo hake ʻe Teti ʻa e puha ʻo e ngaahi teungá. Naʻá ne fehuʻi ange ki he tehina mo e tuofefine ʻo Keitení, “Ko hai ʻokú ke fie fakatātaaʻi he taʻu ní?”
“Te u hoko ko Siosefa!” Ko Kalānite ange ia. Naʻá ne ala hifo ki he puhá ʻo toʻo hake ha ngaahi teunga.
Naʻe fehuʻi ange ʻe ʻAna, “ʻE lava ke u hoko ko Mele?” Naʻe kamokamo pē ʻa Mami mo ʻoange ki ai ha tamapua. Naʻe kofukofuʻi fakalelei ʻe ʻAna ʻa e tamapuá ʻaki ha sipi kafu pea tuku ia ki ha kiʻi puha hangē ha ʻaiʻangakai ʻo e manú.
Naʻe malimali ʻa Keiteni. Naʻe fie fakatātaaʻi ʻe ʻAna ʻa Mele ʻi he taʻu kotoa pē.
Naʻe pehē ange ʻe Pulaieni ko e tuofefine lahi ʻo Keitení, “Te u hoko ko ha tauhisipi.” Naʻá ne toʻo mai ha monumanu ngaohi mei he tupenú. “Pea ʻe hoko ʻeni ko ʻeku sipí.”
Naʻe pehē ange ʻe Teti, “ʻE hoko ʻa Mami ko ha ʻāngelo fakaʻofoʻofa.”
Naʻe malimali ʻa Mami. “Vakai ki he founga fakapotopoto ʻa Tetí? Te ne lava ʻo hoko ko ha Tangata Poto lelei.”
“Oku fie maʻu ke hoko ha taha mālohi ko e ʻasí.” Naʻe faoʻi ʻe Sīkoti, taʻokete ʻo Keitení ʻa hono ngaahi uouá. “Mahalo ko au ia”
“Fēfē koe Keiteni?” Ko e fehuʻi ange ia ʻa Tetí. “Ko e hā e konga ʻokú ke fie maʻu ke ke fakatātāʻí?”
Naʻe fakalongolongo pē ʻa Keiteni. Fakafokifā kuó ne maʻu ha foʻi fakakaukau.
Naʻá ne lele ke toʻo e sipi lanu engeengá mei hono mohengá. Naʻá ne hiki hake ia ke sio ki ai ʻa Teti. “Ko ha konga ia kuo teʻeki ke tau maʻu kimuʻa. ʻOku ou fie hoko ko e fetuʻú. Ko e taha ʻokú ne fakahaaʻi ʻa e hala kia Sīsuú.”
Ne pehē ange ʻe Teti, “Ko ha fakakaukau lelei ia.”
Naʻa nau tui kotoa honau teungá. Naʻe pulupulu ʻe Keiteni ʻa e sipi lanu engeengá ʻi hono umá. Pea lau leva ʻe Teti ʻa e talanoá mei he folofolá.
Naʻe malimali ʻa Keiteni ʻi he mafao atu ʻe Sikoti hono ongo nimá mo tūʻulutui ʻo hoko ko e ʻasí. Naʻe fakaheka e Teti ʻa ʻAna ʻi hono tuʻá ke hoko ko Mele. Naʻe feinga ʻa Kalānite, ʻa ia ko Siosefá, ke pukepuke ia ʻi heʻena lue takai he lokí. Naʻe fanongo fakalelei ʻa Keiteni. Naʻá ne ʻiloʻi ʻe hoko mai ʻene kongá.
“Pea vakai, ʻe hopo hake ha fetuʻu foʻou.” ko e lau ia ʻe Tetí.
Naʻe tuʻu hangatonu ʻa Keiteni mo mafao lahi atu hono ongo nimá. Naʻá ne fakakaukau ki he fetuʻu naʻe ulo ʻi Pētelihemá. Naʻá ne fie tokoni ki he kakaí ke nau ʻilo ʻa Sīsū, ʻo hangē ko ia naʻe fai ʻe he fetuʻú ʻi he ʻuluaki pō Kilisimasi ko iá.
Ngaahi tā fakatātā ʻa Agnes Saccani