Kaumeʻa ki he Kaumeʻa

Ngaahi Meʻafoaki ke Vahevahé

Fai ʻe Sisitā Miseli D. Kuleiki

Tokoni ʻUluaki ʻi he Kau Palesitenisī Lahi ʻo e Kau Finemuí

Naʻe toʻo mei he “Ngaahi Meʻaʻofa ʻOku Siʻisiʻi Ange Hono ʻIló” (fakataha lotu Faka-Kilisimasi ʻa e Kau Palesitenisī ʻUluakí, 5 Tīsema 2021), broadcasts.ChurchofJesusChrist.org.

Naʻe fakaʻamu maʻu pē ʻeku kui tangatá ke ne tā e vaioliní. Ka naʻe tuku pē ʻene vaioliní ʻo ʻikai ke fakaʻaongaʻi pea efua ʻi heʻene funga laupapá. Naʻá ne ʻomi leva ia kiate au, pea naʻe tuku ia ʻi ha ngaahi taʻu lahi ʻo ʻikai fakaʻaongaʻi ʻi heʻeku funga laupapá. Naʻe ʻikai ke u teitei ako ke tā ia.

Ka ʻoku ʻi ai ha vaiolini hoku mokopuna fefine ko Sikāletí ʻokú ne manako ke tā. ʻOkú ne manako ke ako ha ngaahi hiva foʻou. Mahalo he ʻikai ke ne tā lelei ʻaupito kinautolu, ka ʻokú ne akoako mo feinga mālohi. ʻOku ʻomi ʻe heʻene meʻafoaki ʻo e mūsiká ha fiefia ki he niʻihi kehé. Pea ʻokú ne tāpuakiʻi ia ʻi heʻene foakí.

ʻOku tau maʻu kotoa ha ngaahi meʻafoaki fakalaumālie. ʻOku ʻikai faingofua maʻu pē ke fakatokangaʻi e ngaahi meʻafoaki ko ʻení. Ka ʻoku foaki mai ia ʻe he Tamai Hēvaní kiate kitautolu takitaha koeʻuhí he ʻokú Ne ʻofa ʻiate kitautolu. ʻOkú Ne finangalo ke tau vahevahe ʻetau ngaahi meʻafoakí.

ʻOku kau ʻi he ngaahi meʻafoaki ko ʻení ʻa e fakafanongó, feohí, fetauhiʻakí, ʻikai fekumi ki he meʻa ʻoku fehalaaki ʻi he niʻihi kehé, pea mo e kolea e tokoni ʻa e ʻOtuá. Taimi ʻe niʻihi ʻoku ʻikai ke tau fakamahuʻingaʻi pe vahevahe ʻetau ngaahi meʻafoakí. Mahalo ʻoku tau manavasiʻi naʻa ʻikai ke nau haohaoa ʻo hangē ko ia ʻoku tau fie maʻú. Ka ʻo kapau he ʻikai ke tau vahevahe ʻetau ngaahi meʻafoakí, ʻe mole meiate kitautolu ha faingamālie ke faitāpuekina e fānau ʻa e ʻOtuá. ʻOku mole meiate kitautolu ha faingamālie ke ongoʻi e ʻofa ʻa e ʻOtuá.

ʻOua ʻe tuku taʻe-fakaʻaongaʻi ʻa e ngaahi meʻafoaki ʻa e ʻOtuá kiate koé, naʻa mo ʻEne ngaahi meʻafoaki īkí. Foaki ia ki he ʻOtuá pea ki Heʻene fānaú. Ko e ngaahi meʻafoaki ʻoku tau maʻu mei heʻetau Tamai Hēvaní, ʻoku ʻuhinga ia ke tau vahevahe atu.

Tā fakatātaaʻi ʻe Anna Godeassi