Ko e Faiako Fo‘oú
Naʻe saiʻia ʻa ʻAna ʻi he ʻalu ki he kalasi Sanipīmí. Naʻá ne saiʻia ʻi heʻene ongo faiakó, ʻa Brother mo Sisitā Lī. Naʻá ne saiʻia ʻi he ngaahi lēsoni fekauʻaki mo Sīsuú. Naʻá ne saiʻia ʻi heʻene ʻiloʻi e fakalea ʻo e ngaahi hivá.
Ka ko ʻeni he ʻikai ke ne toe ʻi he kalasi Sanipīmí. ʻI he ʻaho ní te ne kau ʻi ha kalasi Palaimeli foʻou. Te ne maʻu ha kau faiako foʻou. Te ne tangutu ʻi ha ʻotu foʻou ʻi he taimi hivá. ʻE ʻi ai hano loki ako foʻou.
Naʻe manavasiʻi a ʻAna. Naʻá ne fie tangutu fakataha mo Sisitā Lī. Naʻá ne feinga ke ʻoua ʻe tangi ʻi heʻene hū atu ki he loki Palaimelí.
Naʻe malimali ange ha taha ʻo ʻene ongo faiako foʻoú kiate ia. “Mālō e lelei, ko Sisitā Polo au. Ko hai ho hingoá?”
Naʻe pehē ange ʻe ʻAna, “Ko ʻAna au.”
Naʻe tātaaʻi ʻe Sisitā Polo ʻa e sea ʻi hono tafaʻakí. “Te ke fie tangutu ʻi hoku tafaʻakí?” Ko e fuofua taimi ʻeni ke u ʻi he Palaimelí ai.”
Naʻe tangutu hifo ʻa ʻAna ʻi he tafaʻaki ʻo Sisitā Poló. “Te u lava ʻo tokoni atu. ʻOku ou ʻiloʻi kotoa e ngaahi hivá!”
“Naʻe pehē ange ʻe Sisitā Polo, “Mālō.” “Ko ha tokoni lahi ia.”
Ne ʻikai fuoloa kuo hū mai hono kaungāmeʻa ko Petí. Naʻá ne ʻi he kalasi Sanipīmí mo ʻAna ʻi he taʻu kuo ʻosí. Naʻe tangutu ʻa Peti ʻi he tafaʻaki ʻo ʻAná.
Naʻe talaange ʻe ʻAna kia Sisitā Polo, “Ko Peti ʻeni.”
Naʻe malimali pē ʻa ʻAna. Naʻá ne saiʻia ʻaupito ʻi heʻene kalasi Palaimeli foʻoú!
Tā fakatātaaʻi ʻe Toby Newsome