Ko e Ngaahi Fakataipe ʻo e Kilisimasí
Ko ha ʻekitivitī faka-Kilisimasi ʻeni te ke lava ʻo fakahoko maʻá e pō fakafāmilí!
1
Ko e Kilisimasí ko ha taimi makehe ia ʻo e taʻú. ʻOku tau hivaʻi ha ngaahi hiva fakafiefia. ʻOku tau teuteuʻi hotau ngaahi ʻapí. Pea ʻoku tau fefoakiʻaki e ngaahi meʻaʻofá. ʻOku fonu ʻi he fiefia! Ka ʻoku ʻi ai foki ha ʻuhinga makehe ʻo e ngaahi meʻaʻofá mo e ngaahi teuteu fakalanulanú. ʻOku nau fakamanatu mai kiate kitautolu ʻa Sīsū Kalaisi, Hono ʻaloʻí, mo e meʻa kotoa pē naʻá Ne foaki mai kiate kitautolú. ʻOku nau tokoniʻi kitautolu ke tau manatuʻi ʻa e ʻuhinga totonu ʻoku tau fakamanatua ai ʻa e Kilisimasí.
Hiva: “ʻI he Fale ʻo e Fanga Manú” (Tohi Hiva ʻa e Fānaú 25)
2
ʻOku maʻu ʻe he kakaí ʻi he funga ʻo e mamaní ha ngaahi fuʻu ʻakau Kilisimasi. ʻOku teuteuʻi ʻe ha kakai ʻe niʻihi ha ngaahi fuʻu mango pe ngaahi fuʻu siaine. ʻOku fakaʻaongaʻi ʻe ha kakai tokolahi ha fuʻu ʻakau ʻoku ʻikai ke fakatō lau. ʻOku lanumata maʻu pē ha fuʻu ʻakau ʻoku ʻikai fakatō lau ʻi he taʻú. ʻE lava ke ne fakamanatu mai kiate kitautolu ʻoku foaki mai ʻe Sīsū ʻa e moʻui taʻengatá.
3
Ko e lanu kulokulá ko ha fakataipe mahuʻinga foki ia ʻo e Kilisimasí. ʻE lava ke tokoniʻi kitautolu ʻe he kulokulá ke tau manatuʻi ʻa e Fakalelei ʻa e Fakamoʻuí mo e taʻataʻa naʻá Ne lilingi maʻatautolu takitahá. ʻE lava foki ke ne tokoniʻi kitautolu ke tau hanganaki atu ki Heʻene Hāʻele ʻAnga Ua Maí, ʻi he taimi te Ne tui ai ha pulupulu kulokulá!
4
Ko engaahi foʻi lole tokotokóʻoku hangē ha tokotokó ʻoku hangē ia ko e ngaahi vaʻakau ʻoku fakaʻaongaʻi ʻe he kau tauhisipí ke tataki ʻaki ʻenau fanga sipí. Te nau lava ʻo fakamanatu mai kiate kitautolu ʻa e kau tauhisipi ne omi ke mamata ki he pēpē ko Sīsuú. Te nau lava foki ʻo fakamanatu mai ko Sīsū Kalaisi ʻa e Tauhisipi Leleí. Te Ne tataki kitautolu ki he malú mo e melinó.
5
ʻOku ʻi he feituʻu kotoa pē ʻa e māmá ʻi he Kilisimasí. ʻOku nau hangē ko e fetuʻu naʻe ulo ʻi he langí ʻi he taimi naʻe ʻaloʻi ai ʻa Sīsū Kalaisí. Naʻe muimui e kau tauhisipí mo e Kau Tangata Potó ʻi he foʻi fetuʻú ke kumi Ia. Te tau lava ʻo fili ke muimui foki ʻiate Ia.
Hiva: “Ngaahi Fetuʻu Ne Uló” (Tohi Hiva ʻa e Fānaú, 24)
6
ʻOku tā ʻa eNgaahi Fafangú ke tala ʻa e ongoongo ʻoku leleí. ʻE lava ke fakamanatu mai ʻe he ngaahi fafangu ʻi he Kilisimasí ʻa e ongoongo fakafiefia ʻo e ʻaloʻí mo e Fakalelei ʻa Sīsū Kalaisí.
7
Naʻe foaki ʻe he Kau Tangata Potó ha ngaahi meʻaʻofa kia Sīsū. ʻOku tau foaki foki mo ha ngaahi meʻaʻofa ʻi he Kilisimasí. Te nau lava ʻo fakamanatu mai kiate kitautolu ʻa e ngaahi meʻa fakaʻofoʻofa kotoa pē ʻoku foaki mai ʻe he Tamai Hēvaní mo hotau Fakamoʻuí kiate kitautolú. Manatuʻi ko Sīsū ʻa e meʻaʻofa moʻoni ʻo e Kilisimasí!
8
ʻOku mau fakatauange ʻe fakafonu kimoutolu ʻe he ngaahi māmá, ngaahi teuteú, mo e fiefia ʻo e Kilisimasí ʻaki ʻa e fiefia mo e māfana. ʻOfa ke nau takitaha fakamanatu atu kiate kimoutolu ʻa Sīsū Kalaisi mo e meʻa kotoa pē ʻokú Ne fai maʻatautolú. Ke Mou Maʻu ha Kilisimasi Fiefia!
Hiva: “Fiefia ki Māmani,” (Ngaahi Himí, fika 110)
Ngaahi tā fakatātā ʻa Thomas S. Child