Ko e Teti Pea Lanu Vāletí
Naʻe ʻikai saiʻia ʻa Liami ʻi heʻene meʻaʻofa Kilisimasí.
ʻI he pongipongi Kilisimasí, naʻe ʻā pongipongia hake ʻa Liami. Naʻá ne hola ki he loto falé mo hono ongo tuofāfine iiki ko Holi mo Selá. Naʻe tautau fakaʻotu ai ha ʻū sitōkeni tuitui pē ʻi ʻapi ʻe fitu. Ko e niʻihi naʻe iiki mo fālahi. Naʻe lōloa mo manifi ha niʻihi. Pea naʻe fuʻu motuʻa ʻa e niʻihi pea kamata ke mole honau lanú. Ka ko e meʻa mahuʻinga taha kia Liamí naʻe fonu ʻa e sitōkení ʻi ha ngaahi lole ifo.
Naʻe toʻo ʻe Liami ʻene sitōkení ʻo fakatūʻulu ki lalo. Naʻá ne mata fehuʻia. Naʻe ʻi ai ha lole tokotoko ʻe taha naʻe hangē ha tokotokó, foʻi moli ʻe taha, mo ha falukunga lole ʻe taha.
Naʻá ne fehuʻi ange, “Ko ʻeni pē ia?”
Naʻe fofonga fehuʻia foki mo Holi mo Sela. Naʻe malimali leva ʻa Liami. Mahalo ʻe ʻuhinga ʻeni ʻe lelei ʻaupito ʻene meʻaʻofá! Naʻá ne fakaʻamu ko e vaʻinga vitiō foʻou ko ia naʻe vaʻinga kotoa ʻaki hono ngaahi kaungāmeʻá.
Ka ʻi he taimi naʻe faifai pea fakaava ai ʻe Liami ʻene meʻaʻofá, naʻe fakautuutu pē ʻene loto-mamahí. Ko ʻene meʻaʻofá ko ha teti pea lanu vāleti. Naʻe ngaohi nima pē, pea naʻe lanu ʻuliʻuli hono kanoʻimatá mo e kiʻi malimali.
Naʻe malimali ange ʻa Mami mo pehē ange, “Kilisimasi Fiefia, Liami”.
Naʻe ʻikai ke malimali ʻa Liami. Naʻe ʻikai ko e meʻaʻofa ʻeni naʻá ne fie maʻú.
Naʻe maʻu foki ʻe hono ongo tuofāfine īkí ha fanga monumanu tupenu naʻe fakafonu, pea pehē foki ki hono ngaahi tuofāfine lalahi ange ʻe toko tolú. Ka naʻe ʻikai ke ne ʻai a Liami ke ne ongoʻi fiemālie ange ai. Ko e Kilisimasi kovi tahá ʻeni!
Naʻe ʻeke ange ʻe hono tuofefine lahi ko ʻĒliní hili e maʻu meʻatokoni pongipongí, “Ko e hā e meʻa ʻoku hokó? Kuó ke anga fakafaingataʻa he pongipongí ni.”
Naʻá ne pehē, “ʻOku ʻikai ke u fuʻu saiʻia au ʻi heʻeku meʻaofá. Ko ha kiʻi teti pea pē ia naʻe ngaohi ʻe Mami. Ko e hā naʻe ʻikai ke ne ʻomi ai ha meʻa naʻá ku fie maʻú?”
Naʻe malimali ʻa ʻĒlini. “Haʻu mo au.”
Naʻá ne ʻave ia ki he loki mohe ʻo Mamí peá ne tuhu ki he mīsini tuitui motuʻa ʻi he tēpilé.
Naʻá ne pehē ange, “Ko e mīsini tuitui ʻa Mami.” “Ko e hā leva?”
“Ko e hā mo ha toe meʻa ʻokú ke fakatokangaʻi?”
Naʻe fakafulofula ʻa Liami. Naʻá ne sio ki ha ngaahi foʻi hui tuitui, filo lanu kehekehe, mo ha ngaahi konga tupenu kuo pelupelu. Naʻá ne fakatokangaʻi foki ha tangai meʻa molū, fakaʻofoʻofa mo molū hangē ha ʻaó.
Naʻe talaange ʻe ʻĒlini, “ʻOku ou ʻiloʻi naʻá ke fie maʻu ʻa Mami ke ne fakatau atu ha meʻa kehe ki he Kilisimasí. Ka ʻoku ʻikai ke tau maʻu ha paʻanga ki ai. ʻOku ou saiʻia he teti pea naʻe ngaohi e Mami maʻakú. ʻOkú ne fakahaaʻi ʻene ʻofa lahi ʻiate aú.”
“Ko e hā hoʻo ʻuhingá?”
“ʻOku fie maʻu ha taimi ke ngaohi ai ha meʻa vaʻinga tupenu. ʻOku fie maʻu ki ai ʻa e faʻa kātakí. Naʻe tangutu ʻa Mami ʻi he tēpile ko ʻení ʻi ha ngaahi houa lahi ʻo ngaohi ha meʻa-vaʻinga maʻatautolu takitaha. Naʻá ne fakapapauʻi ʻoku tau maʻu takitaha ha meʻaʻofa. ʻOkú ke pehē ʻoku ʻuhinga ia ʻokú ne ʻofa ʻiate kitautolu?”
Naʻe ala ʻa Liami ki he tupenu lanu vāleti naʻe fakaʻaongaʻi ʻe Mami ke ngaohi ʻaki ʻene teti peá. Mahalo pē naʻe moʻoni ʻa ʻĒlini. Ko e meʻaʻofá naʻe ʻikai fie maʻu ia ke fakaʻofoʻofa ke toki hoko ko ha meʻaʻofa lelei. Naʻe ʻilo ʻe Liami ʻi he Palaimelí ko Sīsū ʻa e meʻaʻofa maʻongoʻonga tahá, pea naʻe ʻaloʻi ʻa Sīsū ʻi ha fale tauhiʻanga ʻo e fanga monumanú.
Naʻe lele ʻa Liami ke kumi ʻa Mami. Naʻá ne fāʻofua ki ai. Naʻá ne pehē ange, “Fakamālō atu koeʻuhí ko e teti peá.”
Naʻe ʻikai ke ne fakakaukau ʻoku fuʻu ngalivale e teti peá he taimí ni. Neongo kapau naʻe ʻikai ha meʻaʻofa, ka naʻá ne ongoʻi e ʻofa ʻa hono fāmilí. Pea naʻe ngaohi ia ko ha Kilisimasi makehe.
Ngaahi tā fakatātā ʻa Debby Rahmalia