Ako Faka-Kilisimasí

Ko ha ngaahi meʻaʻofa makehe ʻeni te ke lava ʻo ngaohi ʻi he Kilisimasi ko ʻení!

Champurradas

Ko e kūkisi ko ʻení mei Kuatemala! Ko ha founga ʻeni te ke lava ʻo ʻahiʻahiʻi ʻi ʻapi.

ipu mahoaʻa ʻe 3 1/2

sēpuni lahi (tbsp) ʻe 2 ʻo e pauta taʻo (baking powder)

māsima sēpuni tī ʻe 1

ipu pata ʻe 1, kuo molū

ipu suka ʻe 1

foʻi fuaʻimoa ʻe 3

ngaahi tengaʻi sīsemī (fili pē)

1. Mili ke fio fakataha ʻa e mahoaʻá, pauta taʻó, mo e māsimá.

2. Heu ʻa e patá mo e suká ke na fio ʻi ha poulu kehe. Heu tahataha e fuaʻimoá ki ai.

3. Tānaki atu ʻa e mahoaʻa kuo fefiohí ki he pata kuo heú. Heu pē kae ʻoua kuó na fefiohi lelei. ʻUfiʻufiʻi mo fakamokomokoʻi ʻi ha miniti ʻe 30.

4. Fakafuopotopotoʻi ʻa e toú ki ha ngaahi foʻi pulu, pea lomiʻi leva kinautolu ke lafalafa. Kapau ʻokú ke fie tānaki atu ha ngaahi tengaʻi sīsemī, vali ʻa e konga ki ʻolunga ʻo e kūkisi takitaha ʻaki ʻa e fuaʻimoá pea afuhi ʻaki e ngaahi tengaʻi sīsemií ʻi ʻolunga.

5. Taʻo ʻi he māfana ʻo e 350°F (180°C) ʻi ha miniti ʻe 20 pē kae ʻoua leva kuo lanu melomelo koula e ngaahi tapá.

Ngaahi Fetuʻu Iiki Pepa

1. Kosikosi ha ʻū laʻipepa, meimei ʻinisi ʻe 8 1/2 (senitimita ʻe 21.5) hono lōloá pea ʻinisi ʻe 1/2 (senitimita ʻe 1) hono fālahí.

2. Pelu fakafuopotopoto e ngataʻanga ʻe taha ʻo ha laʻipepa takai ʻo hangē ha loufaú.

3. Mono ʻa e ngataʻanga ʻo e laʻipepá ki he foʻi pelú, hangē ha fakaponá. Fusi ke maʻu, kae tokanga ke ʻoua naʻa mahae ʻa e laʻipepá.

4. Lomiʻi ʻa e foʻi fakaponá ke lafalafa pea fakahū ʻa e kiʻi muiʻi pepá ki he taha ʻo e ngaahi haʻí.

5. ʻE ʻi ai ha tapa ʻe nima ʻo e fakapona ko ʻení.

6. Takaiʻi leva e toenga e laʻipepá ʻi he fuo kuo faʻú. ʻOku totonu ke faingofua pē hono peluki ki he feituʻu totonú.

7. Fakahū ʻa e ngataʻanga ʻo e hikú ki he taha ʻo e ngaahi pelú.

8. Kiʻi fakamanumi fakalelei e tafaʻaki takitaha kae pupula hake ʻa e foʻi fetuʻú. Hokohoko atu hono ngaohi ʻo e ngaahi fetuʻú ki he lahi taha te ke fie maʻú!

Te ke lava ʻo fakafonu ha kato pe hina ʻaki ʻa e ngaahi fetuʻu ko ʻení pea tānaki atu ha kiʻi tohi lelei ke fakafiefiaʻi ʻaki ha taha!

Ko e ʻAloʻí he Peleti Pepa

Ngaohi hoʻo ʻAloʻí mei he ʻū lauʻi peleti pepá! Ko e ngaahi fakahinohino ʻeni kia Mele mo e pēpē ko Sīsuú. Hokó, ngaohi ha Siosefa, kau ʻāngeló, kau tauhisipí, mo e Kau Tangata Potó!

1. Peluki e tafaʻaki ʻe taha ʻo ha peleti pepa ki ha sipaʻilā.

2. Peluki ʻi he tafaʻaki ʻe tahá ha sipaʻilā tatau ke ʻasi e peletí hangē ha tapatolú.

3. Kosi ʻo toʻo ha foʻi siakale pepa ko ha ʻulu. Tā ha fofonga ʻi he siakalé.

4. Tepiʻi, kuluuʻi, pe siteipoloʻi e foʻi ʻulú ʻi ʻolunga he tapatolú.

Ke ngaohi ʻa e pēpē ko Sīsuú: Peluki hake ʻa e vahe tolu e taha ʻo e peletí. Peluki leva ki loto ʻa e ʻū tafaʻakí pea kuluuʻi ke tuʻu maʻu. Kosi ʻo toʻo ha foʻi siakale ki he ʻulú pea tā ai ha fofonga. Mono ia ki he pelu ʻi ʻolungá kae lava e fofongá ʻo fakasiosio mai mei he “sipi kafú.”

Ngaahi tā fakatātā ʻa Mark Robison