Mōrī, tāviri hōho’a, tāvini !
Noa atu tei te fare, ’aita rātou i fa’aea i te tāvini.
E mea au nā Antonella ’e Mariana ’ia haere i te purera’a i te mau hepetoma ato’a. I teienei rā, e’ita e nehenehe e haere tino atu i te purera’a nō te pararera’a ma’i pe’e COVID-19. E piha ha’api’ira’a Paraimere tā rātou nā ni’a i te natirara, e ’ere rā hō’ē ā huru.
Tē mihi ra ’o Antonella ’e Mariana ’ia haere tino atu i te Paraimere. I te matahiti nā mua atu, ’ua fa’anu’u mai tō rātou ’utuāfare mai Tīreni i Tanata. Nō te pararera’a ma’i pe’e, ’aita i ’ōhie nō te fa’ahoa i te hoa ’āpī. Tē mihi nei rāua i te mau ha’api’ira’a nō ni’a i te mau ā’amu o te pāpa’ira’a mo’a ’e te tahi atu mau tamari’i. ’E tē mihi nei rāua i te mau ha’api’ira’a nā roto i te reo pāniora mai tā rāua i mātau i Tīreni.
I te hō’ē mahana, i muri a’e i tā rātou purera’a i te fare, ’ua ’imi ’o Antonella ’e ’o Mariana i ni’a i te natirara i te hō’ē mea nō te tauturu ia rāua ’ia tuatāpapa i te Mai, pe’e mai.
« ’Āhani pa’i e rave rahi atu ā video nā roto i te reo pāniora », te parau a Antonella. ’Ua feruri ’oia ma’a taime. Tae mai nei te te hō’ē mana’o iāna. « E nehenehe tā tāua e hāmani i tā tāua iho mau video Mai, pe’e mai i te mau hepetoma ato’a. »
« ’Ē pa’i, e hāmani tāua nā roto i te reo pāniora ! », te parau ïa a Mariana. « E i muri iho, e fa’a’ite tāua i te reira i te tahi atu mau tamari’i. »
’Ua nā ’ō mai Mamá ’e Papá ē, e nehenehe tā rāua e tauturu. ’Ana’anatae roa te ’utuāfare !
’A tahi, ’ua tai’o te ’utuāfare i te mau pāpa’ira’a mo’a nō te hepetoma. ’Ua fa’anaho te mau tamāhine i te mea tā rāua e paraparau. I muri iho ’ua ha’amata rāua i te hāmani i te mau video. E fa’a’ohu Antonella ’e Mariana nō te tāviri hōho’a ia rāua ’a parau mai ai nō te mau ’ā’amu i roto i te Buka a Moromona. I te hope’a o te video tāta’itahi, e fa’a’ite mai te hō’ē o rāua i te hō’ē mea tā rāua i ’apo mai i roto i te ha’api’ira’a. I muri iho e tauturu ’o Mamá ’e Papá ia rāua ’ia tu’u i te video i ni’a i te natirara.
I te ha’amatara’a, ’aita rāua i ’ite rahi e aha tē parau. ’Ua tauturu rā te tai’ora’a i te mau pāpa’ira’a mo’a ’e te tuatāpapara’a i te ha’api’ira’a ia rāua.
I te hō’ē sābati, ’ua pārahi ’o Antonella ’e Mariana i mua i te rorouira nō tā rāua piha Paraimere. Te ha’api’ira’a nō terā hepetoma, nō ni’a ïa i te mau taure’are’a fa’ehau i roto i te Buka a Moromona. « Nō te aha te mau taure’are’a fa’ehau i haere ai e ’aro ? », te uira’a ïa a tō rātou ’orometua.
’Ua tū’ama Mariana i tā rāua micro. « ’Ua ta’a iā’u ! », ʼua parau mai ʼoia. E video tā rāua Antonella i hāmani i te hepetoma nā mua atu, nō ni’a i terā ’ā’amu. « ’Ua parau fafau tō rātou nā metua tāne i mua i te Atua ē, e ’ore roa rātou e ’aro, nō reira ’ua mono tā rātou mau tamaiti ia rātou. »
Ueue te upo’o o Antonella. « ’E ’ua ha’api’i tō rātou metua vahine ē, mai te mea e fa’aro’o tō rātou, e pāruru te Atua ia rātou. » ’Ua hi’o ’oia ia Mariana ma te mata ’ata’ata. E mea ’ārearea ’ia tuatāpapa ’āmui i te mau pāpa’ira’a mo’a.
I terā pō, i te tāmā’ara’a, ’ua ui ’o Mamá : « E aha te huru te Paraimere ? »
« Maita’i ! » Te parau ïa a Antonella. « Maoti te hāmanira’a i te mau video, i ha’api’i rahi atu ā vau nō ni’a i te mau pāpa’ira’a mo’a. »
« ’O vau ato’a » ’ua parau Mariana. « E nehenehe tā’u e pāhono i te mau uira’a e rave rahi i roto i te Paraimere. ’E ’ua ’ite maita’i a’e māua i te mau ’ā’amu o te pāpa’ira’a mo’a. »
« ’Oa’oa roa vau ’ua tauturu te mau video ia ’ōrua », ’ua parau ’o Papá. « I tō’u mana’o, ’ua tauturu ato’a te reira i te tahi atu mau ta’ata e rave rahi ! »
« Parau mau roa », ’ua parau Mamá. « E rāve’a tāvinira’a fa’ahiahia roa te fa’a’itera’a i te mea tā ’ōrua i ha’api’i, nā reira ato’a tō ’ōrua mana’o nō ni’a i te ’evanelia ! »
’Ua ’ata’ata Mariana. « E mea au nā’u ’ia tāvini mai te reira te huru », ’o tāna ïa parau. Fāriu a’era ’oia i ni’a ia Antonella. « Fa’aineine ana’e i te video nō te hepetoma i muri nei ! »
Fa’ahōho’ara’a nā Kristin Sorra