Nāhea Siedeh i te rirora’a ’ei ta’ata itoito
’Ua ri’ari’a roa Siedeh e paraparau i tōna mau hoa ha’api’ira’a.
’Ua huti Siedeh i te aho, ’e tomo a’era i roto i tāna piha ha’api’ira’a ’āpī. ’O tōna mahana matamua i roto i te piha maha.
I te matahiti i ma’iri, tei roto ’o Siedeh i te piha piti. No tōna pūai i te fare ha’api’ira’a, ’ua vaiiho rātou iāna ’ia ’ōu’a i te piha toru. ’Ua ’oa’oa roa Siedeh e rave ’oia i te mau ’ohipa nūmerara’a pa’ari a’e, ’e e tai’o rahi atu ā ’oia i te mau buka i roto i te piha maha. ’Aita rā ’oia i oa’oa i te fa’aru’era’a i tōna mau hoa tahito.
I te hi’ora’a Siedeh nā roto i te piha, ’ua ’ite ’oia i tōna na’ina’i. E mea huru pa’ari a’e tōna mau hoa ha’api’ira’a ’āpī iāna, ’e te rahi a’e. Nāhea pa’i mai te peu e’ita ’ōna e fāri’ihia ?
’Ua hi’o ’oia i te hō’ē pārahira’a ’e pārahi atu ra. Pārahi mai nei te hō’ē tamāhine roroa i pīha’i iho iāna. « ’Ia ora na », ’ua aroha atu ra Siedeh.
« E aha tā ’oe ’ohipa i’ō nei ? », ’ua ui mai terā tamāhine. « ’Ua mana’o roa vau e piha toru tā ’oe. »
« ’Ua fa’a’ōu’a te fare ha’api’ira’a iā’u i te hō’ē piha », ’ua parau atu Siedeh ma te taiā.
’Ua huru ’ē terā tamāhine. « ’Aita e paraura’a tō ’oe ’ite. E pēpe noa ā ’oe. »
’Ua oti roa Siedeh i roto iāna. Te roara’a o terā hepetoma, ’ua ri’ari’a roa ’oia e paraparau i tōna mau hoa ha’api’ira’a. I te mau taime ato’a e fa’aro’o ’oia i te tamari’i ’ia ’ata ’e ’ia muhumuhu, tu’atu’a tōna mata. Pāpū roa ē, tē parau ra rātou i te parau fa’a’ino i ni’a iāna.
’E tē mana’o ra ’oia ē, terā te mea ’ino roa a’e, fa’aho’ihia mai nei te hō’ē hi’opo’ara’a nūmera. Fātata roa ’oia i te ta’i i te hi’ora’a i tāna nota. ’O te nūmera tāna ha’api’ira’a au roa a’e. ’Aita roa atu tāna nota ha’eha’a mai teie nei.
I tōna taera’a atu i te fare, ’ua oti roa ’o Siedeh, ’ua ta’i atu ra. « ’Aita tō’u e hoa », ’ua nā ’ō ’oia i tōna nā metua. « E ’ere nō’u te piha maha. ’Aita i nava’i tō’u ’ite. »
« ’Ē’ē, e mea pa’ari ïa », ’ua nā ’ō atu te metua vahine o Siedeh. « E mea māramarama rā ’oe. ’E tē ha’api’i noa ra ’oe. »
Tāmarō Siedeh i tōna roimata. « ’Ua hina’aro vau e taui i te piha toru. »
’Ua vai māmū noa Pāpā ma’a taime. « ’Ua hina’aro ānei ’oe i te hō’ē ha’amaita’ira’a autahu’ara’a ? », ’ua ui ’oia.
Ueue te upo’o o Siedeh. Pēnei a’e e tauturu mai terā ha’amaita’ira’a a Pāpā.
’Ua pārahi Siedeh i ni’a i te pārahira’a, ’ua tu’u ’o Pāpā i tōna rima i ni’a i tōna upo’o.
« Tē ha’amaita’i nei au ia ’oe ’eiaha ’oe ’ia taiā », ’ua parau ’o Pāpā. « ’E tē ha’amaita’i nei au ia ’oe ’ia here ’oe i tō ’oe mau hoa ha’api’ira’a. ’E ’ia mātau mai rātou ia ’oe, e here ato’a mai rātou ia ’oe. »
’Ua fa’a’ī te hō’ē mana’o hau i roto ia Siedeh. ’Ua putapū ’oia i te mau parau a tōna metua, ’o te mau parau ato’a tā te Metua i te ao ra i hina’aro ’ia fa’aro’o mai ’oia.
I muri a’e i te ha’amaita’ira’a, ’ua tauturu Māmā ia Siedeh i roto i tāna ’ohipa ha’api’ira’a nūmera. ’Ua maita’i haere ri’i mai Siedeh.
I te mahana nō muri iho i te fare ha’api’ira’a, ’ua ha’amana’o ’o Siedeh i tōna ha’amaita’ira’a ’e ’ua tāmata ’oia i te fa’aitoito. ’Ua fa’a’ite ’oia i te mata ’ata’ata i mua i tōna mau hoa ha’api’ira’a. I tōna fa’a’itera’a atu i te here, ’ua iti ri’i mai tōna taiā ia rātou ! Vetahi o rātou, e mea maita’i roa ïa. ’Ua fa’aitoito roa ’oia i tāna ’ohipa ha’api’ira’a, ’e ’aita i maoro, ’ua maita’i mai tāna mau nota.
I te hope’a o te matahiti ha’api’ira’a, e rave rahi tō Siedeh mau hoa. ’Ua ’oa’oa ’oia ’ua tauturu te Metua i te ao ra iāna ’ia vai itoito noa. ’E ’ua māuruuru ’oia e nehenehe noa iāna ’ia fāri’i i te ha’amaita’ira’a nō te mana autahu’ara’a nō te tauturu iāna.
Fa’ahōho’ara’a nā Susan Keeter