Ti’a nō Iesu
’Ua taiā ri’i David i te ’ōpere i te ’ōro’a mo’a, e taime mātāmua ho’i nōna.
’Ua pārahi David i ni’a i te ’āna’ira’a pārahira’a mātāmua o te fare purera’a, hā’uti’uti noa tōna ’āvae. Tē ha’ape’ape’a ra. Nō faaru’e noa mai ’oia i te Paraimere, ’e ’ua riro mai ’ei diakono. E fa’a’ite te mau tamāroa pa’ari a’e ia David ’e te tahi atu mau tamāroa 11 matahiti nāhea i te ’ōpere i te ’ōro’a mo’a.
Nō tōna ma’i hiparoto (autisme), e mea pa’ari nā David ’ia ’apo mai i te mau ha’api’ira’a ’āpī i te tahi taime. E mea fifi roa nōna i te haerera’a i rāpae i te Paraimere. ’E i teienei, e mea huru taiā roa te ’ōperera’a i te ’ōro’a mo’a. ’E mai te mea e hape ’oia ’e e ’ata mai te ta’ata iāna ?
I pīha’i iho Jacob ia David i te pārahira’a, e tamāroa pa’ari a’e ’o Jacob. « ’Oa’oa mātou i te fāri’ira’a ia ’oe », ’ua parau atu Jacob. Aroha rima a’era rāua. « E haere ia ’oe. »
’Ua ’ata’ata ’o David. ’Ua ’ana’anatae ri’i mai ’oia i terā parau.
’Ua fa’a’ite te tahi atu feiā ’āpī tamāroa i te mau mea e rave, i te mau tamāroa 11 matahiti. ’Ua fa’a’ite atu rātou i hea e haere ’e tei hea ’āna’ira’a e ’ōpere. ’Ua ha’api’ipi’i rātou i te hāhaere nā roto i te piha purera’a. ’Ua fa’a’ite rātou i te mau tamāroa nāhea i te tāpe’a i te mau fāri’i ’ōro’a.
« Māmā, ’a hi’o na ! » ’Ua parau David i te ho’ira’a i te fare. ’Ua fa’atuea ’oia i tōna rima i mua. « Mai teie vau e tāpe’a i te fāri’i ’ōro’a. Mea ha’apa’o maita’i, mai teie. Nō te mea tē ti’a nei au nō Iesu, ’e ’ua hina’aro vau e fa’a’ite i tō’u fa’atura iāna. »
’Ua ha’api’ipi’i te feiā ’āpī tamāroa ia David ’e i te tahi atu mau tamāroa i muri a’e i te purera’a i te sābati, ’e i roto i te mau ’ātivite i roto i te hepetoma. E haere rātou nā te vāhi e ’ōpere rātou. ’Ua ha’api’ipi’i David nāhea i te tāpe’a i te fāri’i.
Ē tae mai nei te mahana e ’ōpere ai ’oia i te ’ōro’a nō te taime mātāmua.
« E aha tō ’oe mana’o nō ni’a i te reira ? » ’ua ui atu Pāpā.
« Tē taiā noa ra vau », ’ua parau David.
« Hi’o ana’e i te mea tā ’oe i rave nō te fa’aineine ia ’oe », ’ua nā ’ō atu Pāpā.
« ’Ua tai’o tātou te ’utuāfare i te mau pāpa’ira’a mo’a nō ni’a i te autahu’ara’a », ’ua parau David. « Tē mau ra vau i te autahu’ara’a, te aura’a ra, e ti’a vau nō Iesu. ’Ua tāpūpū vau i tō’u mai’u’u, e mea nehenehe ’ia hi’o. ’E ’ua ha’api’ipi’i au e rave rahi taime ! »
« ’Ia fa’aro’o vau ia ’oe, ’ua ineine roa ’oe », ’ua parau Pāpā.
I te taera’a ’oia i te purera’a, ’ua pārahi David i ni’a i te ’āna’ira’a pārahira’a mātāmua ’e te tahi atu mau diakono. ’Ua pārahi Jacob i pīha’i iho. ’Ua feruri David e nāhea i te ti’a nō Iesu i te taime e ’ōpere ai ’oia i te ’ōro’a. ’E mai te mea e hape noa ā ’oia ? ’Ua hi’o ’oia ia Iakoba, ’e ’ua hi’o au mai Jacob iāna. ’Ua hi’o au ato’a atu David ’e ’ua huti i te aho.
I te taime ’ōperera’a, ’ua tauturu Jacob ia David ’ia ’ōpere i te fāri’i ’ōro’a i nā ’āna’ira’a pārahira’a mātāmua. ’Ua ’oa’oa David, tei pīha’i iho iāna te tahi ta’ata.
’Ua hi’o David i te mau ta’ata ’a ’ōpere ai i te ’ōro’a mo’a. E rave rahi o rātou tē pārahi ra ma te pi’o fa’atura i te upo’o. Tē feruri ra te tahi pae. ’Ua fāri’i David i te hau. Tē ti’a ra ’oia nō Iesu. ’Ua māuruuru ’oia e nehenehe tāna e tauturu ia vetahi ’ē ’ia feruri ia Iesu Mesia.
Fa’ahōho’ara’a nā Donald Wu