’Ua māniania roa !
’Ua māniania roa. I hea pa’i e ’itehia ai ia Luka te hau ?
’Ua autā ’o Luka. ’Ua māniania roa. Tē māniania fa’ahou ra Tadd ia John, tōna nā taea’e. Noa atu tei te tahi atu pae o te fare, e fa’aro’o ’oia i tā rāua tūtuōra’a nā roto i te ’ūputa o tō rāua piha. ’E ’ua pūai roa te pehe a tōna tuahine ia Lizzie, fa’ahou ā. Tum. Tum. Tum. E fa’aro’o noa ’ōna i te tūpa’ira’a tāmau o te pehe.
’Ua tāmata Luka i te ani i tōna nā taea’e e fa’aea. « ’A fa’aātea atu », tā Tadd i parau iāna. ’Ua ani ato’a Luka ia Lizzie e ha’amarū ri’i tāna pehe. E ha’apūai fa’ahou atu ïa ’oia.
’Ua hina’aro Luka e haere i rāpae i te hō’ē vāhi e nehenehe tāna e feruri. Terā rā, e mahana ua.
E vāhi hau rā tā Luka e nehenehe e haere. Inanahi ra, ’ua hōro’a tōna nā metua iāna i te hō’ē piha nōna iho—’aita nō Tadd, ’aita nō John. Tei te tahua raro. ’Ua nava’i noa te rahi nō te hō’ē ro’i ’e te hō’ē ’aira’amā’a. I roto rā i tōna piha, e nehenehe tā Luka e tāpiri i te ’ūputa ’e e fa’aātea iāna i te māniania.
’Ua pou atu ra ’o Luka i raro i roto i tōna piha ’āpī. ’Ua hi’o ’oia i te mau ’āfata tāna i ha’apou mai nā mua atu. ’Ite atu ra ’oia i te tuha’a o te hō’ē hōho’a nō Iesu i roto i te hō’ē ’āfata. E hōho’a tāna i fāri’i i te mahana nō tōna bāpetizora’a. E hōho’a tei fa’ahau noa ana iāna.
Rave mai nei ’o Luka i te hōho’a. Tu’u a’era i ni’a i te hō’ē ’aira’amā’a. Tūturi atu ra i raro nō te pure. ’Ia nā ’ō ’oia : « E te Metua i te ao ra, i te tahi taime e mea māniania roa i’ō nei. E tauturu mai na iā’u, ’ia ’ite au i te hau. »
Tārava a’era Luka i ni’a i tōna ro’i. ’E feruri a’era ia Iesu. ’Ua ha’api’i mai ’oia i te Paraimere ē, e nehenehe Iesu e ha’afātata noa iāna. ’E e nehenehe te Vārua Maita’i e hōpoi mai i te hau i te mau taime ato’a.
E’ita e maoro, e tae mai ’o Māmā ’e ’o Pāpā nā te ’ohipa. E paraparau rāua ia Tadd ’e ia John. E fa’aea rāua i tā rāua ’arora’a. Nō te hō’ē taime. E paraparau rāua ia Lizzie. E ha’amarū Lizzie i tāna pehe. Nō te hō’ē taime. Ē tae noa atu e haere fa’ahou Māma ’e Pāpa.
Tē tārava nei rā Luka i ni’a i tōna ro’i. ’Ua hiʼo ’oia i te hōho’a nō Iesu. « E te Metua i te ao ra ē », te muhumuhu ïa a Luka. « Tauturu mai na iā’u ’ia ’ite au i te hau noa atu ā te ’ohipa e tupu i roto i teie fare. »
Ē pātōtōhia mai ra i te ’ūputa piha. « Nehenehe e haere atu ? » ’Ua ui ’o Māmā. « E aha te huru ? »
« ’Ua tāputo fa’ahou ā Tadd ’e John », ’ua nā ’ō atu Luka. « ’E pūai roa te pehe a Lizzie. »
« ’Ua ’ite au. « E mea huru fifi, e ’ere ? » Te parau a Māmā. « Tē paraparau ra ’o Pāpa i tō ’oe nā taea’e. ’E nā’u e paraparau ia Lizzie i teie pō. ’Ua hina’aro nā mua rā vau ’ia hi’o e aha tō ’oe huru. »
« E mea maita’i au. ’Oa’oa vau tē vai nei teie piha », ’ua parau Luka.
« ’O vau ato’a », ’ua parau ’o Māma. « Tē ’ite ra vau i te hōho’a nō Iesu tā ’oe i tu’u i ni’a i te ’aira’amā’a. »
’Ua ’ata ’o Luka. « ’Ē. ’E nāna e tauturu mai iā’u i te fa’ariro i tō’u piha ’ei vāhi nō te hau. »
Fa’ahōho’ara’a nā Bryan Beach