“Kaen Fasin long Karosel,” Fren, Maj 2023, 28–29.
Kaen Fasin long Karosel
Damien i wis nomo se hem no bin singaot strong long sista blong hem.
Taem Damien i wokbaot i kam insaed long pak, i harem wan hapi miusik we i stap plei. Bubuwoman blong hem i stap tekem hem mo smol sista blong hem, Adele, blong ron long fevret karosel blong hem. I gat wan naesfala gem we i gat ol ring. Damien i glad tumas blong soem long Adele olsem wanem blong plei.
I no longtaem i pas, oli stap long wan laen. Karosel i bigwan mo gat plante kala long hem mo wetem plante statiu blong hos. Ol pikinini we oli sidaon long ol hos, oli stap smael mo sakem han blong talem tata taem oli stap ronron i go raonraon.
“Sapos yu jusum wan hos long en, yu save plei ring gem!” Damien i talem long Adele. “?Yu luk ol wud we ol pikinini oli stap holem? ?Mo luk man ia wetem ol ring?”
Damien i poen i go long man we i wok ia. Hem i stanap kolosap long karosel mo stap holem wan ring. Taem oli stap ron long karosel, ol pikinini oli traem blong putum wud blong olgeta i go tru long ring ia blong kasem. Evritaem we oli kasem wan ring, man we i wok ia bae i holem wan narafala niu wan.
Adele i klapem han blong hem. “Mi wantem blong kasem evri ring!” hem i talem.
Long en oli kasem laen long foret. Be i gat wan moa hos i stap yet long karosel.
“Damien,” Bubuwoman i talem, “?I oraet sapos yumi lego Adele i tekem las ples ia from hem i neva ron long hem bifo? Yu save ron long nekis taem.”
“I stret,” Damien i talem sloslo. Hem i wajem man we i wok ia taem i helpem Adele blong sidaon long braon hos. Afta man we i wok ia i givim wan wud long Adele blong kasem ol ring.
Miusik i stat, mo karosel i stat blong tantanem. Damien i wajem Adele wetem bubuwoman long saed. !Be Adele i stap holem wud ia i foret i go biaen! Hem i mas holem wud ia long bigfala handel, hem i holem long longfala, bunbun en we oli yusum blong kasem ol ring.
“Adele, tanem wud blong yu i go raon!” hem i singaot. Be Adele i no harem hem from ol noes. Taem hem i pas long rong, wud blong hem i tajem. Be handel i bigwan tumas blong go tru long ring.
“Adele, wud blong yu!” Damien i traem bakegen. “!Bae yu no save kasem ol ring sapos yu holem olsem!”
Be Adele i no harem hem. Hem i smael mo laf taem karosel i stap raonraon. Wud blong hem i tajem ring bakegen. Hem i no kasem wan ring nomo.
Damien i mekem fes i nogud. !Adele i stap westem taem blong hem! Sapos hem i bin stap long karosel, bae hem i save kasem evri ring.
Taem we gem i finis, hem i ron i go long Adele.
“!Mi bin talem long yu olsem wanem blong holem wud!” hem i singaot strong. “?From wanem yu no lisin long mi? !Yu mekem evri samting i rong!”
Adele i no toktok strong i gobak long Damien. Hem i no krae. Hem i stanap ia nomo mo hem i smol, smol, smol.
Hat blong Damien i pam, mo fes blong hem i red. !Hemia i mekem hem i kros blong wajem Adele we i stap mestem ol ring ia! Be hemia i fastaem blong hem. Mo tu, hem i bin gat wan gudtaem. Kasem naoia.
Damien i filim nogud tumas. Damien i wis nomo se hem no bin singaot strong long Adele.
“Mi sore,” hem i talem wetem sofsof voes. “I no naes blong mi mekem olsem.”
Adele i lukluk i go antap.
“?Bae i olsem wanem sapos mi givim long yu sam advaes blong kasem ol ring ?” Damien i talem. “Bae mi sidaon narasaed long yu long karosel blong helpem yu.”
Adele i saksakem hed blong hem blong agri.
Afta, Damien i tanem hem i go long bubuwoman. “?Bae yumi save karem tu tikit, mekem se Adele i save traem bakegen?”
Bubuwoman i smael. “!O Yes!”
Stori ia i hapen long Franis.
Pikja droing i kam long Violet Lemay