“Prea long Taem blong Etkwek,” Fren, Maj 2022, 4–5.

Prea long Taem blong Etkwek

I kam long Noelle Barrus

(I kamaot long wan tru stori)

Taem Violet i wekap, !evri samting i stap muvmuv!

Stori ia i hapen long Peru.

Pikja

Smol gel i sek mo wekap long bed mo stap holem wan blanket

Violet i stap slip taem wan strong saon i mekem hem i wekap. Fastaem, hem i ting se i wan tanda.

Be strong noes i stap kam moa laod mo laod. I muvmuvum ol windo blong bedrum blong hem.

Kwiktaem, Violet i girap mo sidaon. !Hemia wan etkwek!

Hem mo famli blong hem i jes muv i kam long Peru i no longtaem i pas. Hem i bin save se, oltaem ol etkwek oli stap hapen long ples ia. Mo hem mo famli blong hem oli bin rere from mo praktisim wanem blong mekem. Be hemia i moa nogud bitim wanem we hem i ting se bae i olsem. !Hem i save filim bodi blong hem i stap muvmuv!

Violet i ron i go long kitjin mo krol andanit long tebol. Sam seken i pas, brata mo sista blong hem tufala joenem hem. Mo mama mo papa tu.

“Gud wok blong stap tingbaot wanem we mifala i bin praktisim,” papa i talem. “?Evriwan i Oraet?”

Brata mo sista blong Violet tufala saksakem hed blong agri.

Be, Violet i fraet. Hem i sarem ae blong hem. Hem i had long hem blong ting nating long wanem we oli stap muvmuv raon long hem.

Afta, Violet i tingbaot blong prea. Hem foldem han blong hem mo benem hed blong hem i godaon. “Dia Papa long Heven,” hem i talem long kwaet voes, “plis tekem kea long famli blong mi.”

Pikja

Famli i stap prea andanit long wan tebol long taem blong wan etkwek

Violet i gohed blong prea. Hem i filim se wan i stap haggem hem. Taem hem i finis, i lukluk i go antap. Mama mo papa, tufala i foldem han blong tufala. Brata mo sista blong hem, tufala tu i mekem. !Olgeta evriwan oli stap prea! Graon i stap muvmuv yet. Be Violet i filim pis long hat mo maen blong hem.

Long en, ples i stop blong muvmuv. Violet mo famli blong hem, oli stap andanit long tebol blong wan longfala taem smol, blong oli save stap sef nomo.

“?Olsem wanem nao yu filim?” Mama i askem Violet.

“OK,” Violet i talem. “Fastaem, i tru, mi bin fraet tumas. Be blong stap prea i helpem mi blong filim moa gud.” Hem i haggem mama. Hem i glad se Papa long Heven i bin helpem hem blong filim pis.

Pikja

stori PDF

Ol pikja droing i kam long Toby Newsome