“Buk blong Daenaso,” Fren, Maj 2023, 22–23.
Buk blong Daenaso
Sophia i mekem fes i nogud. ?From wanem hem i no save laekem ol daenaso tu?
Sophia mo Allie tufala i twins, mo tufala i bes fren. !Oli laekem ol defren samting, be hemia i mekem se i moa gud! Oli laekem blong plei tugeta.
Wan dei long skul, Sophia i karem wan buk abaot ol daenaso long laebri. Hem i glad tumas blong soem long Allie.
“Yu no save ridim hemia,” Timmy i talem, wan boe long klas blong hem.
“?From wanem?” Sophia i askem.
“Hemia buk blong ol boe ia,” hem i talem. “Daenaso i blong ol boe.”
Sophia i mekem fes i nogud. ?From wanem hem i no save laekem ol daenaso tu? Hem i fulumap buk long basket blong hem. Hem bae i gohed blong ridim nomo.
Fuldei ia, Sophia i tingbaot wanem Timmy i bin talem. Hem i filim nogud yet kasem taem hem i kasem haos afta skul.
“?Wanem i rong?” Mama i askem.
“Timmy i talem se mi no save ridim wan buk abaot ol daenaso,” Sophia i talem. “Hem i talem se daenaso i blong ol boe. ?Hemia i no tru, ?yes o no?”
“No, i no tru,” Mama i talem.
Sophia i lukluk i godaon. “Afta, from wanem Timmy i talem olsem?”
“Ating from hem i no save huia moa ol gel we bae oli laekem ol daenaso,” Mama i talem. “Be Papa long Heven i no mekem yumi evriwan i semmak. Mo Hem i wantem yumi blong stap kaen long wanwan long yumi.”
Mama i hanggem Sophia. “Mi sore se Timmy i tritim yu olsem. Be, Papa long Heven i lavem yu. Mo mi tu mi lavem yu.”
“Tangkyu mama,” Sophia i talem. Naoia, hem i filim moa gud.
“Bae mi toktok long tija blong yu abaot hemia, ?OK?” Mama i talem.
Sophia i saksakem hed blong agri. “Okei.”
Sophia i go blong pleiplei wetem Allie. Oli krietem wan gem we oli singaotem Supa Prinses Resa, long ples ia ol doli blong Allie nao oli ol draeva blong ol trak blong resis. !Hem i kolosap blong win, be Prinses Laetning Jita i bin win! Sophia mo Allie singaot wetem glad.
“?Yu wantem blong luk buk blong daenaso we mi karem tedei?” Sophia i askem.
“!Yes!” Allie i talem.
Sophia i smael. Oltaem, hem i glad blong gat gudtaem wetem Allie.
Long nekis dei, tija blong Sophia i gat wan anaonsmen. “Klas,” hem i talem, “i gat wan samting we mi wantem blong talem long yufala. I oraet blong laekem ol defdefren samting. Evri buk mo ol pleiplei doli oli blong yumi evriwan.”
!Sophia i glad tumas! Long taem blong rid, hem i tekemaot ol buk blong daenaso long basket.
Timmy i kam long tebol blong hem. “Mi sore from we mi bin talem se bae yu no save ridim buk ia,” hem i talem. “Mi laekem ol daenaso tu.”
“I Oraet,” Sophia i talem. “?Yu wantem blong ridim wetem mi?”
“!Yes!” Timmy i sidaon long saed blong hem. “Tangkyu.”
Sophia i openem buk. Hem mo Timmy oli defren, be i naes blong serem samting wetem wan niufala fren.
Stori ia i tekem ples long YSA.
Pikja droing i kam long Mak Robison