“Problem blong Stap Serem Samting,” Fren, Maj 2023, 36–37.
Problem blong Stap Serem Samting
“Blong stap serem samting i wan wei blong soem long wan se yu kea long olgeta.”
Krans, krans, krans. Andrew i solem pop kon blong hem mo karem wan moa we han blong hem i fulap gud.
Bigfala brata blong hem, Caleb, i foldaon i kamdaon mo sidaon narasaed long hem long am jea. “Eh ?mi save kakae sam?”
Andrew i no karemaot ae blong hem long TV. “No.”
“O, plis Yu save serem.”
Caleb i pusum han i go long bolglas, be Andrew i kilimaot han blong hem.
“!No! Mi talem long yu finis. !Yu nomo askem bakegen!”
“I stret.” Caleb i stanap mo kamaot long rum.
Nekis dei, Andrew i go insaed long kitjin. Caleb i stap mekem sam susi wetem raes, siwid mo tin pok.
Maot blong Andrew i fulap long wota. “?Mi save kakae sam?”
“No,” Caleb i talem.
Hemia i mekem Andrew i kros tumas. Hem i ron i godaon long nara rum blong talem long papa.
“From wanem Caleb i selfis tumas?” hem i talem.
Papa i mekem fes i nogud. “Mi luk se yestedei yu no wantem serem pop kon blong yu. ?From wanem Caleb bae i serem kaekae wetem yu, be yu no bin serem kaekae wetem hem?”
“!From se, hem i brata blong mi!” Andrew i talem.
“Afta, spos olsem, ?from wanem nao yu no wantem serem wetem hem?”
“!Hem tu i neva stap serem samting wetem mi! Mo tu, mi mekem blong miwan nomo, i no blong hem,” Andrew i talem. Be hem i filim nogud smol. Ating from se hem i no stap kaen blong serem samting.
“?Yu, yu save se long Koria, fasin blong serem samting hem i impoten tumas?” Papa i askem. Famli blong Andrew, oli blong Koria. “Blong stap serem samting, i soem long wan narafala man se yu kea long olgeta. So, sapos yu no stap serem samting, i olsem se yu stap talem se yu no kea long olgeta.”
“Be mi save kea tu long Caleb.”
Andrew i tingting long wanem we Jisas bae i bin mekem. Hem i tingbaot olsem wanem Jisas i lavem evriwan—iven olgeta we oli no kaen long Hem.
“Mi ting se tumoro bae mi serem samting wetem Caleb mo luk se bae i olsem wanem,” hem i talem long papa.
Papa i smael. “Mi ting se hemia i wan gudfala tingting.”
Taem we Andrew i go long bed long naet ia, hem i stap tingting long ol narafala samting we oli naes we hem i save mekem long Caleb. !Hem i glad tumas blong stat blong serem samting!
Long nekis moning, Andrew i wekap mo luk wan sapraes. !Caleb i mekem brekfes blong hem nomo!
“Papa i toktok long mi abaot fasin blong serem samting,” Caleb i talem. “Mi wantem blong mekem moa gud. So, mi mekem hemia blong yu.”
“!Tangkyu!” Andrew i talem. “Mi tu, mi wantem blong mekem gud.”
Samtaem long dei ia, Andrew mo Caleb, tufala wajem wan muvi. Andrew i letem Caleb blong Jusum wan. !Afta, hem i mekem sam pop kon blong Caleb nomo! Hem i lukluk insaed long bolglas. I olsem se pop kon i stap talem se, “!KAKAE MI!” Be Andrew i no tekem eniwan. Hem i givim bolglas mo talem, “hemia i blong yu. Mi sore from mi no bin serem wetem yu lastaem ia.”
Andrew i serem samting wetem Caleb blong ful wik. Hem i letem Caleb blong ridim ol buk blong hem. Hem i letem Caleb i yusum ol maka blong blong hem. Hem i letem Caleb i pleiplei wetem ol fevret doli blong hem. Hem i iven givim ekstra janis long Caleb blong ple bakegen taem tufala stap plei wan gem.
!Moa taem Andrew i serem samting wetem Caleb, moa, Caleb i serem samting wetem hem! I no longtaem tufala i stap mekem ol naesfala samting long tufala wanwan evritaem. Andrew i save se Papa long Heven i stap helpem hem blong serem samting wetem brata blong hem. Andrew i no stret gud evriwan olsem Jisas, be hem i traem blong kam moa olsem Hem evridei.
Stori ia i tekem ples long YSA.
Ol pikja oli kam long Adam Howling