“Gol blong Mi blong Buk blong Momon,” Fren, Maj 2023, 31.
Ol Pikinini mo Ol Yut
Gol blong Mi blong Buk blong Momon
Pikja droing i kam long Hoffman-Bayes
Mi putum wan gol blong ridim Buk blong Momon bifo mi baptaes, olsem narafala brata mo sista i bin mekem. Be taem we KOVID i bin hapen, mi mestem plante skul, mo riding i bin ekstra had long mi. Buk blong Momon i gat plante bigbigfala toktok. Mo mi nidim help.
Afta, papa mo mama blong mi mo mi, mifala i bin gat wan aedia. Mi yusum Gospel Laebri ap long fon blong mama blong mi blong lisin long Buk blong Momon. Mifala i mekem ol voes i slo daon mekem se mi save folem moa isi. Mo tu, mi stop long rod blong mi blong stap wajem ol link blong ol vidio long ap. Evritaem mi rid, mi makem daon long wan jat. Mi toktok wetem mama blong mi abaot wanem mi stap ridim. !Hem i gud tumas!
Mi stap kam gud long saed blong riding, be mi no ting se bae mi finis stret long baptaes blong mi. So, mi talem se, sapos mi no finisim bifo long baptaes blong mi, bae mi finisim bifo en blong yia (we i wan manis afta). Mi gohed blong stap rid. Samtaem mama o sista blong mi bae tufala i rid wetem mi.
!Long 31 Disemba, mi finisim Buk blong Momon! Ful famli blong mi oli singaot wetem glad. Afta mi go long rum blong mi blong talem wan prea. Mi askem sapos Buk blong Momon i tru, mo mi bin filim gud.
Mi save se Papa long Heven i lisin taem mi prea. Mi save se papa mo mama blong mi long heven tufala i lavem mi. Mi save se Buk blong Momon i toktok blong God, mo Jisas i lavem mi.